قر ەنەرگەتيكا مينيسترلىگى قىلمىستىق جولدارعا توسقاۋىل قويۋ ءۇشىن مۇنايدى ەسەپكە الۋدىڭ اقپاراتتىق جۇيەسىن ەنگىزبەك. بۇل تۋرالى اتالعان ۆەدومستۆونىڭ القا ماجىلىسىندە مينيستر قانات بوزىمباەۆ ءمالىم ەتتى, دەپ حابارلايدى قازاقپارات.
"ساندىق تەحنولوگيالاردى پايدالانۋ سالالارعا جاڭا ساپانى ەنگىزۋگە مۇمكىندىك بەرەدى. وسى ورايدا مالىمەتتەردى اۆتوماتتاندىرىلعان تارتىپتە جيناۋ, وڭدەۋ جانە پايدالانۋ ءۇشىن مۇنايدى ەسەپكە الۋدىڭ اقپاراتتىق جۇيەسىن ەنگىزۋ ەسكەرىلۋدە. بۇل جۇيە مۇنايدى ءوندىرۋدىڭ, مۇناي اينالىمى كەزىندە تۋىندايتىن بارلىق تەحنيكالىق ىسىراپتاردى ەسكە الۋدى جاڭعىرتۋ مەن اۆتوماتتاندىرۋعا جول اشادى»,-دەپ توقتالدى مينيستر.
ونىڭ پايىمىنشا, بۇل جاڭاشىلدىق مۇنايدى ءوندىرۋ مەن تاسىمال كەزىندەگى ءتۇرلى ىسىراپتى تومەندەتۋى ءتيىس, سونداي-اق وسى باعىتتا قاندايدا دا ءبىر قىلمىستىق تىزبەكتەردىڭ جولىن كەسۋگە ىقپال ەتەدى.
بوزىمباەۆتىڭ سوزىنشە, 2017 جىلى زاڭناماعا ءتيىستى تۇزەتۋلەر ازىرلەنەدى, ال 2018-2019 جىلدارى جۇيە ەنگىزىلىپ, 2020 جىلدان باستاپ ول بارلىق كەن ورىندارىن قامتيتىن بولادى.