WBC نۇسقاسى بويىنشا ەۋرازيا جانە WBA NABA تۇجىرىمىنىڭ چەمپيونى قازاقستاندىق بوكسشى بەكمان سويلىباەۆتىڭ (9-0, 4 كو) قارسىلاسى اۋىستى.
Boxrec.com باسىلىمىنىڭ مالىمەتى بويىنشا بەكمان 10 ناۋرىز كۇنى مەكسيكالىق ماريو انتونيو ماسياسپەن جەكپە-جەك وتكىزۋى ءتيىس بولاتىن. ەندى ول مەكسيكانىڭ تاعى ءبىر تاجىريبەلى بوكسشىسى گەرمان مەراسپەن كۇش سىناسادى. سەگىز راۋندتىق كەزدەسۋ تاستين قالاسىندا (اقش, كاليفورنيا شتاتى), ەكىنشى جارتىلاي جەڭىل سالماقتا وتەدى.
"شىنىمدى ايتسام, گەرمان مەراس جايلى ەشنارسە بىلمەيمىن. بىراق Boxrec سايتىنداعى ستاتيستيكاسى تاڭ قالدىرماي قويماعانى انىق. جاسى 30-دا ەكەن. كاسىپقوي بوكستا 99 جەكپە-جەك وتكىزىپ ۇلگەرىپتى. مەن ونىڭ ءجۇزىنشى قارسىلاسى بولامىن. تاجىريبەسى كوپ ەكەنى ايتپاسا دا بەلگىلى. ول جايلى مالىمەتتەر جيناپ, ءالسىز جانە مىقتى تۇستارىن تولىق زەرتتەپ ۇلگەرەمىز دەپ ويلايمىن", - دەدى بەكمان سويلىباەۆ.
ايتا كەتەيىك, قازاقستاندىق بوكسشى سوڭعى رەت شارشى الاڭعا وتكەن جىلى شىققان. سودان بەرى قولىنان جاراقات الىپ, رينگكە شىعا الماعان.
قازىرگى ۋاقىتتا بەكمان سويلىباەۆ لوس-اندجەلەس قالاسىندا Wild Card West جاتتىعۋ زالىندا امەريكالىق باپكەر ەريك براۋنمەن بىرگە جاتتىعۋ جاساپ ءجۇر. وتانداسىمىز كاسىپقوي بوكستا 9 كەزدەسۋ وتكىزىپ, بارىندە جەڭىسكە جەتكەن. ونىڭ تورتەۋىن نوكاۋتپەن اياقتاعان. الدىن الا مالىمەت بويىنشا بۇدان كەيىنگى ايقاسى وسى جىلدىڭ ساۋىر ايىنا جوسپارلانىپ وتىر.