تاراز مەملەكەتتىك پەداگوگيكالىق ينستيتۋتىندا «ءوزىن-ءوزى تانۋ» مەن «بالالاردىڭ ءتىلىن دامىتۋدا كوررەكتسيالىق قولداۋ كورسەتۋ» ورتالىقتارى اشىلدى. ونىڭ اشىلۋ راسىمىنە قر ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا قاتىستى, دەپ حابارلايدى وقۋ ورنىنىڭ رەسمي وكىلى جاندار اسان.
ورتالىقتا سويلەۋ قابىلەتىنىڭ كەمىستىگى بار جەتكىنشەكتەر وقىپ, تاربيەلەنبەك. بۇندا دەفەكتولوگ ماماندار سابيلەرگە جان-جاقتى پەداگوگيكالىق, فيزيولوگيالىق جانە پسيحولوگيالىق زەرتتەۋلەر جاساپ, كەمىستىكتى تۇزەۋ باعىتىندا جۇمىس اتقارادى. سونىمەن قاتار, پەداگوگيكالىق وقۋ ورنىنىڭ 3-4 كۋرس ستۋدەنتتەرى ۇستاز-لوگوپەد رەتىندە تاجىريبە جۇرگىزە الادى.
«ەلىمىزدىڭ مەكتەپتەرىندە وسى تاقىلەتتەس ورتالىقتار بىرتىندەپ اشىلۋدا. دەسە دە تاراز مەملەكەتتىك پەداگوگيكالىق ينستيتۋتى جوعارى وقۋ ورىندارى اراسىندا العاش باستاما كوتەرىپ, ونى ناقتى جۇزەگە اسىرىپ وتىر. ينستيتۋتتىڭ ارنايى پەداگوگيكا كافەدراسى ءبىلىم بەرۋ باعدارلاماسى اياسىندا «دەفەكتولوگيا» ماماندىعى بويىنشا بولاشاق لوگوپەدتەردى دايارلاۋ ۇستىندە. بۇنىڭ جاڭا ماماندىق رەتىندە ەنگىزىلگەنىنە كوپ بولا قويعان جوق. وسىدان-اق, ونىڭ قازىرگى وركەنيەتتى زاماندا وتە تاپشى ەكەنىن اڭعارۋعا بولادى. سوندىقتان, بولاشاق مامانداردىڭ ءبىلىم مەن تاجىريبەنى قاتار الۋىنا مۇمكىندىك جاساعانى ءۇشىن پەداگوگيكالىق ينستيتۋتتىڭ ۇجىمىنا العىس بىلدىرەمىز,» – دەپ اتاپ ءوتتى ەلميرا سۋحانبەرديەۆا.
ول الداعى ۋاقىتتا اتالعان سالاعا كادر دايارلاۋ ءۇشىن مەملەكەتتىك ءبىلىم بەرۋ گرانتتارىنىڭ كوبىرەك بولىنەتىندىگىن مالىمدەدى.
رەسمي مالىمەتتەرگە سۇيەنەر بولساق, بۇگىندە تاراز قالاسىندا 2 ارنايى لوگوپەديالىق بالاباقشا جۇمىس ىستەيدى. ال, وزگە مەكتەپكە دەيىنگى ءبىلىم بەرۋ مەكەمەلەرىندە ارنايى لوگوپۋنكتەر دەڭگەيىندە قىزمەت كورسەتەدى. وسىعان وراي, وڭىردە لوگوپەدتەرگە سۇرانىس بارلىعى بايقالادى.
«قازىرگى تاڭدا بالالار اراسىندا ءتىل كەمىستىگى پاتولوگياسى ءجيى ۇشىراسادى. وقۋ ورنى وسى ولقىلىقتىڭ ورنىن تولتىرۋدى كوزدەپ وتىر. جۇمىسىن جاڭادان باستاعالى وتىرعان ورتالىققا قازىردىڭ وزىندە تىركەلگەن بۇلدىرشىندەر بارشىلىق. ورتالىق 4-8 جاس ارالىعىنداعى 50 شاقتى تاربيەلەنۋشىنى قابىلداۋعا قاۋقارلى. بىلىكتى ماماندار ارنايى پەداگوگيكالىق اۆتورلىق باعدارلامالار ارقىلى زاماناۋي ءادىس-تاسىلدەرمەن جۇمىس ىستەيتىن بولادى. ەلىمىز وركەنيەتتى قوعام قۇرۋى ءۇشىن دەنى ساۋ, تاربيەلى ازاماتتاردىڭ قاتارى كوپ بولعانى ابزال. اتالعان ورتالىق وسى ماقساتتا جۇمىس اتقارماق,» – دەدى ينستيتۋت رەكتورى داريا قوجامجاروۆا.
سونىمەن قاتار, ينستيتۋتتا «ءوزىن-ءوزى تانۋ» ورتالىعى پايدالانۋعا بەرىلدى. ورتالىقتا شەت تىلدەرىن ۇيرەنۋگە بولادى. شىعارماشىلىقتى دامىتۋ ۇيىرمەلەرى دە بار. اتاپ ايتقاندا, جاستار تەاترلاندىرىلعان قويىلىمدارعا قاتىسىپ, ءمۇسىن جاساۋ, كەستەلەۋ ونەرىنە ماشىقتانادى. دارىستەردى پەداگوگيكالىق وقۋ ورنىنىڭ ۇستازدارى جۇرگىزەدى.