فۋتبول جانكۇيەرلەرى ءتۇن ۇيقىسىن ءتورت ءبولىپ كورەتىن ۋەفا چەمپيوندار ليگاسى دەگەن تۋرنير بار. ەكى ايلىق ۇزىلىستەن كەيىن بۇل دودا وسى اپتادا قايتا جالعاستى.
چەمپيوندار ليگاسىنىڭ 2016/17 جىلعى ماۋسىمىنىڭ توپتىق كەزەڭى وتكەن جىلدىڭ جەلتوقسان ايىندا اياقتالعان ەدى. وسى اپتادا پلەي-وفف باسەكەلەرى باستالدى. توپتان سۋىرىلىپ شىققان 16 مىقتى ءوزارا شيرەك فينالدىڭ جولداماسىن ساراپقا سالادى.
• كەستە بويىنشا بۇل اپتاعا 4 ويىن جوسپارلانعان. سەيسەنبى كۇنى فرانتسيا مەن يسپانيا چەمپيوندارى كەزدەستى. زلاتان يبراگيموۆيچ كەتكەن سوڭ, پاريج كومانداسى پسج السىرەپ قالعانداي كورىنگەن ەدى. الايدا, شۆەد سۇرمەرگەنىنىڭ ورنىن جوقتاتپايتىن فۋتبولشىلار از ەمەس ەكەن.
«پارك دە پرەنس» ستاديونىندا الاڭ يەلەرى «بارسەلونانى» قابىلداپ, 4:0 ەسەبىمەن جەڭىسكە جەتتى. ەسەپتى ءبىرىنشى تايمنىڭ ورتاسىندا ايىپ سوققىسىن ءدال ورىنداعان انحەل دي ماريا اشتى. ۇزىلىسكە دەيىن ماركو ۆەرراتتيدەن پاس العان نەمىس فۋتبولشىسى يۋليان دراكسلەر ەسەپتى ەسەلەي ءتۇستى. وسى كۇنى ءوزىنىڭ 29-شى تۋعان كۇنىن تويلاعان دي ماريا ەكىنشى تايمدا ءدۋبلدىڭ اۆتورى اتاندى. ماتچتاعى سوڭعى گولدى شابۋىلشى ەدينسون كاۆاني ءوز اتىنا جازدى.
توپتىق كەزەڭدە 10 دوپ سوققان ارگەنتينالىق سۋپەرجۇلدىز ليونەل مەسسيدى 21 جاستاعى فرانتسۋز قورعاۋشىسى پرەسنەل كيمپەمبە «تۇساپ» تاستادى. سونداي-اق, سۇرمەرگەن سۋارەس پەن دريبلينگتىڭ شەبەرى نەيمار دا الاڭنان باستارى سالبىراعان كۇيدە كەتتى.
قارىمتا ويىن 8 ناۋرىزدا «كامپ نوۋ» ستاديونىندا وتەدى.
• پورتۋگاليا استاناسى ليسسابونداعى «بەنفيكا» مەن «بورۋسسيا د» اراسىنداعى ويىن دا الاڭ يەلەرىنىڭ پايداسىنا شەشىلدى. ماتچتاعى جالعىز گولدى گرەكيالىق شابۋىلشى كوستاس ميتروگلۋ سوقتى. نەمىستەردىڭ تارازى باسىن تەڭەستىرەتىن مۇمكىندىگى بولعان. بىراق, پەر-ەمەريك وبامەيانگ 11-مەترلىك پەنالتيدەن ءمۇلت كەتتى. وسى ويىندا ەرەكشە كوزگە تۇسكەن «بەنفيكا» قاقپاشىسى ەدەرسونعا قانداي ماقتاۋ ايتسا دا جاراسادى.
• سارسەنبى كۇنى ءمادريدتىڭ «رەالى» ءوز الاڭىندا يتاليادان كەلگەن «ءناپوليدى» قابىلدادى. چەمپيوندار ليگاسىنىڭ قازىرگى جەڭىمپازى ءبىرىنشى بولىپ گول جىبەرىپ العانىمەن, ەسىن تەز جيىپ ۇلگەردى. الدىمەن 19-مينۋتتا بەنزەما تارازى باسىن تەڭەستىرسە, ءۇزىلىستەن كەيىن كروسس پەن كازەميرو مەرگەندىك تانىتتى. ءسويتىپ, «رەال» ءبىرىنشى كەزدەسۋدى ەكى دوپ ايىرماشىلىعىمەن اياقتادى. بۇل ماتچتا كازەميرو, رونالدۋ, بەنزەما, كروسس بەلسەندى وينادى.
• پسج سەكىلدى «باۆاريا» دا شيرەك فينالعا ءبىر تابان جاقىنداي ءتۇستى. بيىلعى جىلى تاعى دا «ارسەنالمەن» جولى تۇيىسكەن «نەمىس ماشيناسى» قارسىلاسىن اياعان جوق. بۇعان دەيىن ارسەن ۆەنگەر شاكىرتتەرى 1/8 فينالدا التى مارتە «ۇشىپ» كەتكەن. ونىڭ ىشىندە 2012/13 جانە 2013/14 جىلدارداعى ماۋسىمدا ءدال وسى «باۆارياعا» ەسە جىبەرىپ قويعان بولاتىن.
ويىنعا قىسقاشا توقتالاتىن بولساق, ءبىرىنشى تايم تەڭ اياقتالدى. روببەننىڭ گولىنا سانچەس ۇزىلىسكە دەيىن جاۋاپ قايتاردى. بىراق, ەكىنشى تايمدا گەرمانيا چەمپيونىن توقتاتۋ مۇمكىن بولمادى. تياگو الكانتارا دۋبل جاساسا, لەۆاندوۆسكي مەن ميۋللەر ءبىر-ءبىر گولدان سوقتى.
ەندى كەلەسى اپتادا تاعى 4 ويىن وتەدى:
«مانچەستەر سيتي» (انگليا) – «موناكو» (فرانتسيا);
«پورتۋ» (پورتۋگاليا) – «يۋۆەنتۋس» (يتاليا);
«بايەر» (گەرمانيا) – «اتلەتيكو» (يسپانيا);
«سەۆيليا» (يسپانيا) – «لەستەر» (انگليا).
ماتچتار ناتيجەلەرى:
پسج – «بارسەلونا» – 4:0
گولدار: دي ماريا, 18 (1:0). دراكسلەر, 40 (2:0). دي ماريا, 55 (3:0). كاۆاني, 72 (4:0).
«بەنفيكا» – «بورۋسسيا د» – 1:0
گول: ميتروگلۋ, 48 (1:0).
«رەال» – «ناپولي» – 3:1
گولدار: ينسينە, 8 (0:1). بەنزەما, 19 (1:1). كرووس, 49 (2:1). كازەميرو, 54 (3:1).
«باۆاريا» – «ارسەنال» – 5:1
گولدار: روببەن, 11 (1:0). سانچەس, 30 (1:1). لەۆاندوۆسكي, 53 (2:1). الكانتارا, 56, (3:1). الكانتارا, 63, (4:1). ميۋللەر, 88 (5:1).
دياس ەركەبۇلان,
جۋرناليست
استانا