تاۋەلسىزدىك تىزگىنى قولىمىزعا ءتيىپ, ەگەمەن ەل بولعان العاشقى كۇندەردەن باستاپ-اق ەلىمىزدە ءتىل ساياساتى مەملەكەت باسشىسى ن.نازارباەۆتىڭ تىكەلەي باسشىلىعىمەن ساليقالى دا سىندارلى تۇردە جۇزەگە اسىرىلۋدا.
ەلباسى جىل سايىنعى قازاقستان حالقىنا ارنايتىن ءداستۇرلى جولداۋلارىندا دا ءتىل ساياساتىنا, ونىڭ ىشىندە قوعامداعى مەملەكەتتىك ءتىلدىڭ مارتەبەسىن كوتەرۋ ماسەلەسىنە كوڭىل ءبولىپ وتىرادى.
ءبىلىم مەن عىلىم, ەكونوميكا, بيزنەس, جالپى, باسەكەلەستىك قارىشتاپ دامىپ وتىرعان بۇگىنگىدەي جاھاندانۋ كەزەڭىندە ەلباسى كورەگەندىك تانىتىپ, الدىمىزعا ءۇش ءتىلدى ءبىلۋ قاجەتتىگىن قويىپ وتىر. اسىرەسە, وسكەلەڭ ۇرپاق پەن جاستار الدىندا بىرنەشە ءتىل ءبىلۋ مىندەتى تۇر. مەملەكەت باسشىسىنىڭ 2007 جىلعى «جاڭا الەمدەگى جاڭا قازاقستان» اتتى قازاقستان حالقىنا ارناعان جولداۋىندا «ءۇشتۇعىرلى ءتىل» مادەني جوباسىن ۇسىنعان بولاتىن. ەلباسى ءوزىنىڭ وسى جولداۋىندا «قازاقستان بۇكىل الەمدە حالقى ءۇش ءتىلدى پايدالاناتىن جوعارى ءبىلىمدى ەل رەتىندە تانىلۋعا ءتيىس. بۇلار: قازاق ءتىلى – مەملەكەتتىك ءتىل, ورىس ءتىلى – ۇلتارالىق قاتىناس ءتىلى جانە اعىلشىن ءتىلى – جاھاندىق ەكونوميكاعا ويداعىداي كىرۋ ءتىلى», دەپ اتاپ كورسەتتى.
بۇل دەگەنىمىز, وقۋ ورىندارى الدىنا جاڭا مىندەتتەر, جاڭا تالاپ, جاڭا ماقساتتار قويىلىپ وتىر دەگەن ءسوز. نەگىزگى ماقسات – ومىردەن ءوز ورنىن تاڭداي الاتىن, ءوزارا قارىم-قاتىناستا ءوزىن ەركىن ۇستاپ, كەز كەلگەن ورتاعا تەز بەيىمدەلەتىن, بەلگىلى ءبىر عىلىم سالاسىندا ءبىلىمى مەن بىلىگىن كورسەتە الاتىن, كوپ ءتىلدى جانە كوپ مادەنيەتتى قۇزىرەتتىلىكتى يگەرگەن پوليمادەنيەتتى جەكە تۇلعا قالىپتاستىرۋ. سوندىقتان ءۇش ءتىلدى مەڭگەرۋ زامان تالابى دەپ ويلايمىن.
وتكەن تاريحىمىزعا ۇڭىلسەك, ۇلى عۇلاما ويشىل ءابۋ ناسىر ءال-فارابي ومىرىندە 76 ۇلتتىڭ ءتىلىن بىلسە, ۇلى اباي ورىس, قازاق تىلدەرىمەن قاتار پارسى, اراب تىلدەرىن مەڭگەرگەن. ءور رۋحتى داۋىلپاز اقىن ماحامبەت پەن قازاقتىڭ ءبىرتۋار ۇلى شوقان دا بىرنەشە ءتىل بىلسە كەرەك. قازاق ءتىلىنىڭ ەش ۋاقىتتا وزىمەن كورشىلەس حالىقتار تىلدەرىنەن كەنجە قالىپ, قاتاردان قالىپ ءومىر سۇرمەگەندىگى, ءوز ۇلەسىن ەشكىمگە بەرمەگەندىگى مىڭداعان جىل تاريحىنان ءمالىم. ولاي بولسا, نەگە ءبىزدىڭ ۇرپاعىمىز باياندى بولاشاق ءۇشىن وزگە ءتىلدى جەتىك مەڭگەرمەسكە؟!
كوپ تۇعىرلى ءبىلىم بەرۋ سالاسى قازىرگى تاڭدا اقش, رەسەي, ءۇندىستان, نيگەريا سياقتى ءجۇزدەگەن ۇلت پەن ۇلىس مەكەندەيتىن مەملەكەتتەردە كەڭىنەن قانات جايعان. وسىنداي الەمگە ءايگىلى, دامىعان مەملەكەتتەرمەن ءباسەكەگە قابىلەتتى بولۋ ءۇشىن ءتىلدى ءبىلۋ, قازاق ءتىلىن الەمگە ءايگىلى ەتۋ باستى ماقسات بولۋى كەرەك.
ءححى عاسىر – جاڭا تەحنولوگيالار مەن عىلىمنىڭ دامىعان زامانى. ءتىپتى ولارسىز ءومىردى كوزگە ەلەستەتە دە المايمىز. ال ءبىلىم بەرۋ سالاسىندا عىلىم مەن ءبىلىمنىڭ بىرگە جۇرەتىنى بەلگىلى. ولاي بولسا, عىلىمنىڭ دامۋىنداعى باستى قاعيدا – ءتىلدى ءبىلۋ.
ءۇش تۇعىرلى ءتىلدى مەڭگەرۋ قالتالى ازاماتتاردىڭ عانا ەمەس, قاراپايىم اۋىلداعى اعايىنداردىڭ دا بالالارىنىڭ سونداي مارتەبەگە قول جەتكىزۋىنە سەبەپشى بولماق.
«ءۇش ءتىلدى ءبىلىم بەرۋ – بولاشاققا باستار جول» دەمەكشى, ءۇش تۇعىرلى ءبىلىم بەرۋدىڭ ماڭىزى مەن العا قويعان ماقساتتارى دا وراسان زور. الەمدە دامىعان 30 ەلدىڭ قاتارىنا كىرۋ ماقساتىندا عىلىم, ءبىلىم, ءتىلىمىزدى دامىتىپ, جاڭا زامان تالابىنا ساي, باسەكەلەستىككە قابىلەتتى ەل بولۋىمىزعا اپاراتىن بىردەن-ءبىر جول دا وسى.
ءلاززات دوستىلەۋوۆا,
وپورنىي ورتا مەكتەبىنىڭ جاراتىلىستانۋ پاندەرى بىرلەستىگىنىڭ جەتەكشىسى
ماڭعىستاۋ وبلىسى,
بەينەۋ اۋدانى