جىمپيتىدا الاش تاريحىنا تىكەلەي قاتىستى ءۇش عيمارات بار, ولار: سالىنعانىنا 127 جىل بولعان مەشىت, قازاقتىڭ العاشقى دارىگەرلەرى داۋلەتشە كۇسەپقاليەۆ, باقتىعالي بيسەنوۆ, حالەل دوسمۇحامەد ۇلى قىزمەت ەتكەن اۋرۋحانا-لازارەتتىڭ ءبىر بولىگى جانە كۇنباتىس الاشوردا ۇكىمەتىنىڭ ەكى قاباتتى عيماراتى. بۇل عيماراتتار مەملەكەت قورعاۋىنا الىنعان.
الاشوردا ۇكىمەتى باتىس ءبولىمشەسىنىڭ توراعاسى جاھانشا دوسمۇحامەدوۆ پەن ارىپتەسى حالەل دوسمۇحامەدوۆتىڭ جۇمىس كەڭسەسى بولعان اتامان تاراكانوۆتىڭ ءۇيى سوۆەت كەزىندە دە بىردە نكۆد, اسكەري كوميسساريات, اۋداندىق مادەنيەت ءبولىمى جانە باسقا دا كەڭسە قىزمەتىن اتقاردى. تەك 2007 جىلى عيمارات كۇردەلى جوندەۋدەن ءوتىپ, سىرىم دات ۇلى اتىنداعى تاريحي-ولكەتانۋ مۋزەيىنىڭ بالانسىنا بەرىلگەن. بۇگىندە جەكە مۋزەي مارتەبەسى جوق, رەسمي تۇردە «الاش زالدارى» دەپ اتالاتىن بۇل عيماراتتا الاش قوزعالىسى تاريحىنا ارنالعان 400-دەي جادىگەر, قۇجاتتار, فوتوسۋرەتتەر ورنالاسقان.
– الاش قوزعالىسىنىڭ 100 جىلدىعىنا وراي بيىل اۋداندا ءىرىلى-ۇساقتى 25 شارا ۇيىمداستىرۋ جوسپارلانعان. ونىڭ ىشىندە «الاش جولىمەن» اتتى جىمپيتى-سەمەي باعىتىندا تاريحي-تانىمدىق ەكسپەديتسيا, ماسكەۋ قالاسىندا ج.دوسمۇحامەد ۇلى جەرلەنگەن دون زيراتىنا ەكسپەديتسيا, رەسپۋبليكالىق عىلىمي-تاجىريبەلىك كونفەرەنتسيا, «ازاتتىقتى اڭساعان الاش» دەرەكتى ءفيلمىنىڭ تۇساۋىن كەسۋ, اقىندار ءمۇشايراسىن وتكىزۋ سەكىلدى شارالار بار, – دەيدى سىرىم دات ۇلى اتىنداعى تاريحي-ولكەتانۋ مۋزەيىنىڭ ديرەكتورى ايناگۇل ويشىباەۆا.
جاقىندا باتىس قازاقستان وبلىسىنىڭ اكىمى التاي كولگىنوۆ الاشوردا مۇراجايىنا ارنايى كەلدى. مۇراجاي جادىگەرلەرىمەن تانىسقان ءوڭىر باسشىسى الاش قوزعالىسىنىڭ 100 جىلدىعى قارساڭىندا مۇراجاي عيماراتىن جاڭعىرتۋدان وتكىزۋ جايلى ۇسىنىستى بىردەن قولدادى. سالىنعانىنا 150 جىل بولعان عيماراتتىڭ قازىرگى جاعدايىنا ساراپتاما جاسالىپ, جاڭعىرتۋ جوسپارى, سمەتاسى بەكىتىلۋى ءتيىس.
بۇعان قوسا, سىرىم دات ۇلى اتىنداعى تاريحي-ولكەتانۋ مۋزەيىن دە جەكە عيماراتقا كوشىرۋ ماسەلەسى شەشىلىپ تۇر. ايناگۇل باقتىعۇلقىزىنىڭ ايتۋىنشا, مۋزەي قورىندا جالپى سانى 5 مىڭداي قۇندى جادىگەر بار ەكەن.
قازبەك قۇتتىمۇرات ۇلى, «ەگەمەن قازاقستان»
ورال