بيىل قازاقستان مەن گەرمانيا اراسىنداعى ديپلوماتيالىق قاتىناستاردىڭ ورناعانىنا 25 جىل تولدى. وسى داتاعا وراي, ەلىمىزدىڭ گەرمانياداعى توتەنشە جانە وكىلەتتى ەلشىسى بولات ءنۇسىپوۆ گەرمانيا فەدەراتيۆتىك رەسپۋبليكاسى سىرتقى ىستەر مينيسترلىگىنىڭ شىعىس ەۋروپا, كاۆكاز جانە ورتالىق ازيا ەلدەرى بويىنشا وكىلى اندرەاس پەشكەمەن كەزدەستى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
كەزدەسۋ بارىسىندا تاراپتار ەكى مەملەكەت باسشىلارىنىڭ ىنتا-ىقىلاسىنىڭ ارقاسىندا 25 جىل ىشىندە قازاقستان مەن گەرمانيا سەنىمدى ساياسي ۇنقاتىسۋعا قول جەتكىزىپ, ءوزارا ءتيىمدى ساۋدا-ەكونوميكالىق قاتىناستاردىڭ اياسىن كەڭەيتكەنى تۋرالى ايتتى. بۇگىنگى تاڭدا ەكى ەل اراسىنداعى قاتىناستار تابىستىلىعى شيكىزات پەن تەحنولوگيا سالاسىنداعى ءارىپتەستىكتە, قازاقستاندا دۋالدى ءبىلىم بەرۋدى دامىتۋ جونىندەگى «نازارباەۆ-مەركەل» باستاماسىندا, بەرلين ەۋرازيا كلۋبى جانە باسقا دا ەكىجاقتى جوبالاردا كورىنىس تاپقانى ءمالىم.
ديپلوماتيالىق قاتىناستاردىڭ مەرەيتويلىق داتاسىنا وراي جۇزدەسۋ قازاق-گەرمان بايلانىستارىنىڭ ستراتەگيالىق سيپاتقا يە ەكەندىگىن اڭعارتادى. دۇنيە جۇزىندە بولىپ جاتقان ماڭىزدى گەوساياسي وزگەرىستەر مەن جاھاندىق قارجى-ەكونوميكالىق داعدارىس كەزىندە قازاقستاننىڭ ايماقتاعى «تۇراقتىلىق زاكىرى» رەتىندەگى ءرولىنىڭ كۇشەيىپ كەلە جاتقانىن نازارعا الىپ, گەرمانيا تارابى قازاقستانمەن ارادا سىندارلى قاتىناستاردى ساقتاۋعا جانە نىعايتۋعا ماڭىز بەرىپ وتىر.
قازاقستان ەلشىسى وسى كەزدەسۋدە ا.پەشكەگە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ قازاق-گەرمان ديپلوماتيالىق قاتىناستارىنىڭ ورناعانىنا 25 جىل تولۋىنا وراي گەرمانيانىڭ فەدەرالدىق كانتسلەرى انگەلا مەركەلگە جولداعان قۇتتىقتاۋ سالەمىن جەتكىزدى. سونىمەن قاتار, ول گەرمانيالىق ديپلوماتتى قازاقستان پرەزيدەنتى ۇسىنعان كونستيتۋتسيالىق رەفورمالار تۋرالى حاباردار ەتىپ, مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى ەل حالقىنا ارناعان جولداۋىنىڭ نەگىزگى تۇستارىمەن تانىستىردى.