قازاقستاندىق كاسىپقوي بوكسشى قىز فيرۋزا ءشارىپوۆانىڭ مەنەدجەرى سەرگەي زاۆيلەيسكي كەلەسى جەكپە-جەك قاشان وتەتىنىن مالىمدەدى. بۇل تۋرالى allfight.ru حابارلادى.
«فيرۋزا 1 ءساۋىر كۇنى ماسكەۋدەگى «بوكس اكادەمياسىندا» كەزەكتى جەكپە-جەگىن وتكىزەدى. بۇل تيتۋلدى ايقاس بولۋى مۇمكىن. ازىرگە بۇل ماسەلە تولىق شەشىلمەدى. سەبەبى, بۇل جەردە كوپ نارسە قارجىعا كەلىپ تىرەلىپ تۇر. ەگەر دەمەۋشىلەرىمىز تابىلىپ جاتسا, تيتۋلدى كەزدەسۋ بولارى انىق. ەگەر ماقساتىمىز ورىندالماي جاتسا, 8 راۋندتان تۇراتىن رەيتينگتىك ۇرىس وتكىزەمىز. ال كەلەسى ايقاسىمىز مىندەتتى تۇردە تيتۋلدى بولادى. ۋاقىتىمىزدى جوعالتپاي, وسى كوكتەمدە العاشقى چەمپيوندىق بەلبەۋگە قول جەتكىزۋدى جوسپارلاپ وتىرمىز», – دەدى زاۆيلەيسكي.
«ءشارىپوۆانىڭ ايقاسىن رەسەيدىڭ «بوكس تۆ» جانە «بوەتس» ارنالارى كورسەتەدى. الداعى كۇندەرى قازاقستاندىق تەلەارنالارمەن كەلىسسوزدەر جۇرگىزەمىن. ماسەلەن, كىشى فلويد مەيۋەزەر ShowTime ارناسىمەن بىرلەسكەن بولسا, گولوۆكيننىڭ HBO-مەن كەلىسىمشارتى بار. مىنە, ءدال سولار سياقتى قازاقستاندىق بەلگىلى ءبىر كانالمەن كەلىسىم جاساۋدى جوسپارلاپ وتىرمىن. ەگەر ولار جەكپە-جەك ترانسلياتسياسىن ساتىپ الۋعا كەلىسسە, ءبىز بوكس كەشىن ۇيىمداستىرۋعا دايىنبىز», – دەدى مەنەدجەر.
«فيرۋزا قازىر جوعارى دەڭگەيدە دايىندالىپ ءجۇر. «بوكس اكادەمياسىنىڭ» باپكەرى سەرگەي كۋبىشەۆپەن تىڭعىلىقتى جاتتىعۋ جاساپ ءجۇر. دايىندىعىنا قاراپ كوپ ۇزاماي چەمپيون اتانادى دەگەن سەنىمىمىز بار. ول ءۇشىن ازداپ قارجىدان قينالىپ وتىرمىز. ال قالعانىنىڭ ءبارى بىزدە بار», – دەدى سەرگەي زاۆيلەيسكي.
ايتا كەتەيىك, قازاقستاندىق بىلعارى قولعاپ شەبەرى قازىرگى ۋاقىتتا ماسكەۋدە جاتتىعۋ جيىنىندا سەرگەي كۋبىشەۆپەن جاتتىعۋ جاساپ ءجۇر. سوڭعى ۇرىسىن 24 قىركۇيەك كۇنى الماتىدا سەربيا چەمپيونى ميلەنا ماتوۆيچپەن وتكىزىپ, ءۇشىنشى راۋندتا نوكاۋتپەن جەڭگەن.