«بىرىڭعاي جيناقتاۋشى زەينەتاقى قورى» اق-دا بىرقاتار وزگەرىستەر بولادى, دەپ حابارلايدى قازاقپارات قر ۇلتتىق بانكى توراعاسى دانيار اقىشەۆتىڭ سوزىنە سىلتەمە جاساي وتىرىپ.
«بجزق-داعى كەمشىلىكتەردى جويامىز, اقشانى پايدالانۋ بويىنشا ىشكى باقىلاۋ جۇيەسىن كۇشەيتەمىز. الايدا, ەڭ ماڭىزدىسى بار. قازىرگى كەزدە ادامدار اراسىندا جيناقتاۋ جۇيەسىنە دەگەن كۇمانمەن قاراۋ ماسەلەسى تۇر», - دەدى ۇلتتىق بانك توراعاسى.
«ينۆەستيتسيا سالۋ مودەلىن تاڭداۋدا باسەكەلەستىك پرينتسيپتەرىن قالپىنا كەلتىرگەندەي, زەينەتاقى اكتيۆتەرىن باسقارۋ ينستيتۋتتارىندا سولاي ەتۋ كەرەك. قازىر سالىمشىلار الدىندا تاڭداۋ جوق. زەينەتاقى جيناقتارى بجزق-عا اۋدارىلادى. زەينەتاقى قارجىلارىن باسقاراتىن ۇيىمدى تاڭداۋ جانە ينۆەستيتسيالىق ستراتەگيا تاڭداۋ مۇمكىندىك قاراستىرىلماعان. مەملەكەت سالىمشىلار ءۇشىن دە بارلىعىن ءوزى رەتتەپ, تاۋەكەلگە بارادى. سوندىقتان, ءبىز, زەينەتاقى اكتيۆتەرىن باسقارۋ فۋنكتسياسىن جەكە نەمەسە شەتەلدىك كومپانيالارعا بەرۋ تۋرالى ەلباسى تاپسىرماسىن جۇزەگە اسىرۋ بويىنشا بەلسەندى جۇمىس جۇرگىزىپ جاتىرمىز. ۇلتتىق بانك زەينەتاقى اكتيۆتەرى نارىعىندا باسەكەلەستىك بولۋىن, سالىمشىلارعا تاڭداۋ ۇسىنۋ ماسەلەسىن قولداعان. ءبىز وسى باعىتتا جۇمىس جاساپ جاتىرمىز», -دەدى د.اقىشەۆ.