سىر مارجانى شەتەلدە جوعارى سۇرانىسقا يە. بۇل تۋرالى قىزىلوردا وبلىسىنىڭ اكىمى قىرىمبەك كوشەرباەۆ تۇرعىندارمەن ەسەپتى كەزدەسۋىندە باياندادى.
اكىمنىڭ ايتۋىنشا, تۇراقتى دامۋ تەندەنتسياسى اگروونەركاسىپ سەكتورىندا دا بايقالادى. 2016 جىلى اۋىل شارۋاشىلىعى سالاسىندا نەگىزگى كاپيتالعا سالىنعان ينۆەستيتسيا كولەمى 2015 جىلمەن سالىستىرعاندا 2 ەسەدەن ارتىق ءوستى. بۇدان بولەك, تاۋەلسىزدىگىمىزدىڭ 25 جىلدىعى مەرەيلى مەرەكەسى قارساڭىندا سىر كۇرىششىلەرى ەل تاريحىندا كۇرىشتىڭ ءار گەكتارىنان 56 تسەنتنەر, ال, جەكەلەگەن شارۋاشىلىقتار 80 تسەنتنەرگە دەيىن ءونىم جيناپ, رەكوردتىق كورسەتكىشكە قول جەتكىزدى.
- سوڭعى 3 جىلدا كۇرىشتىڭ جالپى جيىنتىق ءونىمى ۇشتەن ءبىر بولىككە كوبەيدى (32 پايىز), بۇعان داقىل كولەمىن ۇلعايتۋدان ەمەس, قايتا كۇرىش سورتتارىنىڭ ونىمدىلىگىن ارتتىرۋ ەسەبىنەن قول جەتىپ وتىر. ءبىز وبلىس تاريحىندا العاش رەت اۋىل شارۋاشىلىعى ونىمدەرىن تاراتۋ نارىعىنا كەشەندى ماركەتينگتىك زەرتتەۋلەر جۇرگىزىپ جانە ونى اگرارلىق سەكتوردىڭ مۇمكىندىك الەۋەتتەرىمەن بايلانىستىردىق. وسى زەرتتەۋلەردىڭ نەگىزىندە وبلىستىڭ 2020 جىلعا دەيىنگى اگروونەركاسىپتىك كەشەنىن دامىتۋدىڭ اگروكارتاسى جاسالدى,- دەدى وبلىس اكىمى كەزدەسۋ بارىسىندا.
وبلىستا اۋىل شارۋاشىلىعىن دامىتۋدىڭ 2020 جىلعا دەيىنگى اگروكارتاسىندا نەگىزگى مىندەت رەتىندە ەكسپورتتىق الەۋەتتى ارتتىرۋ ايقىندالىپ, ونىمدەردى تاراتۋ نارىعىن كەڭەيتۋ ارقىلى پارسى شىعاناعى ەلدەرىنە (يران, بىرىككەن اراب امىرلىكتەرى), ورتالىق ازياعا (قىتاي) جانە شىعىس ەۋروپاعا شىعۋ كوزدەلگەن.
- العاشقى كەزەكتە ءبىز نەگىزگى داقىلىمىز كۇرىش ءۇشىن جاڭا نارىقتاردى يگەرە باستادىق. قازىر قىتايعا 20 مىڭ توننا كۇرىش جونەلتۋ بويىنشا كەلىسسوزدەر جۇرگىزىلۋدە, تۇركيا مەن انگلياعا كۇرىش وتكىزۋ ماسەلەلەرى قاراستىرىلۋدا. ەمبارگو الىنعاننان كەيىن بىزگە يراننىڭ ۇلكەن رىنوگىنا جول اشىلدى. بۇل مەملەكەت جىل سايىن 5 ملن تونناعا دەيىن كۇرىش تۇتىنادى, ونىڭ تەڭ جارتىسىن سىرتتان تاسىمالدايدى. وسى نارىقتى يگەرۋ ماقساتىندا 2016 جىلى يران ەلىندە ۇلكەن سۇرانىسقا يە «توروم حوشەمي» كۇرىش سورتىن تاجىريبەلىك نەگىزدە وسىردىك. يران كاسىپكەرلەرى بىزدەن كۇرىش ساتىپ الاتىن بولدى, ءتىپتى, ءوندىرىستى قارجىلاندىرۋعا ءازىر ەكەندەرىن ءبىلدىردى. بۇل جونىندە ءبىز 1 اقپاندا مازانداران پروۆينتسياسىنىڭ باسشىلىعىمەن بولعان كەزدەسۋ بارىسىندا كەلىسىمگە كەلدىك,- دەدى وبلىس اكىمى.