قازاقستاننىڭ ەڭبەك ەرى, اۋىلشارۋاشىلىق سالاسىنىڭ بىلگىر مامانى, «زەنچەنكو جانە ك» كومانديتتىك سەرىكتەستىگىنىڭ باس ديرەكتورى گەننادي يۆانوۆيچ زەنچەنكونىڭ ەلىمىزدىڭ قارىشتاپ دامۋىنا قوسقان ۇلەسى ولشەۋسىز. داڭعايىر ديقاننىڭ العا قويعان ارمان-ماقساتتارى كوپ بولاتىن. ونىڭ ءبىرى – جەلكىلدەپ ءوسىپ كەلە جاتقان جاستار ءۇشىن بىرەگەي سپورت كەشەنىن تۇرعىزۋ ەدى. سەرىكتەستىك ەسەبىنەن مول قاراجات قاراستىرىپ, قۇرىلىس جۇمىستارى باستالا بەرگەندە, اجال ارامىزدان بەيمەزگىل الىپ كەتتى. «ورنىندا بار وڭالار» دەگەن. ونىڭ ويىن شارۋاشىلىق ءتىزگىنىن ۇستاعان ۇلى گەننادي جۇزەگە اسىردى.
نوۆونيكولسك ەلدى مەكەنىندە دەنەشىنىقتىرۋ جانە ساۋىقتىرۋ كەشەنى بوي كوتەرىپ, اشىلۋ سالتاناتىنا وبلىس اكىمى ەرىك سۇلتانوۆ قاتىستى. زاماناۋي قۇرال-جابدىقتار ورناتىلعان مۇنداي كەشەن قالالىق جەرلەردە دە سيرەك كەزدەسەدى دەسەك, ارتىق ايتقاندىق ەمەس. ۆولەيبول مەن باسكەتبولعا ارنالعان الاڭدار, جاتتىعۋ زالى, ادىستەمەلىك, مەديتسينالىق كابينەتتەر, شەشىنەتىن, جۋىناتىن بولمەلەر, بيليارد زالى, 4 جولاقشاسى بار 25 مەترلىك باسسەين جۇمىس ىستەيدى.
– گەننادي يۆانوۆيچ تۇرعىنداردىڭ ءومىر ساپاسىن, دەنساۋلىعىن جاقسارتۋ ماسەلەسىن اركەز باستى نازاردا ۇستايتىن. الەۋمەتتىك ماسەلەلەرگە قارجى ايامايتىن. وسى عيماراتتى سالۋعا 240 ميلليون تەڭگە بولگىزدى, – دەدى ءوز سوزىندە ەرىك حامزا ۇلى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى,
قىزىلجار اۋدانى
سۋرەتتەردى تۇسىرگەن
ۆيتالي ۆلاسەنكو