قازاقستان پرەزيدەنتى نۇرسۇلتان نازارباەۆ كونستيتۋتسيالىق رەفورما جوباسىنىڭ بۇكىلحالىقتىق تالقىلاۋعا ۇسىنىلاتىنىن ايتتى.
«ءبىز ەشقاشان مەملەكەتتىك باسقارۋدىڭ ۇلگىلەرىن باسقالاردان كوشىرگەن ەمەسپىز. ءبىز حالىقارالىق تاجىريبەنى ەسكەرە وتىرىپ ءوزىمىزدىڭ تەڭدەسى جوق شەشىمدەرىمىزدى تاۋىپ وتىردىق.
ۇسىنىپ وتىرعان بۇل رەفورما ەڭ اۋەلى ءوز تاجىريبەمىزگە جانە قازاقستاننىڭ ءوز سۇرانىستارىنا سۇيەنەدى. ءبىز ايتىپ وتىرعان رەفورمالار باعدارلاماسى قازاقستان قاي باعىتتا داميدى دەگەن سۇراققا بەرەتىن جاۋابىمىز. جاۋاپ ايقىن جانە بۇرىننان بەلگىلى – قازاقستان دەموكراتيالىق دامۋ باعىتىن بەتكە ۇستايدى. مەن جاريا ەتىلەتىن كونستيتۋتسيالىق رەفورمانىڭ جوباسىن بۇكىل ەلدىڭ تالقىلاۋىنا ۇسىنۋدى ءجون كوردىم. ءتيىستى جارلىققا قول قويىلدى. مۇنىڭ ءبارى بەس ينستيتۋتسيونالدىق رەفورماعا جانە ەلدىڭ بولاشاق دامۋ جولىنا ساي كەلەدى. «اشىق ۇكىمەتتىڭ» بەسىنشى پۋنكتى وكىلەتتىكتەردى قايتا ءبولۋدى قاراستىرادى. بيلىكتىڭ بارلىق تارماقتارى ءتيىمدى جانە جاۋاپتى جۇمىس ىستەۋى ءۇشىن ولاردىڭ اراسىندا تەڭگەرۋ جانە تەڭشەۋ بولۋى ءتيىس» دەدى مەملەكەت باسشىسى.