بۇگىن وڭتۇستىك قازاقستان وبلىستىق ءماسليحاتىنىڭ كەزەكتەن تىس ونىنشى سەسسياسى ءوتتى. حالىق قالاۋلىلارىنىڭ 2017 جىلى وتكەن العاشقى جيىنىنىڭ كۇن تارتىبىندە 4 ماسەلە قارالىپ, ءبىر اۋىزدان بەكىتىلدى. جيىنعا وبلىس اكىمى ج.تۇيمەباەۆ, وبلىستىق ءماسليحات حاتشىسى ق.بالابيەۆ, وبلىستىق ءماسليحات دەپۋتاتتارى مەن باق وكىلدەرى قاتىستى. بۇل تۋرالى وقو اكىمىنىڭ ءبسپاسوز قىزمەتى حابارلادى.
جيىندا «2017-2019 جىلدارعا ارنالعان وبلىستىق بيۋدجەت تۋرالى» شەشىمىنە وزگەرىستەر مەن تولىقتىرۋلار ەنگىزۋ جايى قارالىپ, ناتيجەسىندە وبلىستىڭ 2017 جىلعى بيۋدجەتى 489,4 ملرد. تەڭگە بولىپ ناقتىلاندى. ونىڭ 84,4 ملرد. تەڭگەسى وبلىس قازىناسىنا رەسپۋبليكالىق بيۋدجەتتەن بولىنەتىن نىسانالى ترانسفەرتتەر مەن كرەديتتەر رەتىندە بەرىلىپ وتىر.
سەسسيادا ءسوز العان وبلىس اكىمى ەلباسى نۇرسۇلتان نازارباەۆتىڭ ەلىمىزدى دامىتۋ بويىنشا بەرگەن ناقتى تاپسىرمالارىن ورىنداۋ اياسىندا وسى جىلدىڭ قازىنا قارجىسى ءبىرىنشى كەزەكتە ءوڭىر حالقىنىڭ الەۋمەتتىك ماسەلەلەرىن شەشۋگە باعىتتالاتىنىن جەتكىزدى.
ناقتىراق ايتقاندا, ءبىلىم بەرۋ سالاسىنداعى 33 نىساننىڭ قۇرىلىسىن جۇرگىزۋگە 19,4 ملرد. تەڭگە, دەنساۋلىق ساقتاۋ سالاسىنداعى بىرقاتار اسا قاۋىپتى اۋرۋ تۇرلەرىن ەمدەۋگە ءدارى-دارمەكتەر الۋ ءۇشىن 39,6 ملرد. تەڭگە بولىنەدى.
بۇدان بولەك, ج.تۇيمەباەۆ الەۋمەتتىك قامسىزداندىرۋ سالاسىنا 8,6 ملرد. تەڭگە باعىتتالاتىنىن ايتىپ, «ورلەۋ» جوباسىنا 5,1 ملرد. تەڭگە بولىنەتىنىن ايتتى.
بيىلعى بيۋدجەت جوسپارىندا جىلۋمەن قامتاماسىز ەتۋ سالاسى مەن ينجەنەرلىك-كوممۋنيكاتسيالىق جۇيەلەردى رەتتەۋ, سۋمەن قامتاماسىز ەتۋ سالاسىن دامىتۋ, كارىز جۇيەلەرى, جولداردى قايتا قۇرۋ جۇمىستارى, اۋىل شارۋاشىلىعى تاۋار وندىرۋشىلەرىن مەملەكەتتىك قولداۋ جانە كاسىپكەرلىكتى دامىتۋعا جاردەمدەسۋ ءۇشىن كرەديت بەرۋ جۇمىستارى دا بار. سونداي-اق, بيىل «ديپلوممەن اۋىلعا» جوباسى اياسىندا 1,1 ملرد. تەڭگە باعىتتالىپ, 300 مامان باسپانالى بولادى دەپ جوسپارلانىپ وتىر.
سونىمەن بىرگە, سەسسيا وتىرىسىندا وڭىرىمىزگە ەڭبەگى سىڭگەن 25 ازاماتقا «وڭتۇستىك قازاقستان وبلىسىنىڭ قۇرمەتتى ازاماتى» اتاعىن بەرۋ تۋرالى ۇسىنىس جاپپاي قولداۋ تاپتى. سونداي-اق, مەملەكەتتىك قىزمەتكە اۋىسۋىنا بايلانىستى جەكە ارىزىن بەرگەن وبلىستىق ءماسليحاتتىڭ بۇگىندە ەكس-دەپۋتتارىنا اينالعان ب.جامالوۆ, م.ەگىزباەۆ, م.ورازاليەۆتەردىڭ دەپۋتاتتىق وكىلەتتىلىگى توقتاتىلدى.
كەزەكتەن تىس سەسسيا وتىرىسى بارىسىندا ءوز سالاسىندا ۇزدىك اتانعان بىرقاتار ازاماتتار «قر تاۋەلسىزدىگىنە 25 جىل» مەرەكەلىك مەدالىمەن ماراپاتتالىپ, وڭتۇستىك قازاقستان وبلىسىنىڭ قۇرمەت گراموتاسىمەن, وڭتۇستىك قازاقستان وبلىستىق ءماسليحاتىنىڭ گراموتاسىمەن ناگرادتالدى.