قوستاناي وبلىستىق ىشكى ىستەر دەپارتامەنتىنىڭ 2016 جىلعى جۇمىس قورىتىندىسى بويىنشا وتكەن كەڭەيتىلگەن ماجىلىستە وتكەن جىلى وبلىستا قىلمىستىڭ تىركەلۋى الدىڭعى جىلعا قاراعاندا 11,3 پايىزعا ازايعانىمەن, ۇرلىقتىڭ ءورشىپ تۇرعانى ايتىلدى.
كەڭەيتىلگەن ءماجىلىس جۇمىسىنا قاتىسقان ەلىمىزدىڭ ىشكى ىستەر ءمينيسترىنىڭ ورىنباسارى ەرلان تۇرعىمباەۆ جالپى قىلمىس قۇرىلىمىندا قوستاناي وبلىسىندا عانا ۇرلىق بىلتىر 63 پايىزعا كوبەيگەنىن ايتتى. ول جالپى ۇرلىقتى ازايتۋ, ونىمەن كۇرەستى كۇشەيتۋ ءۇشىن ەلىمىزدە جاسالىپ جاتقان جۇمىستاردان حاباردار ەتتى. قىمباتتاۋىنا بايلانىستى ۇيالى تەلەفوندار ۇرلىعى كوبەيىپ بارادى. ونىڭ ايتۋىنشا, ىشكى ىستەر مينيسترلىگى مەن ەلىمىزدەگى ۇيالى بايلانىس وپەراتورلارى اراسىندا ۇرلانعان ابونەنتتىك قۇرىلعىلاردى شەكتەۋ, ءوشىرىپ قويۋ تۋرالى بىرلەسىپ جۇمىس ىستەۋ جونىندە مەموراندۋمعا قول قويىلدى.
ەلباسى ەلىمىزدەگى بايلانىس تۋرالى زاڭعا وزگەرتۋلەر مەن تولىقتىرۋلار ەنگىزۋ تۋرالى زاڭعا قول قويدى. وندا كورسەتىلگەندەي, ەندى تەلەفونداردىڭ ابونەنتتىك نومەرلەرى IMEI-كود جانە ونىڭ يەسىنىڭ ين-ءى بويىنشا تەكسەرىلەتىن بولادى. ەگەر نومەرلەر سايكەس كەلمەسە, تەلەفون وشىرىلەدى. ونى ەشكىم دە پايدالانا المايدى. تۇرعىمباەۆتىڭ ايتۋىنشا, بۇل جۇرتتى بورىكتىرىپ, تەررورلىق جارىلىستار تۋرالى تەلەفونمەن وتىرىك اقپارات بەرەتىندەردەن قۇتىلۋعا دا سەپتىگىن تيگىزبەك.
سونىمەن قاتار قازىر لومباردتار دا ۇرىلاردىڭ اكەپ وتكىزگەن زاتتارىن قاراماي ساتاتىندىعى ايتىلدى. قالتاعا تۇسەتىندەرگە دە زارداپ شەگۋشىمەن تاتۋلاستىرۋ ارقىلى ءىسىن سوتقا جەتكىزبەي جۇمساقتىق تانىتىلادى. ءمينيستردىڭ ورىنباسارى الداعى ۋاقىتتا ۇرلىقتى قايتالاعاندار ءۇشىن زاڭدى قاتايتۋ جاعى قاراستىرىلاتىنىن دا ەسكە سالدى.
ءنازيرا جارىمبەتوۆا, «ەگەمەن قازاقستان»