قازاقستاندا سوڭعى جىلدارى حالىققا ارنايى قىزمەت كورسەتۋ ءۇشىن مەملەكەتپەن تارتىلعان ۇكىمەتتىك ەمەس ۇيىمداردىڭ سانى ارتتى. بۇل تۋرالى ۇەۇ-مەن ءوزارا ءىس-قيمىل ماسەلەلەرى جونىندەگى قر ۇكىمەتى وتىرىسى بارىسىندا قر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا مالىمدەدى. سونىمەن قاتار مينيستر ءوز ۆەدومستۆوسىنىڭ بىرقاتار باعىتتار بويىنشا ۇكىمەتتىك ەمەس سەكتورمەن ءوزارا ءىس-قيمىل جۇرگىزەتىنىن ايتىپ ءوتتى. ونىڭ ايتۋىنشا, ۇەۇ-لار كۇردەلى ءومىر جاعدايىنا تاپ بولعان ادامدارعا ارنايى كومەك كورسەتۋ ءۇشىن, ايتۆ/جيتس-ءتىڭ الدىن الۋ, تۋبەركۋلەزبەن كۇرەس جانە ت.ب. جاعدايلاردا كومەك كورسەتۋ ماقساتىندا جۇمىسقا تارتىلادى.
قازاقستاندا ارنايى الەۋمەتتىك قىزمەتتەر 2009 جىلدان باستاپ كورسەتىلەدى. وسى سەكتورداعى ۇەۇ مەن مەملەكەت ىنتىماقتاستىعىنا 7 جىلدام استام ۋاقىت بولدى جانە ول ومىرىندە قيىن جاعدايعا تاپ بولعان ازاماتتارعا تەڭ جاعداي جاساۋعا باعىتتالعان. وسى ارالىقتا ۇەۇ-دىڭ ارنايى الەۋمەتتىك قىزمەت كورسەتۋ نارىعىنا قاتىسۋى 2009 جىلمەن سالىستىرعاندا ايتارلىقتاي ءوستى, بيۋدجەتتىك قاراجات كولەمى مەن ارنايى قىزمەت كورسەتىلەتىن ادامداردىڭ سانى دا ارتتى.
مىسالعا, ينۆاتاكسي قىزمەتى 2014 جىلى ءبىرىنشى جانە ەكىنشى توپتاعى مۇگەدەكتەرگە قوزعالۋ قۇرالدارى ارقىلى قولداۋ كورسەتۋدىڭ قوسىمشا ءتاسىلى رەتىندە ەنگىزىلگەن بولاتىن. بۇل باستامانى مۇگەدەكتەردىڭ قوعامدىق بىرلەستىكتەرى ۇسىنعان ەدى. ولار ەلىمىزدىڭ 13 وڭىرىنە اتالعان قىزمەتتى ۇسىناتىن نەگىزگى جەتكىزۋشىلەر. بۇگىندە 180 ماشيناسىمەن اۆتوپاركى بار 13 ينۆاتاكسي قىزمەتى جۇمىس ىستەيدى.