«قازاقستان دامۋ بانكى» اق (قدب) («بايتەرەك» ۇلتتىق باسقارۋشى حولدينگى» اق ەنشىلەس ۇيىمى) شىمكەنت قالاسىندا «ا» ساناتىنداعى كولىك-لوگيستيكالىق ورتالىعىنىڭ قۇرىلىسىن («Continental Logistics Shymkent» جشس) قارجىلاندىرۋدى باستادى, دەپ حابارلايدى قازاقپارات.
قۇنى 15 ملرد 796 ملن تەڭگە بولاتىن جوبا شەكارا ماڭىنداعى وڭتۇستىك قازاقستان وبلىسىنىڭ تاۋار اعىنىن وڭدەۋ بويىنشا ينفراقۇرىلىمعا دەگەن ارتىپ وتىرعان قاجەتتىلىكتەرىنە باعدارلانعان. قدب تاراپىنان قارجىلاندىرۋ مەملەكەتتىك يندۋستريالدى-يننوۆاتسيالىق دامۋ باعدارلاماسىنىڭ ەكىنشى بەسجىلدىعى اياسىندا ۇسىنىلدى. 15 جىلعا دەيىنگى مەرزىمگە بەرىلگەن قارىز سوماسى 11,8 ملرد تەڭگەنى قۇرايدى.
35 گەكتار جەر ۋچاسكەسىندە سالىناتىن قۇرىلىستىڭ 24 783,6 شارشى مەترىنە قويمالار (قۇرعاق جانە كليماتتىق) سالىنادى. سونداي-اق كولىك-لوگيستيكالىق ورتالىقتا اكىمشىلىك كورپۋس, كونتەينەرلىك تەرمينال, كەدەندىك باقىلاۋ ايماعى (ۋاقىتشا ساقتاۋ قويماسى مەن كەدەندىك قويمالار) جانە ىلەسپە ينفراقۇرىلىمدار ورنالاساتىن بولادى. ءتۇرلى جۇكتەردى ساقتاۋ جانە قايتا وڭدەۋ بويىنشا وقو قاجەتتىلىگى 1 ميلليون شارشى مەتردى قۇرايدى. بۇل رەتتە, وڭىردەگى جۇك اينالىمى قارقىندى وسە تۇسۋدە: 2011 جىلى بۇل كورسەتكىش 111,1 ملن توننانى قۇراسا, 2012 جىلى - 123,8 ملن توننا, 2013 جىلى - 132,9 ملن توننا, 2014 جىلى - 145 ملن توننا, 2015 جىلى 154,6 ملن توننا بولدى.