ورتا سالماقتا WBA (Super), IBO, WBC جانە IBF نۇسقالارى بويىنشا الەم چەمپيونى گەننادي گولوۆكين (36-0, 33 كو) وسى سالماقتا WBO بەلبەۋىنىڭ يەگەرى بريتانيالىق بيللي دجو سوندەرسپەن (24-0, 12 كو) جەكپە-جەك وتكىزۋ جونىندە ورتاق ىمىراعا كەلدى. بۇل تۋرالى vesti.kz حابارلادى.
Boxing Legends TV ينتەرنەت ارناسىنىڭ مالىمەتى بويىنشا بۇل جازدا قازاقستاندا وتەدى. قوس بوكسشى بارلىق شارتقا كەلىسكەن كورىنەدى.
«بيللي دجو سوندەرسپەن گەننادي گولوۆكيننىڭ كەزدەسۋى جازدا قازاقستاندا وتەدى», – دەپ جازادى اتالعان ارنانىڭ تۋيتتەرى.
«قازاقستاندىق بوكسشى دجەيكوبسپەن جۇدىرىقتاسپاي جاتىپ (18 ناۋرىز نيۋ-يوركتە), بۇل ايقاس نە سەبەپتى قازىر حابارلاندى؟» دەگەن وقىرمان سۇراعىنا: «شاماسى, سوندەرس وسى جەكپە-جەكتىڭ جەڭىمپازىمەن كەزدەسەتىن بولار. الايدا, قوس تاراپ قازىردىڭ وزىندە بارلىق شارتقا (گونورارى, وتەتىن ورنى) كەلىسىپ قويعان», دەپ جاۋاپ بەردى.
بۇعان دەيىن بريتان بوكسشىسى الداعى جوسپارلارى جايلى ءبولىسىپ, ءبىر-ەكى اپتانىڭ كولەمىندە ۇلكەن جەكپە-جەك جونىندە ۇسىنىس تۇسەتىنىن, ال پروموۋتەرى فرەنك ۋوررەن بۇل تيتۋلدى ايقاس بولاتىن سەنىممەن ايتقان.
گولوۆكيننىڭ جاتتىقتىرۋشىسى ابەل سانچەس شاكىرتىنىڭ 2017 جىلى ءتورت كەزدەسۋ وتكىزەتىنىن, ونىڭ ءبىرى ماۋسىم ايىندا قازاقستاندا ۇيىمداستىرىلاتىنىن مالىمدەگەن. بۇل ەكسپو-2017 كەزىندە استانادا ءوتۋى مۇمكىن.