پارلامەنت سەناتىنىڭ توراعاسى قاسىم-جومارت توقاەۆ كانادا پارلامەنتى قاۋىمدار پالاتاسى سىرتقى ىستەر جانە حالىقارالىق دامۋ جونىندەگى كوميتەتىنىڭ توراعاسى, «قازاقستان-كانادا» پارلامەنتارالىق ىنتىماقتاستىق توبىنىڭ تەڭ توراعاسى روبەرت نولت باستاعان پارلامەنتتىك دەلەگاتسيانى قابىلدادى. بۇل تۋرالى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى حابارلادى.
ق.توقاەۆ اتاپ وتكەندەي, قازاقستان مەن كانادانىڭ ديپلوماتيالىق قاتىناستار ورناتقان 25 جىل بويى پرەزيدەنت نۇرسۇلتان نازارباەۆ كانادامەن ءوزارا ءتيىمدى جان-جاقتى ىنتىماقتاستىقتى دامىتۋعا, جوعارى تەحنولوگيالىق بىرلەسكەن ءوندىرىستەردى قۇرۋعا, ساۋدا-ينۆەستيتسيالىق بايلانىستاردى ورىستەتۋگە باسا نازار اۋدارىپ كەلەدى. سەنات توراعاسى كانادالىق دەپۋتاتتاردى استانادا وتەتىن ەكسپو-2017 حالىق-
ارالىق كورمەسىنە شاقىردى.
ق.توقاەۆ ەقىۇ پارلامەنتتىك اسسامبلەياسى اياسىنداعى قازاقستان مەن كانادا پارلامەنتشىلەرىنىڭ سىندارلى ىنتىماقتاستىعىن اتاپ ءوتتى. ول كانادالىق دەپۋتاتتاردىڭ استاناعا ساپارى ەكىجاقتى پارلامەنتارالىق ۇنقاتىسۋعا جاڭا سەرپىن بەرەتىنىنە سەنىم ارتاتىنىن جەتكىزدى. جۇزدەسۋشىلەر حالىقارالىق سالاداعى ماڭىزدى ماسەلەلەر, ولاردىڭ ىشىندە سيرياداعى جاعداي تۋرالى پىكىر الماستى.
ر.نولتتىڭ پىكىرىنشە, قازاقستان كانادانىڭ جاقىن دوسى بولىپ تابىلادى, ەكى ەلدىڭ ورتاق جاقتارى كوپ, ونىڭ ىشىندە كليماتى مەن گەوگرافياسىنىڭ دا ۇقساستىقتارى بار. كانادا پارلامەنتشىلەرى قازاقستانمەن ىنتىماقتاستىقتى نىعايتۋدا ناتيجەلى ءرول اتقارعىسى كەلەدى. دەپۋتاتتار قازاقستان تاۋەلسىزدىگىنىڭ 25 جىلىنداعى تاماشا جەتىستىكتەرىن اتاپ ءوتتى. پارلامەنتشىلەر ءبىزدىڭ ەلىمىزگە الداعى ەكى جىلدا بۇۇ قاۋىپسىزدىك كەڭەسىندەگى تۇراقتى ەمەس مۇشەسى قىزمەتىندە جەمىستى جۇمىس اتقارۋىنا تىلەكتەستىگىن ايتا وتىرىپ, كۇردەلى حالىقارالىق ماسەلەلەردى شەشۋگە ەلەۋلى ۇلەس قوساتىنىنا سەنىم ءبىلدىردى.
سونداي-اق, سەنات توراعاسى گەرمانيانىڭ قازاقستانداعى ەلشىسى رولف مافاەلدى دە قابىلدادى. ق.توقاەۆ ديپلوماتتى ءبىزدىڭ ەلىمىزدەگى قىزمەتىنىڭ باستالۋىمەن قۇتتىقتادى جانە قازاقستان مەن گەرمانيانىڭ ىنتىماقتاستىعىن نىعايتۋداعى ماڭىزدى جۇمىسىندا تابىستى بولۋعا تىلەكتەستىگىن ءبىلدىردى.