بۇرناعى كۇنى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى باقىتجان ءابدىرايىم باستاعان ءبىر توپ ستۋدەنت قازاقستان رەسپۋبليكاسىنىڭ پرەزيدەنتتىگىنەن ۇمىتكەر مەلس ەلەۋسىزوۆپەن كەزدەستى.
تانىمال ەكولوگ مەلس ەلەۋسىزوۆتىڭ استاناداعى كوپتەگەن جوعارى وقۋ ورىندارىنىڭ ىشىنەن اتباسىن ارنايى ەۋرازيا ۇلتتىق ۋنيۆەرسيتەتىنە بۇرۋىندا ۇلكەن ءمان جاتىر. ونىڭ سەبەبىن دە ايتا كەتەيىك. سىرتتاي وقىتاتىن ءبولىمى جوق قازاقستانداعى جالعىز وقۋ ورنى بولىپ تابىلاتىن ۋنيۆەرسيتەتتە بۇگىندە ون مىڭعا جۋىق ستۋدەنت ءبىلىم الۋدا. ستۋدەنتتەردىڭ 75 پايىزى مەملەكەتتىك گرانت يەگەرلەرى. سونداي-اق, ۋنيۆەرسيتەت وتكەن جىلى الەمدەگى ەڭ ۇزدىك 500 ۋنيۆەرسيتەتتىڭ قۇرامىنا ەنگەن. بۇل جونىندە كەزدەسۋ بارىسىندا ءمالىم ەتكەن ۋنيۆەرسيتەت رەكتورى باقىتجان جارىلقاسىن ۇلى مەلس ەلەۋسىزوۆتىڭ قادامىنا ساتتىلىك تىلەدى.
سۇراق-جاۋاپ تۇرىندە وتكەن جيىن كانديداتتىڭ ساياسي تۇعىرناماسى مەن الەمدىك جانە ەكولوگيالىق ماسەلەلەرگە ارنالدى. سۇراق قويۋشىلاردان العاشقى بولىپ, ۋنيۆەرسيتەت رەكتورى ب.ءابدىرايىم ءسوز الدى. ول «تابيعات» ەكولوگيالىق وداعىنىڭ توراعاسىنا بىزدەگى اۋىز سۋ ماسەلەسىنىڭ كەزەك كۇتتىرمەيتىن ماسەلە ەكەندىگىن العا تارتىپ, ونىڭ شەشىلۋ جولدارىن, حالىققا ءتيىمدى بولاتىن جاقتارى جايلى ايتىپ بەرۋىن سۇرادى. وعان جاۋاپ رەتىندە مەلس حامزا ۇلى اۋىز سۋ ماسەلەسىنىڭ الدىن الۋ ءۇشىن ەڭ الدىمەن كەز كەلگەن ازامات سۋدى ۇنەمدەپ پايدالانۋ كەرەكتىگىن ايتا كەلە, كەرەمەت مىسال كەلتىردى. پالەستينا مەن يزرايل ەلدەرىندە مىناداي زاڭ قولدانىستا ەكەن. ايتالىق, اۋىز سۋدى ۇنەمدەۋ ماقساتىندا بۇل ەلدەردە ءاربىر ازامات كۇنىنە كوپ دەگەننىڭ وزىندە 20 ليتر سۋ جۇمسايتىن كورىنەدى. سونداي-اق, وسى ساۋال ءتوڭىرەگىندە مەلس ەلەۋسىزوۆ: «اۋىز سۋدىڭ جۇمسالۋى ارتىپ, حالىق اراسىندا قاجەتتىلىك تۋدىراتىن بولسا, ول مۇنايدان دا قىمبات بولماق», – دەپ تۋراسىن ايتتى.
ستۋدەنتتەر تاراپىنان قويىلعان سۇراقتارعا م.ەلەۋسىزوۆ الەمدىك دەڭگەيدەگى تەمپەراتۋرانىڭ 0,5 گرادۋسقا جىلىنعانىن, ول ەگەر تاعى 3 گرادۋسقا جىلىناتىن بولسا, ادامزات ومىرىنە قاۋىپ توندىرەتىنىن ءمالىم ەتتى. الەمدىك دەڭگەيدەگى جىلۋدىڭ ارتىپ كەلە جاتقاندىعىن كۇندەلىكتى ومىردە ادام بالاسى سەزىنە بەرمەيتىندىگى, سونىڭ كەسىرىنەن جەر ءسىلكىنىستەرىنىڭ ارتىپ كەلە جاتقاندىعى سياقتى كوپشىلىك بىلە بەرمەيتىن كوپتەگەن ءمالىمەتتەر اشىق ايتىلدى. جانە دە ەكولوگيانى تازا ۇستاۋدىڭ ەڭ قاراپايىم ءارى ءتيىمدى ءادىسى اعاش وتىرعىزۋ ەكەندىگى دە وسى كەزدەسۋ بارىسىندا كەڭىنەن ءسوز بولدى.
بۇل كۇنگى كەزدەسۋدە ءتۇرلى ماماندىقتار بويىنشا ءبىلىم الىپ جاتقان ستۋدەنتتەر ساياسي تاقىرىپتارعا قوسا, ەكولوگيالىق ماسەلەلەر مەن ونىڭ شەشىلۋ جولدارى جايلى اقپاراتتارعا قانىقتى. سونىمەن بىرگە, كەزدەسۋدە قازاقستانداعى كاسپي جانە ارال تەڭىزدەرىنىڭ پروبلەمالارى دا قوزعالدى. جيىن سوڭىندا ۋنيۆەرسيتەت باسشىسى تانىمدىق نەگىزدەگى ءدارىس پەن ساياسي باعىتتاعى كوپتەگەن ساۋالدارعا جاۋاپ بەرگەنى ءۇشىن كانديدات م.ەلەۋسىزوۆكە ستۋدەنتتەر اتىنان العىس ءبىلدىردى.
جۇلدىز ءبايدىلدا.