ارۋجان ەسىمدى ءسابي شىمكەنتتە جارىلىس سالدارىنان وپىرىلىپ قۇلاعان ۇيدە بەسىكتىڭ ارقاسىندا ءتىرى قالدى, دەپ حابارلايدى otyrar.kz سايتى.
ءبىر جاسار قىز بالانى ءۇي قيراندىلارىنىڭ استىندا قالىپ قويۋ قاتەرىنەن بەسىك قۇتقارىپ قالعان. ال ۇيىندىلەردىڭ اراسىنان بەسىكتە جاتقان نارەستەنى ءبىرىنشى بولىپ كومەككە جەتكەن رۋسلان باحراموۆ الىپ شىققان.
الدىن الا بولجامعا سايكەس, ءۇي گاز-اۋا قوسپاسىنىڭ جارىلىسىنان قۇلاعان. جارىلىس كەزىندە بەسىكتىڭ ۇستىنە توبەنىڭ ۇلكەن ءبىر بولىگى تۇسكەن. بەسىك قاڭقاسىنىڭ جوعارعى بولىگى بالانى اۋىر جاراقاتتاردان ساقتاپ قالعان.
وقيعا ورنىنا جەتكەن جەدەل جاردەم قىزمەتى بالانى تەكسەرۋ ءۇشىن اۋرۋحاناعا جەتكىزدى. وكىنىشكە وراي, ارۋجاننىڭ اناسىن قۇتقارۋ مۇمكىن بولمادى. سابينا العان جاراقاتتارىنان كوز جۇمدى. شىمكەنتتىڭ جەدەل مەديتسينالىق كومەك اۋرۋحاناسىندا زارداپ شەككەن ءبىر ادام جاتىر, تاعى ءبىرى - كۇيىك ورتالىعىندا.
ەسكە سالايىق, 8 قاڭتاردا شامامەن ساعات 03:30-دا شىمكەنت قالاسىنداعى حالىقتار دوستىعى كوشەسىندە ورنالاسقان ەكى قاباتتى تۇرعىن ۇيدە گاز باللونى جارىلىپ, باسپانا وپىرىلىپ قۇلاعان بولاتىن.
اپات ورنىنا ءبىرىنشى بولىپ, جاقىن ماڭدا تۇراتىن قر ۇلتتىق ۇلانىنىڭ قىزمەتشىسى, ستارشينا رۋسلان باحراموۆ جەتتى.
وقىس وقيعادان 1988 جىلى تۋعان سابينا ورىنباەۆا قازا بولدى. تاعى ءتورت ادام زارداپ شەكتى: قارلىعاش اxانوۆا 1996 جىلى تۋعان (2 دارەجەلى كۇيىك جاراقاتى), ءاسيا ورىنباەۆا 1957 جىلى تۋعان (دەنە جاراقاتى), داۋرەن جۇماليەۆ 1985 جىلى تۋعان (دەنە جاراقاتى), ارۋجان داۋىلباي 2015 جىلى تۋعان (دەنە جاراقاتى).