1989-1997 جىلدارى يراننىڭ پرەزيدەنتى بولعان الي حاشەمي رافساندجاني 82 جاسىندا دۇنيەدەن ءوتتى, دەپ حابارلادى ۆۆس. وسى ەلدىڭ بۇقارالىق اقپارات قۇرالدارىنىڭ ايتۋىنشا, ول جۇرەك تالماسىنا ۇشىراعان. رافساندجاني ءوزى پرەزيدەنت بولعان ۋاقىتتا باتىسپەن قارىم-قاتىناستى نىعايتۋعا تىرىستى.
رافساندجاني ءومىرىنىڭ سوڭعى جىلدارى ساياسي ماقساتتىلىقتى انىقتاۋ كەڭەسىنىڭ باسشىسى بولدى. بۇل ۇيىم يراننىڭ ءبىرپالاتالى پارلامەنتى - ءماجىلىس پەن كونستيتۋتسيالىق سوت قىزمەتىن اتقاراتىن پارلامەنت قاراماعىنداعى ارنايى ورگان - كونستيتۋتسيا ساقشىلارى اراسىنداعى داۋلاردى شەشۋمەن اينالىسادى. قۇرامىنا 12 مۇشە كىرەتىن اتالعان كەڭەس 2013 جىلى رافساندجانيگە پرەزيدەنت سايلاۋىنا تۇسۋگە تىيىم سالعان بولاتىن. ال 2005, 2009 جىلدارى پرەزيدەنت سايلاۋىندا جەڭىلگەنىمەن, رافساندجاني ساياسي تۇلعا رەتىندە بەدەلىن ساقتاپ قالدى.
يران تەلەارنالارىنىڭ ايتۋىنشا, ول يرانداعى ازاماتتىق جانە ساياسي بوستاندىقتى جاقتاپ, ساياسي تۇتقىنداردى ازات ەتۋگە بار كۇشىن جۇمساعان.
رافساندجاني 1979 جىلى يسلام رەۆوليۋتسياسىنىڭ كوشباسشىسى - حومەينيدىڭ جاقىن سەرىكتەسى بولعان. يراكپەن سوعىس ۋاقىتىندا ەلدىڭ اسكەري قولباسشىلارىنىڭ قاتارىندا بولعان ول يران ەكونوميكاسى السىرەگەنىن العا تارتىپ حومەينيدى يراكپەن بەيبىت قارىم-قاتىناس ورناتۋعا كوندىرگەن.