الماتىلىق قۇقىق قورعاۋشىلار بايراقتى باسەكە الدىنداعى مىندەتتەرىنە كىرىستى. شارا اياسىندا قالا مەن وعان جاقىن ورنالاسقان ەلدى مەكەن تۇرعىندارى ەسەپكە الىندى. بەكىتىلگەن ءتارتىپ بويىنشا ساقشىلار كۇنىنە 40 ءۇيدى ارالاپ شىعادى, دەپ حابارلايدى 24.kz.
ساقشىلار ازاماتتاردى تەكسەرىپ, قاندايدا ءبىر قۇقىق بۇزۋشىلىققا قاتىسى جوق بولسا, ۇيلەرىنە قايتارادى. ۋنيۆەرسيادا الدىنداعى دايىندىق جۇمىستارىنا بايلانىستى جەرگىلىكتى پوليتسيا قىزمەتى تۇرعىنداردى تەكسەرىپ, تىزىمگە الۋدا. سونىمەن قاتار, ارنايى تاقتاعا تىزىمدەرى ىلىنگەن كۇدىكتىلەردى ۇستاۋ دا ساقشىلارعا جۇكتەلگەن مىندەتتىڭ ءبىرى.
الماتى قالاسىندا قازىر 1,5 ميلليوننان اسا حالىق بار. جيىرما بەسىنشى قاڭتارعا دەيىن سوزىلاتىن ەسەپكە الۋ شاراسى اياسىندا تۇرعىنداردىڭ بارلىعى قامتىلماق. ءار ساقشى كۇنىنە ورتا ەسەپپەن 40 ءۇيدىڭ ەسىگىن قاعىپ, سوندا تۇراتىنداردى تىزىمگە الۋدا.
«بۇگىن باستالعان تەكسەرىس بارىسىندا جەرگىلىكتى پوليتسيانىڭ پارتۋلدىك قىزمەتىمەن ەكى ازامات ۇستالدى. ولاردىڭ جەكە باسىن قۋالاندىراتىن قۇجاتتارى بولماعان. ولار قازىر اۋداندىق ىشكى ىستەر بولىمىنە جەتكىزىلىپ, جەكە باستارى انىقتالۋدا. رەيد الماتى وبلىسىنىڭ قالاعا جاپسارلاي ورنالاسقان اۋداندارىندا دا وتۋدە. باستى ماقسات - ۋنيۆەرسيادا الدىندا جانە بۇكىلالەمدىك سايىس كەزىندەگى قاۋىپسىزدىكتى كۇشەيتۋ»,-دەيدى اۋداندىق جەرگىلىكتى پوليتسيا باسشىسىنىڭ ورىنباسارى قۋان قۇتتىبەك.