پەتروپاۆلدا قالا كوشەلەرىن تازالاۋ بارىسىندا ءبىر اپتا ىشىندە 8 مىڭ تەكشە مەتردەن استام قار سىرتقا شىعارىلدى, دەپ حابارلايدى قازاقپارات.
قىس باستالماي جاتىپ, سقو-نىڭ ورتالىعىن قالىڭ قار باستى. ءبىر تاۋلىك ىشىندە ءبىر ايلىق نورماعا تەڭ قار تۇسكەن. اۋا رايىنىڭ اۋىتقۋىنان جۇرگىنشىلەر جۇرەتىن جولدا مۇز قاتپارلانىپ قالدى. قالانىڭ كوممۋنالدىق قىزمەتى قار شىعارۋدى ءالى توقتاتقان جوق. پەتروپاۆل اكىمدىگىنىڭ ءباسپاسوز قىزمەتى حابارلاعانىنداي, قار جيناۋ كەشكە 21:00-دە باستالادى.
«قار شىعارۋ جۇمىستارى 7 قاراشادا باستالعان بولاتىن. بۇگىنگى ۋاقىتتا 8 مىڭ تەكشە مەتر قار شىعارىلىپ ۇلگەردى. كۇن سايىن اتالمىش جۇمىستارعا 50 ارنايى تەحنيكا جۇمىلدىرىلعان», - دەپ حابارلادى ءباسپاسوز قىزمەتىنەن.
باس مەردىگەر - «سۋ 808» كومپانياسى. قوسىمشا 5 ۇيىم - قوسالقى مەردىگەر. «سۋ 808», «نورد جولدارى», «كوممۋنسترويسەرۆيس», «كوممۋنحوز-پەتروپاۆلوۆسك» بازاسىندا 3,5 مىڭ تەكشە مەتر تۇزدى توپىراق دايىندالدى. وسى ارالىقتا مۇزتايعاقپەن كۇرەسۋ ءۇشىن 650 تەكشە مەتر توپىراق جولعا شاشىلدى.
قازان ايىندا سقو اكىمى قىسقى مەرزىمگە تەحنيكانىڭ دايىندىعىن ءبىر پىسىقتاپ شىققان بولاتىن. ول كەزدە «سۋ-808» جشس ديرەكتورى ۆياچەسلاۆ ستارۋحين ايماق باسشىسىنا تەحنيكا قىسقى ماۋسىمعا تولىقتاي دايىن تۇرعانىن حابارلاعان. دەگەنمەن قازىرگى ۋاقىتتا قىس ءوز قاھارىنا مىنبەي جاتىپ, كوممۋنالدىق قىزمەتتىڭ قار تازالاۋداعى سىلبىر جۇمىسىنا قاتىستى سىندار الەۋمەتتىك جەلىدە قاپتاپ كەتتى. پەتروپاۆلدىقتار اسىرەسە, تروتۋارلارداعى مۇزتايعاققا قاتىستى كوپ شاعىمدانۋدا. كەيبىرى ءتىپتى قالادا فلەشموب ۇيىمداستىرىپ, تروتۋارلارعا توپىراق شاشۋدى ۇسىنۋدا.