قاراعاندىدا «ارسەلورميتتال تەمىرتاۋ» اق كومىر دەپارتامەنتىنە قاراستى «ساران» شاحتاسىندا توتەنشە وقيعا ورىن الدى. اپات سالدارىنان كاسىپورىننىڭ ءتورت بىردەي جۇمىسشىسى قازا بولىپ, بەسەۋى ءتۇرلى جاراقاتتارمەن اۋرۋحاناعا ءتۇستى.
الدىڭگۇنى قازا بولعان كەنشىلەر مۇرات نۇرماعامبەتوۆ, مەيرام جانىسباەۆ, ەدۋارد لەسنيكوۆ جانە ميحايل ءپاتيننىڭ مۇردەلەرى جەر قوينىنا بەرىلدى. مارقۇمداردىڭ ءبارىنىڭ دە ارتىندا بالا-شاعالارى قالدى.
الدىن-الا بەلگىلى بولعان دەرەكتەرگە سايكەس, شاحتاداعى كەزەكتى اۋىسىمدى جەر بەتىنە شىعارىپ كەلە جاتقان تىركەمە ارباشانىڭ تەمىر ارقانى ءۇزىلىپ كەتىپ, جۇمىسشىلار 200 مەتر بيىكتىكتەن تومەن قاراي قۇلاعان.
قازىرگى تاڭدا وسى توتەنشە وقيعاعا قاتىستى قر قىلمىستىق كودەكسىنىڭ 156-باپ, 4-تارماقشاسى – «ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان ءىس-ارەكەت» بويىنشا قىلمىستىق ءىس قوزعالىپ, تەرگەۋ-تەكسەرۋ امالدارى جۇرگىزىلىپ جاتىر.
قايعىلى وقيعانىڭ ءىزىن الا قاراعاندى وبلىسىنىڭ اكىمى نۇرمۇحامبەت ابدىبەكوۆ قازا بولعان كەنشىلەردىڭ قارالى وتباسىلارىنا بارىپ, كوڭىل ايتتى.
«سىزدەردىڭ قايعىلارىڭىزعا ورتاقتاساتىن ءسوزدى تابۋدىڭ ءوزى اۋىر. بۇل ورنى تولماس قازا, ايتىپ-جەتكىزگىسىز قايعى. مارقۇمدار تۋرالى جارقىن ەستەلىكتەر ارقاشاندا اجالدان جوعارى تۇرماق. سىزدەرمەن ارقاشاندا بىرگەمىز جانە شىن جۇرەكتەن قايعىرىپ كوڭىل ايتامىز», دەدى ءوڭىر باسشىسى.
«ساران» شاحتاسىنداعى قايعىلى وقيعانىڭ سەبەپ-سالدارىن انىقتاۋ بويىنشا جۇرگىزىلىپ جاتقان تەكسەرۋ جۇمىستارى ەلىمىزدىڭ پرەمەر-ءمينيسترى باقىتجان ساعىنتاەۆتىڭ تىكەلەي باقىلاۋىنا الىندى.
قايرات ءابىلدينوۆ