شانحاي ەركىن ساۋدا ايماعىندا شانحاي قالاسىن ەت, بالىق جانە تاماق ونىمدەرىمەن قامتاماسىز ەتۋشى «لينحاي» كورپوراتسياسىنىڭ ءىرى ورتالىعى قۇرىلدى. وسى ورتالىق ايماعىندا العاش رەت «قازاقستان» ساۋدا ورتالىعى اشىلدى.
«لينحاي» اۋىلشارۋاشىلىق ونىمدەرى ورتالىعىنىڭ اشىلۋى سالتاناتىندا قازاقستان رەسپۋبليكاسىنىڭ باس كونسۋلى جوشىحان قىراۋباەۆ قاتىستى. جيىنعا شانحاي قالاسىنىڭ جانە قىتايدىڭ وڭتۇستىك وڭىرلەرىنەن تاماق ءونىمىن ساتۋشى ءىرى كومپانيا باسشىلارى, جەرگىلىكتى ۇكىمەت پەن بانك وكىلدەرى, شەتەلدىك باس كونسۋلدار, لوگيستيكالىق كومپانيا باسشىلارى جينالدى. ءىس-شارا بارىسىندا ەركىن ساۋدا ايماعى مەن «لينحاي» ساۋدا ورتالىعى باسشىلىعى, قازاقستان باس كونسۋلدىعى اراسىندا قازاقستاندىق تاۋارلاردى قىتاي نارىعىنا شىعارۋ تۋرالى ءوزارا تۇسىنىستىك مەموراندۋمى قابىلداندى.
«ەكولوگيالىق تازا ەت, ءسۇت, بالىق ونىمدەرىن ساتىپ الۋعا دايىنبىز. ەكى مەملەكەت اراسىندا كەلىسىمشارت قانشالىقتى تەز جۇزەگە اسسا, سوعۇرلىم تەز جۇمىستى باستاپ كەتەمىز. ورگانيكالىق ونىمدەردىڭ ءدامىن ءبىر تاتقان تۇتىنۋشىلار ءۇشىن قازاقستاندىق تاعامدار ۇنەمى سۇرانىسقا يە. سوندىقتان, كەلەشەكتە ءبىز ەكونوميكالىق بايلانىستى ودان ءارى تەرەڭدەتە تۇسپەكپىز» - دەيدى «لينحاي» كورپوراتسياسىنىڭ باسشىسى چيان بينگان.
قازاقستاننىڭ قىتايداعى ەلشىلىگىنىڭ قولداۋىمەن, شانحايداعى قازاقستان باس كونسۋلدىعىنىڭ ۇيىمداستىرۋىمەن 2016 جىلدىڭ مامىر ايىندا يۆۋ قالاسىندا «استاۋ» ەكسپورت-يمپورتتىق كومپانياسى تىركەلگەن. بۇل كومپانيا قازاقستاندىق «سۇلتان», «كورونا», «تاس ساي», «ەفك», «الماتى ماي زاۋىتى», «راحات», «قارجاۋ» شق» سياقتى كومپانيالار مەن شارۋاشىلىقتاردان 46 ءتۇرلى تاۋار ءونىمىن قىتاي نارىعىنا رەسمي كىرگىزۋگە بولاتىن ارنايى رۇقسات قاعازىن الدى. «استاۋ» كومپانياسىنىڭ قۇرىلعانىنا از ۋاقىت وتسە دە شانحاي قالاسىنىڭ ەركىن ساۋدا ايماعىندا «لينحاي» اۋىلشارۋاشىق كورپوراتسياسى اراسىندا ارىپتەستىك ورنادى. ناتيجەسىندە, «لينحاي» كورپوراتسياسى قازاقستاندىق ونىمدەردى ەڭ ءىرى ساتىپ الۋشىعا اينالدى.
قازاقستان ساۋدا ورتالىعىنىڭ اشىلۋى وتاندىق تاماق وندىرۋشىلەرگە كورشىلەس ۇلكەن نارىققا جول اشىپ وتىر. بۇگىننىڭ وزىندە شانحاي قالاسى مەن چجەتسزيان, تسزيانسۋ پروۆينتسياسىندا ارىپتەستىك قاتىناس جاساۋدا. تەك وسى ءۇش ءوڭىردىڭ تۇرعىن سانىنىڭ ءوزى 200 ملن. استام ادامدى قۇرايدى. بۇل - ءوز ءوندىرىسىن دامىتىپ, حالىقارالىق دەڭگەيگە شىعامىن دەۋشىلەر ءۇشىن ۇلكەن مۇمكىندىك.