ورتالىق كوممۋنيكاتسيالار قىزمەتىنىڭ كەزەكتى بريفينگىندە ەلىمىزدەگى اۆتوكولىك نارىعىنىڭ قورىتىندىلارى ءسوز بولدى. «قازاقستاننىڭ «قازاۆتوونەركاسىپ» اۆتوكولىك سالاسى كاسىپورىندارى وداعى» زتب باسقارما توراعاسى ولەگ الفەروۆ جۋرناليستەرمەن كەزدەسۋدە سالاداعى قاڭتار-قىركۇيەك ايلارىنىڭ ناتيجەلەرىن اڭگىمەلەدى. ونىڭ ايتۋىنشا, اعىمداعى جىلدىڭ ءۇش توقسانىندا قازاقستاندىقتار 569 ملن دوللار سوماسىنداعى قاراجاتقا 30,8 مىڭ جاڭا جەڭىل اۆتوكولىك ساتىپ العان.
«2016 جىلدىڭ توعىز ايىندا رەسمي ديلەرلەر 30 759 جەڭىل جانە جەڭىل كوممەرتسيالىق كولىكتەردى ساتتى. بۇل كورسەتكىش وتكەن جىلمەن سالىستىرعاندا 59 پايىزعا تومەن. جىل باسىنان بەرى ساتىلعان 23 568 كولىك يمپورتقا تيەسىلى. بۇل جالپى ساتىلعان كولىكتەردىڭ 76 پايىزىن قۇرايدى. ال 7 154 ساتىپ الۋشى, ياعني 24 پايىزى قازاقستاندىق زاۋىتتاردىڭ ءونىمىن تاڭداعان», دەدى و.الفەروۆ.
جيىن بارىسىنان ۇققانىمىز, قازاقستاندا سۇرانىسقا يە كولىكتەردىڭ كوشىن «Lada» باستاپ تۇر ەكەن. جىل باسىنان بەرى ەل اۋماعىندا 6 086 رەسەيلىك كولىكتىڭ ماركاسى ساۋدالانىپتى. «Toyota» ديلەرلەرى دە بەلسەندى جۇمىس ىستەگەن, ولار 5 728 ءاۆتوموبيلدى پۇلداپ ۇلگەرگەن كورىنەدى. سونداي-اق, العاشقى ۇشتىككە «Renault» ەنىپ تۇر, بۇل ماركادان 2 925 ماشينا ساتىلعان ەكەن.
باسقارما توراعاسىنىڭ ءمالىمەتتەرىنە سۇيەنسەك, العاشقى وندىققا جوعارىداعىلارمەن قوسا «Hyundai», «KIA», «Volkswagen», «GAZ», «UAZ», «Nissan» جانە «Chevrolet» ەنىپ وتىر. «مودەلدەر اراسىندا ءبىرىنشى ورىندا «Lada Priora» تۇر. رەسەيلىك سەداندى 2 237 مىڭ ساتىپ الۋشى قالادى. سۇرانىسقا يە مودەلدەر ىشىندە «Toyota Camry», «Lada 4x4», «Renault Duster» جانە «Hyundai Accent» بار», دەدى و.الفەروۆ.
تاعى ايتا كەتەرلىگى, جەڭىل اۆتوكولىكتەردى, اسىرەسە, الماتى قالاسىنىڭ تۇرعىندارى كوبىرەك ساتىپ العان كورىنەدى. ولار 9281 تەمىر تۇلپاردىڭ ساۋداسىن كەلىستىرگەن. ودان كەيىنگى ورىندا استانالىقتار – 5333 كولىك ساتىپ العان, اتىراۋ قالاسىندا 2234 ماشينا پۇلدانسا, وسكەمەندە – 1656, قاراعاندىدا 1623 كولىك ساتىلىپتى.
بريفينگتە باسقارما توراعاسى «بيپەك اۆتو-ازيا اۆتو» حولدينگىنىڭ قازاقستان نارىعىندا ءىرى ديلەرلىك توپ مارتەبەسىنە يە بولعانىن جەتكىزدى. «ەسەپ بەرۋ كەزەڭىنىڭ ناتيجەلەرىن سارالاعاندا, بارلىق جەڭىل اۆتوكولىك ساتىپ الۋشىلاردىڭ 33 پايىزى وسى كومپانيانىڭ ۇسىنىستارىنا توقتاعانىن بايقادىق. نارىقتاعى ساۋدانىڭ 20,6 پايىزى «Toyota Motors Kazakhstan» ۇجىمىنا تيەسىلى. ال «Astana Motors» كومپانياسىنىڭ ۇلەسى 9,7 پايىزدى قۇرايدى», دەدى ولەگ الفەروۆ.
كولىك قۇراستىرۋ سالاسىنداعى ءۇش توقساننىڭ ناتيجەلەرىنەن ەلىمىزدىڭ اۋماعىندا 51,6 ملرد تەڭگە كولەمىندەگى قاراجاتقا 8333 اۆتوكولىك قۇرالىنىڭ شىعارىلعانىن بايقايمىز. تەك قانا قىركۇيەك ايىندا وتاندىق زاۋىتتار جالپى قۇنى 9,6 ملرد تەڭگەگە 1019 اۆتوكولىك قۇراستىرعان. مۇنىڭ قاتارىنا جۇك كولىكتەرى مەن اۆتوبۋستار دا كىرەدى. ال بۇل تسيفرلاردى وتكەن جىلمەن سالىستىرساق, كورسەتكىش ەداۋىر ارتقان.
اسحات رايقۇل,
«ەگەمەن قازاقستان»