قىرعىزستاننىڭ شولپان-اتا قالاسىندا ءىى دۇنيەجۇزىلىك كوشپەلىلەر ويىندارىنىڭ وتكەنىنە ءبىر ايدان استام ۋاقىت بولدى. ەندى ونىڭ قورىتىندىسىن وي ەلەگىنەن قايتا وتكىزىپ الاتىن كەز كەلدى. وسىعان وراي, ءبىز مادەنيەت جانە سپورت مينيسترلىگى سپورت جانە دەنەشىنىقتىرۋ ىستەرى كوميتەتى ۇلتتىق سپورت تۇرلەرى مەن سپورتتاعى مۇمكىندىگى شەكتەۋلى ادامدارمەن جۇمىس باسقارماسىنىڭ باسشىسى ماقسات قويشىباەۆپەن پىكىر الماسقان ەدىك.
– دۇنيەجۇزىلىك كوشپەلىلەر ويىندارىن جاقسى ءوتتى دەگەن پىكىر ايتىلىپ جاتىر. وزىڭىزگە جارىستى ۇيىمداستىرۋ نەسىمەن ۇنادى؟
– ۇيىمداستىرۋ جاعى جاقسى بولدى. قىرعىزستاندا جارىسقا ارنايى اتشابار مەن دەنەشىنىقتىرۋ كەشەنى سالىنىپتى. جولدارى دا ءبىراز جاقسارىپتى. ءبىزدىڭ دەلەگاتسيا ىستىقكولدەگى پانسيوناتتا ورنالاستى. سول جەردەن جارىستارعا بارىپ تۇردىق.
– قازاقستان قۇراماسىنىڭ دايىندىعى قانداي بولدى؟
– جارىسقا بىزدەن 95 سپورتشى قاتىستى. وندا سپورتشىلارىمىز 39 مەدال الدى. بۇلاردىڭ اراسىندا 13 التىن, 13 كۇمىس جانە 13 قولا جۇلدە بار. ال جارىسقا 63 مەملەكەتتەن وكىلدەر كەلگەنىن ەسكەرسەك, ەلىمىزدىڭ كوماندالىق ەسەپتە ءۇشىنشى ورىن الۋى جامان ناتيجە ەمەس دەپ ويلايمىن.
كوشپەلىلەر ويىندارىندا ەكى بالۋانىمىز قازاق كۇرەسىنەن, ەرلەر جانە ايەلدەر قۇراماسى توعىزقۇمالاقتان چەمپيون اتاندى. سونىمەن بىرگە, ەكى وتانداسىمىز اۋدارىسپاق پەن الىشتان, الامان بايگە, شايگى شابىس پەن توعىزقۇمالاقتان باس جۇلدەنى جەڭىپ الدى. ودان باسقا, بەس بالۋانىمىز قازاق كۇرەسىنەن, ۇشەۋى قىرعىز كۇرەسىنەن ءبىرىنشى ورىندى يەلەندى. الىشتان دا بالۋاندارىمىز جاقسى كۇرەستى. بۇل سىندا ءۇش كۇمىس جۇلدە الدى. ءبىزدىڭ ەرلەر جانە ايەلدەر قۇراماسى مانگالا ويىنىن جاقسى مەڭگەرىپ الىپتى. ولار زياتكەرلىك ويىننىڭ بۇل تۇرىنەن ەكىنشى ورىنعا يە بولدى. سول سياقتى اۋدارىسپاق, ماس-رەستيلينگ, گيۋلەش جانە الامان بايگەدە ءبىر-ءبىر مەدالدان الدىق. سپورتشىلارىمىز قولا جۇلدەلەردى دە نەگىزىنەن وسى سپورت تۇرلەرىنەن يەلەندى.
– كەلەسى دۇنيەجۇزىلىك كوشپەلىلەر ويىندارى 2018 جىلى وتەدى ەكەن. وعان قاتىساتىن وتانداستارىمىز كوبەيەتىن شىعار؟
– بۇل جارىس – ۇلكەن جوبا. ونى «كوشپەلىلەردىڭ وليمپياداسى» دەۋگە دە بولادى. ازىرگە كەلەسى ويىنداردىڭ قاي جەردە وتەتىنى بەلگىسىز. جارىستى قازاقستان, تۇركيا, ازەربايجان جانە قىرعىزستان ەلدەرىنىڭ بىرەۋى وتكىزۋى مۇمكىن. ءويتكەنى, وسى ەلدەردىڭ باسشىلارى مەموراندۋمعا قول قويعان بولاتىن. ال كەلەسى جىلى رەسەيدىڭ ۋليانوۆ وبلىسىندا تمد مەملەكەتتەرىنىڭ ۇلتتىق سپورت تۇرلەرىنىڭ فەستيۆالى وتەدى. وعان ءبىزدىڭ ەل دە قاتىسادى.
اڭگىمەلەسكەن
داستان كەنجالين,
«ەگەمەن قازاقستان»
استانا