سوزاق اۋدانىنىڭ ورتالىعى – شولاققورعان اۋىلىندا «ايشۋاق» بالاباقشاسى پايدالانۋعا بەرىلدى. 280 ورىندىق بالاباقشا «قازترانسويل» اكتسيونەرلىك قوعامىنىڭ دەمەۋشىلىگىمەن سالىندى.
بالالار مەكەمەسىنىڭ اشىلۋ سالتاناتىنا وبلىس اكىمىنىڭ ورىنباسارى جاقىپ بوكەنباەۆ پەن «قازترانسويل» اق باس ديرەكتورى ديماش دوسانوۆ قاتىسىپ, قۇتتىقتاۋ ءسوز سويلەدى.
3281 شارشى مەتردى قۇراعان قۇرىلىس اۋماعىنىڭ 1822 شارشى مەترىندە بالاباقشا ورنالاسقان. ال ونىڭ 1459 شارشى مەترى كوگالداندىرۋ الاڭىنا تيەسىلى.
– مەملەكەت باسشىسى نۇرسۇلتان نازارباەۆ ەلىمىزدىڭ نۇرلى بولاشاعى – بالالار ءۇشىن بارلىق جاعدايدى جاساپ كەلەدى, – دەدى «قازترانسويل» اق باسشىسى. – جاڭادان پايدالانۋعا بەرىلگەن عيمارات تا سونىڭ جارقىن ءبىر دالەلى. ەلىمىزدە بالالار الاڭسىز ءوسىپ, جاقسى تاربيە الۋ ءۇشىن ءبىز دە قولىمىزدان كەلگەن كومەگىمىزدى ايامايمىز. ونىڭ ۇستىنە بالاباقشانىڭ اشىلۋى ەل تاۋەلسىزدىگىنىڭ 25 جىلدىعىمەن تۇسپا-تۇس كەلىپ وتىر. سوندىقتان بارشاڭىزدى ەڭ ۇلكەن مەرەكەمەن قۇتتىقتايمىز.
سوزاق – وڭتۇستىكتىڭ سارىارقامەن قويىنداسىپ جاتقان ءبىر پۇشپاعى. سوندىقتان دا ەل اۋىزىندا تەرىسكەي دەپ اتالادى. بيىل مۇندا ءتورت بالاباقشا اشىلعان. جىل سوڭىنا دەيىن تاعى ۇشەۋى اشىلادى دەپ كۇتىلۋدە. سوندا مۇنداعى بالالاردىڭ باقشامەن قامتىلۋى 88,8 پايىزعا جەتپەك.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى