كەشە ورتالىق كوممۋنيكاتسيالار قىزمەتىندە جۋرناليستەر «حابار» اگەنتتىگى» اق الداعى ۋاقىتتا قانداي جاڭالىقتار اكەلەتىندىگىمەن تانىستى.
بۇل تۋرالى جۋرناليستەرگە اكتسيونەرلىك قوعامنىڭ جاڭادان تاعايىندالعان باسقارما ءتورايىمى الماگۇل احمەتجانوۆا, ونىڭ ورىنباسارى رينات كەرتاەۆ, «حابار24» ارناسىنىڭ ديرەكتورى ارمان سەيىتمامىت, «كazakhTV» ارناسىنىڭ ديرەكتورى اندرەي تاراكوۆ ايتىپ بەردى.
مينيسترلىكتىڭ تاپسىرماسىنا سايكەس, ءبىز ترانسفورماتسيا جاساۋعا كىرىسىپ وتىرمىز. ول 2020 جىلعى مەرزىمگە ەسەپتەلگەن. وسى ارالىقتا قانداي شارۋالار اتقاراتىنىمىز ءجونىندە كوپتەگەن الەۋمەتتىك زەرتتەۋلەر جۇرگىزدىك جانە كومپانيا جۇمىسىن تولىعىمەن ساراپتان وتكىزدىك. سونىڭ ناتيجەسىندە تارالىم ساياساتى مەن ىشكى بيزنەس ۇدەرىسىن ترانسفورماتسيالاۋعا مۇمكىندىك تۋدى, دەپ باستادى ءوزىنىڭ ءسوزىن ا.احمەتجانوۆا. سونىڭ ىشىندە «حابار» ءوز ماماندارىن شەتەلدە وقىتىپ الۋعا قاتتى كوڭىل بولەتىندىگى بەلگىلى بولدى. 2016 جىلى عانا 500-دەي جۋرناليست پەن باسقا دا ماماندار شەتەلدە بىلىمدەرىن جەتىلدىرىپتى. قازىر تۇرىك تەلەكومپانياسىندا 150-دەي ادامدى وقىتىپ الۋ جونىندە كەلىسىمشارتقا قول قويىلۋ ۇستىندە ەكەن.
«حابار» ءوزىنىڭ 21-ءشى ماۋسىمىنا قانداي جاڭالىقتارمەن كەلىپ وتىرعاندىعى تۋرالى باسقارما توراعاسىنىڭ ورىنباسارى رينات كەرتاەۆ تولىعىراق ايتىپ بەردى. جاڭا ماۋسىمعا ءبىز بىرنەشە تۇساۋكەسەردى دايىنداپ وتىرمىز. تاڭەرتەڭگى جانە كۇندىزگى جاڭالىقتار شىعارىلىمى جابىلىپ, ونىڭ ورنىنا كەشكى ساعات 19.00-دە قازاق تىلىندە, 21.00-دە ورىس تىلىندە كۇنىنە ءبىر رەت قانا قورىتىندى جاڭالىقتار 1 قىركۇيەكتەن باستاپ شىعىپ تۇر, دەدى ول ءوزىنىڭ سوزىندە. ولاردىڭ باستى ەرەكشەلىگى سول, ەندى جاڭالىقتاردى اقپاراتتىق-شوۋ جانرىندا بەرۋ قولعا الىنعان. ءبىر كۇننىڭ باستى جاڭالىقتارى ساراپشى-جۋرناليستەر تاراپىنان تەرەڭ زەرتتەلىپ, ءتۇرلى ۇستانىمدار مەن پىكىرلەر بەرۋ ارقىلى كورەرمەنگە ابدەن تانىستىرىلادى ەكەن.
سونىمەن قاتار, بۇرىنعى «7 كۇن», «بەتپە-بەت», «بيۋرو راسسلەدوۆانيە» سياقتى حابارلار جاڭا پىشىندە, دەكوراتسيالىق بەزەندىرۋلەرى دە وزگەرىپ ۇسىنىلىپ جاتقان كورىنەدى.
جاڭا ماۋسىمدا الەۋمەتتىك باعدارلامالارعا ەرەكشە باسىمدىق بەرىلگەن. سونىڭ ءىشىندە «ءبىزدىڭ نازاردا» دەگەن جوبا قولعا الىنىپتى. وندا كەز كەلگەن الەۋمەتتىك-تۇرمىستىق ماسەلەلەر رەسپۋبليكاداعى ءتىلشىلەر قوسىنى پايدالانىلا وتىرىپ, قوعامدىق كوزقاراس تۇرعىسىنان زەرتتەپ, كورەرمەن نازارىنا ۇسىنىلادى. بۇل «كتك», «ورت-كازاحستان» ارنالارىندا بۇرىننان بار تاجىريبە بولسا, ەندى «حابار» اگەنتتىگى دە سونداي ءادىستى قولدانا باستاپتى.
رينات كەرتاەۆتىڭ ايتۋىنا قاراعاندا, «حاباردا» جاڭادان قولعا الىنعان «ءبىلۋ ماڭىزدى» اتتى جوبا دا بار ەكەن. مۇندا حالىققا قاجەتتى زاڭدار مەن نورماتيۆتىك-قۇقىقتىق اكتىلەر مامانداردىڭ قاتىسۋىمەن تۇسىندىرىلمەك ەكەن. سونداي-اق, الەۋمەتتىك توك-شوۋلار تۇرلەنىپ, جاڭا پىشىممەن شىعادى. سونىڭ ىشىندە «ءبىزدىڭ ءۇي» توك-شوۋى دا بار, سونداي-اق «داۆايتە گوۆوريت» دەگەن جاڭا توك-شوۋ ەكرانعا شىعاتىن بولادى, دەدى ر.كەرتاەۆ. بۇلاردىڭ ءبىر ارتىقشىلىعى – ولار تىكەلەي ەفيردە شىعىپ, حالىقپەن تەلەفون نەمەسە باسقا دا بايلانىس قۇرالدارى ارقىلى حابارلاسۋعا مۇمكىندىك بولادى.
ءباسپاسوز كونفەرەنتسياسىنا قاتىسقان «حابار24» ارناسى مەن «قازاق تۆ» ارنالارىنىڭ ديرەكتورلارى ا.سەيىتمامىت پەن ا.تاراكوۆ تا وزدەرىندە بولاتىن جاڭالىقتارمەن تانىستىردى. ايتا كەتەتىن جايت, بۇرىنعى «24 KZ» ەندى «حابار 24» بولىپ, ال بۇرىنعى «ءبىلىم جانە مادەنيەت» ارناسى «قازاق تۆ» ارناسىمەن بىرىگىپ شىعاتىن بولىپتى. اتى وزگەرگەننەن زاتى دا جاقسىعا وزگەرىپ جاتسا قۇبا-قۇپ. بىراق ا.سەيىتمامىت «24 KZ» اتى وزگەرگەنىمەن, زاتى وزگەرمەيتىنىن ايتتى. ءبىز بۇرىن دا شىنايى جاڭالىقتاردى جەدەل ءتۇردە كورەرمەن نازارىنا ۇسىنىپ كەلگەن بولساق, بولاشاقتا دا سول ءداستۇرىمىزدى ودان ءارى جالعاستىرامىز. بارلىق وڭىرلەرىمىزدىڭ ماڭىزدى وقيعالارى تۋرالى كورەرمەندەردى دەر كەزىندە قۇلاعدار ەتىپ تۇرامىز. وعان ءبىزدىڭ تەحنيكالىق ءمۇمكىنشىلىكتەرىمىز تولىقتاي ساي, تىلشىلىك قوسىندارىمىز ءبۇگىنگى كۇننىڭ ەڭ جەتىلدىرىلگەن جابدىقتارىمەن قارۋلانعان, دەدى ا.سەيىتمامىت.
بريفينگتىڭ سوڭىنان قوناقتار جۋرناليستەردىڭ كوپتەگەن سۇراقتارىنا جاۋاپ بەردى.
جاقسىباي سامرات,
«ەگەمەن قازاقستان»