اقتوبەدەگى تاحاۋي احتانوۆ اتىنداعى وبلىستىق دراما تەاترىنىڭ قازاق ترۋپپاسى ەكسترەميزم تاقىرىبىنداعى قويىلىمدى العاش رەت ساحنالادى. وبلىس باسشىلىعىنىڭ ارنايى تاپسىرماسى بويىنشا تۇسىرىلگەن قويىلىم نەبارى ءبىر جارىم ايدىڭ ىشىندە دايىندالدى. قويىلىمنىڭ العاشقى كورسەتىلىمىنە وبلىس اكىمى بەردىبەك ساپارباەۆ كەلدى. سونداي-اق, وڭىردەگى ءدىن وكىلدەرى, تەولوگتار, يمامدار دا ارنايى شاقىرىلدى.
استاناداعى ق.قۋانىشباەۆ اتىنداعى قازاق اكادەميالىق مۋزىكالىق دراما تەاترىنىڭ رەپەرتۋارىنداعى «ەسىگىمدى قاققان كىم؟» قويىلىمىنىڭ اۆتورى جابال ەرعاليەۆ, رەجيسسەرى نۇرلان جۇمانيازوۆ.
قويىلىم ەكى بولىمنەن تۇرادى. ءبىرىنشى بولىمىندە ۇيىپ وتىرعان وتباسىنىڭ جالعىز قىزى مەن كۇيەۋ بالاسىنىڭ جات اعىمنىڭ جەتەگىندە كەتكەنى, ەكىنشى ءبولىمىندە ولاردىڭ سيرياداعى جاعدايى كورسەتىلەدى. كەمپىر مەن شالدىڭ كوزىنىڭ اعى مەن قاراسىنداي ءبىر ۇل, ءبىر قىزى بار. بويجەتكەن تۇرمىسقا شىعىسىمەن ۇيىنە كەلۋدى سيرەتىپ, تۋعان قىزىن اتا-اناسىنا تاستاپ كەتەدى. سودان, ۇزاق كۇتتىرىپ ءبىر كۇنى قىزى كەلەدى. ۇستىنە تۇتاستاي قارا كيىم كيگەن, كۇيەۋ بالاسى ساقالىن جىبەرىپ, قىسقا بالاقتى شالبار كيىپ العان ەكەن. قاسىندا جۇبان دەگەن كىسى بار. ەرلى-زايىپتىلار جۇباننىڭ ايتقانىنان شىقپايتىنى بىردەن بايقالادى.
اقىرى ولاردىڭ سيرياعا اتتانعانى, اقساقالدىڭ بۇل قاسىرەتتى كوتەرە الماي دۇنيەدەن ءوتكەنى, اداسقان وتباسىنىڭ جىراقتا كۇل-تالقانى شىققانى شىنايى كورسەتىلەدى. ءسويتىپ قويىلىم قۇر سۇلدەرى قالعان بەيشارا قىزدىڭ ايانىشتى مونولوگىمەن اياقتالادى.
– كەيىپكەرىمنىڭ ەسىمى گۇلنۇر. جات اعىمنىڭ جەتەگىندە كەتىپ, اكەدەن دە, شەشەدەن دە, باۋىردان دا ايىرىلادى. كۇيەۋى سيريادا ءوزىن-ءوزى جارىپ جىبەرىپ, شىناشاقتاي قىزىن سودىرلار زورلاپ ولتىرەدى. ەڭ سوڭىندا وسىنىڭ بارلىعىنىڭ دۇرىس ەمەس ەكەنىن تۇسىنگەن سوڭ, جات اعىمنىڭ قۇرساۋىنان ارەڭ قۇتىلىپ ۇيىنە ورالادى. وسىلايشا, قىزدىڭ اداسۋى سالدارىنان ءبىر وتباسىنىڭ شاڭىراعى ورتاسىنا تۇسەدى. بۇل كەيىپكەردى سومداۋ ماعان وتە قيىن بولدى. جانىم اۋىرىپ, ءوزىمدى قويارعا جەر تاپپادىم. دايىندىقتان كەيىن 2-3 ساعاتقا دەيىن ءوز-وزىمە كەلە الماي قينالدىم. مۇنداي جات اعىمنىڭ جەتەگىندە كەتكەن تالاي جاستىڭ تاعدىرىن ويلاپ, قاتتى الاڭدادىم. وسى قويىلىم ارقىلى كورەرمەنگە, جاستارعا وي سالا الساق, ول ءبىزدىڭ ۇلكەن ولجامىز بولار ەدى, – دەيدى اكتريسا جاننا وتەگەن.
قويىلىم ءساتتى شىقتى. قازىرگى قوعامداعى بىتەۋ جارا – جاستاردىڭ تەرىس اعىمنىڭ جەتەگىندە كەتىپ, جاقىنىن جات كورىپ, اتا-بابادان كەلە جاتقان ۇلتتىق قۇندىلىقتاردى تارك ەتىپ, قارا نيەتتىلەردىڭ سوڭىنا ىلەسكەندەرى ءبىر وتباسىنىڭ مىسالىندا انىق كورىنگەن. اتا-انانىڭ ساعىنىپ كۇتكەن قىزى ۇيگە قارا جامىلىپ كىرگەندە زال سىلتىدەي تىنىپ, ودان ءارى نە بولارىن الاڭداپ كۇتتى. اداسقان كۇيەۋ بالا مەن جاندايشاپ تەررورشىنىڭ قىلىعى, شەرمەندە قىزدىڭ جانۇشىرىپ جىلاعان شەشەسىن كەۋدەسىنەن كەرى يتەرىپ, جەرگە قۇلاتىپ سالعانى, اسىر سالىپ ويناپ جۇرگەن ءبۇلدىرشىندى اتا-اجەنىڭ باۋىرىنان جۇلىپ الىپ, ازاپقا سالۋ ءۇشىن اكەتىپ بارا جاتقانى كورەرمەننىڭ كوڭىلىن, ارينە, استان-كەستەن ەتكەنى ءسوزسىز.
– قويىلىم وتكەن جىلى دايىندالعان ەدى. بىراق بۇل وتە كۇردەلى تاقىرىپ بولعاندىقتان, كوپ سۇزگىدەن وتكىزىلدى. سودان ساحناعا بيىل ماۋسىم ايىندا عانا شىقتى. كورسەتىلگەن بويدا ماعان اقتوبەدەن ۇسىنىس ءتۇستى. بىردەن كەلىستىم. سەبەبى, جاستاردىڭ جات اعىمدارعا بوي ۇرۋى, ولاردى قۇتقارۋ, مۇنداي جاعدايدى بولدىرماۋ ءبارىمىزدىڭ مىندەتىمىز, – دەيدى قويىلىم رەجيسسەرى ن.جۇمانيازوۆ. قويىلىمداعى باستى كەيىپكەرلەردى تەاتردىڭ اكتەرلەرى داۋرەن نارمان, مايگۇل مۇزباەۆا, جاننا وتەگەن, قادىر قۇتتىباەۆ, كەڭەس كەمالباەۆ سومدادى. تەاتر ديرەكتورى نۇرلىبەك جۇباتقاننىڭ ايتۋىنشا, «ەسىگىمدى قاققان كىم؟» قويىلىمى الداعى ۋاقىتتا اۋدانداردا, ءبىلىم وردالارىندا دا كورسەتىلمەك.
مەيرامگۇل راحاتقىزى,
جۋرناليست
اقتوبە