ايەلىنەن قۇتىلۋ ءۇشىن تۇرمەگە تۇسكىسى كەلگەن
اقش-تىڭ كانزاس شتاتىندا تۇراتىن 70 جاستاعى كىسى قارۋ اسىنىپ, بانككە كەلگەندە, ەشكىمنىڭ ومىرىنە قاۋىپ توندىرمەگەن, سۇراعان اقشانى العان سوڭ قاشىپ كەتپەگەن.
بانكتىڭ وپەراتسيالىق زالىندا لوۋرەنس دجون ريپپل كاسسيردەن سەيفتەگى بارلىق اقشاسىن الىپ بەرۋدى تالاپ ەتەدى. بىراق بىردەن كەتە قويمايدى. بانككە پوليتسەيلەر كەلگەندە, توناۋشى ءوزىنىڭ بۇل ارەكەتىن اقشا ءۇشىن ەمەس, ايەلىنەن قۇتىلۋ ءۇشىن جاساعانىن ايتقان. زايىبىنان ابدەن جالىققانى سونداي, ودان قاشىپ, دەمالۋ ءۇشىن تۇرمەگە تۇسكەندى ءجون كورگەن.
قۇربان ايتقا اتاعان مالىن ءۇيدىڭ توبەسىندە باققان
پاكىستاننىڭ كاراچي قالاسى تۇرعىنىنىڭ قۇربان ايتقا سەمىرتىپ, بازارعا شىعارىپ, ساتۋعا دايىنداپ وتىرعان سيىرىن ءۇيدىڭ توبەسىنەن جەرگە ءتۇسىرۋ ءۇشىن كران كەرەك بولىپ قالدى.
ايتا كەتۋ كەرەك, قازىر حالقىنىڭ سانى 20 ميلليون ادامنان اسىپ كەتەتىن قالا تۇرعىندارىنىڭ كوبى ارنايى ورىنداردىڭ جوقتىعى مەن جەردىڭ بولىنبەۋى سالدارىنان قۇربان ايتتا سوياتىن مالدارىن وزدەرى تۇراتىن ۇيلەردىڭ شاتىرلارىندا ۇستاۋعا ءماجبۇر بولىپ وتىر.
ءبىر يت ءتورت تورايدى باۋىرىنا باستى
كۋبانىڭ پلايا-لارگا قالاسىندا تۇراتىن لارگا يگناسيو ەستەۆەستىڭ ءيتى اناسى ءولىپ قالعان تورايلاردى باۋىرىنا باسىپ, شىن مانىندە اسىراپ الدى.
ت ۇلىك يەسى ءتورت توراي تۋعان شوشقاسى كەنەتتەن ءولىپ قالعاندا, نە ىستەرىن بىلمەي ساسقانىن ايتادى. ءبىر عاجابى, فەرمەر كىسى تورايلاردى قوينىنا سالىپ بەرگەندە, ليندا اتتى ءيتى ولاردان باس تارتپاي, كۇتىمگە الادى. وعان ەندى ءوزىنىڭ التى كۇشىگىمەن بىرگە كىشكەنتاي ءتورت تورايدى دا ەمىزۋگە تۋرا كەلەدى. ەستەۆەستىڭ ايتۋىنشا, ليندا باسىندا تورايلاردان ەپتەپ قىسىلىپ جۇرگەن, بىراق كەيىن كەلە جەتىم قالعان ولاردى دا ءوز بالالارىنداي كورىپ كەتەدى.
بىرەۋمەن اتتاس بولۋدىڭ دا ازارى بار
وڭتۇستىك كورەيادا تۇراتىن كيم چەن ىن اتتى ايەل كحدر ليدەرىمەن تولىق اتتاس بولۋى سەبەپتى امەريكانىڭ سانكتسياسى شەڭبەرىنە ءجيى ءتۇسىپ قالىپتى.
كورەي ايەل بيىلعى تامىز ايىندا وڭتۇستىك افريكا مەملەكەتىندە تۇراتىن سىڭلىسىنە 27 مىڭ دوللار كولەمىندە اقشا سالادى. الايدا, قارجى ءوزىنىڭ مانزىلىنە جەتپەيدى. ال تەكسەرۋ بارىسىندا اقشا جونەلتۋدىڭ اقش-تاعى كوررەسپوندەنتتىك ەسەپشوتتاردىڭ ءبىرى ارقىلى جۇرگىزىلگەنى انىقتالادى. سويتسە, ونداعىلار سولتۇستىك كورەيا باسشىسىنىڭ اتى-ءجونىن كورگەننەن كەيىن بىردەن وپەراتسيانى توقتاتىپ تاستاپتى. بانك قىزمەتكەرلەرى اقشانىڭ كورەيا رەسپۋبليكاسىنان جىبەرىلگەنىنە دە ءمان بەرە قويمايدى.
يەسىن 6 كۇن بويى اۋرۋحانا جانىندا كۇتكەن
يسپانيادا حاتيكو اتتى ءيتتى ەسكە تۇسىرەتىن وقيعا ورىن الدى. ايتا-ينۋ تۇقىمداس مايا ەسىمدى توبەت ءوزىنىڭ 22 جاسار يەسى ساندرا ينەستا اۋىرىپ جاتىپ قالعاندا ونى اۋرۋحانا جانىندا 6 كۇن تاپجىلماي كۇتكەن.
بويجەتكەن كولىگىنە ءيتىن سالىپ الىپ, بارسەلونا كوشەلەرىندە ءجۇرىپ كەلە جاتقانىندا ءىشى قاتتى ءبۇرىپ اۋىرادى. سوسىن قىزعا اۋرۋحانا جانىنا توقتاپ, شۇعىل دارىگەرلەرگە كورىنۋگە تۋرا كەلگەن. ال ەسىكتىڭ الدىندا قالعان ءيتتى قىزدىڭ اكەسى دە الىپ كەتە الماپتى. سوندىقتان ادال ءيتتى اۋرۋحانانىڭ مەديتسينالىق پەرسونالى سول ۋاقىتتىڭ بارىندە تاماقتاندىرىپ تۇرىپتى.
سالقىن سىراعا قانعىڭ كەلسە, سلوۆەنياعا بار
سلوۆەنيانىڭ جالەتس قالاسىندا ەۋروپا قۇرلىعىنداعى ءبىرىنشى سىرا سۋبۇرقاعى اشىلدى.
قىركۇيەكتىڭ 6-سى كۇنى اۋا رايىنىڭ قولايسىز بولىپ تۇرعانىنا قاراماستان, سىرا اتقىلايتىن فونتاننىڭ اشىلۋ سالتاناتىنا بەس مىڭنان استام ادام كەلگەن. ولار بۇل جەردەن التى ەۋرو تولەپ, سىرانىڭ ءدامىن تاتىپ كورگەن. وسى سوماداعى اقشاعا ءار ادام بەس ساپتىاياق كوبىكتى سۋسىندى ىشە الاتىن بولعان. ەندى قالا باسشىلىعى وسى سىرا بۇرقاعىنىڭ ارقاسىندا تۋريستەردى كوپتەپ تارتۋدى ارمانداپ وتىر.
اقپارات اگەنتتىكتەرىنىڭ ماتەريالدارى نەگىزىندە دايىندالدى