بىردەن ءۇش ەلدە قاتار ءوتۋى مۇمكىن
فۋتبولدان الەمنىڭ 2026 جىلعى چەمپيوناتى بىردەن ءۇش ەلدە – مەكسيكا, اقش جانە كانادا جەرلەرىندە ءوتىپ قالۋى ابدەن مۇمكىن. قازىر اتالعان ءۇش ەل وسى تۇرعىدا بىرلەسكەن تاپسىرىس دايىنداپ جاتقان كورىنەدى.
فيفا پرەزيدەنتى دجانني ينفانتينو الەم چەمپيوناتىنىڭ بىردەن ءۇش ەلدە ءوتىپ قالۋى مۇمكىن ەكەنىن استە جوققا شىعارمايدى. بۇدان بولەك, ول مۋنديالعا قاتىسۋشى كوماندالار سانىنىڭ 32-دەن 40-قا دەيىن كوبەيتىلۋى دە عاجاپ ەمەستىگىن العا تارتتى. مىنە, فيفا-نىڭ تسيۋريحتەگى شتاب-پاتەرىندە بيىلعى 3-14 قازان كۇندەرى وتەتىن وتىرىس تاپ وسى ماسەلەلەردى تالقىلايتىن بولادى.
ايتا كەتەتىن جايت, سولتۇستىك امەريكا جەرىندە 1994 جىلدان كەيىن الەم چەمپيوناتى وتكەن جوق. وسىنىڭ دا اسەرى بار شىعار, قازىر 2026 جىلعى مۋنديالدى قۇرلىقتىڭ سول بولىگىنە بەرۋ ىقتيمالدىعى دا وتە جوعارى بولىپ تۇر. ال 1994 جىلى جاھاننىڭ كۇشتى كوماندالارى اقش ستاديوندارىندا باس قوسىپ ەدى. بۇدان بولەك, مەكسيكا 1970 جانە 1986 جىلدارى ەكى رەت الەم چەمپيوناتىن قابىلداعان بولاتىن.
دەگەنمەن, ازىرگە بىردە-ءبىر رەت چەمپيونات بىردەن ءۇش ەلدە ءوتىپ كورگەن ەمەس.
مۇرات ايتقوجا