قازاقستان رەسپۋبليكاسىنىڭ پرەزيدەنتىن سايلاۋدا ەلباسىمىز, «نۇر وتان» پارتياسىنىڭ ءتوراعاسى نۇرسۇلتان نازارباەۆتى قولداۋ بويىنشا وبلىستىق سايلاۋالدى قوعامدىق شتابى قۇرىلدى. قۇرامىنا ساياسي پارتيالار مەن ۇكىمەتتىك ەمەس ۇيىمداردىڭ باسشىلارى, بارلىق دەڭگەيدەگى ءماسليحات دەپۋتاتتارى, ەتنومادەني جانە جاستار قوعامدىق بىرلەستىكتەرىنىڭ وكىلدەرى كىرەتىن شتابتىڭ توراعاسى – «نۇر وتان» حالىقتىق-دەموكراتيالىق پارتياسى جامبىل وبلىستىق فيليالى توراعاسىنىڭ ءبىرىنشى ورىنباسارى ماسات بەرىك .
شتابتىڭ العاشقى وتىرىسىندا م.بەرىك ەل تاريحىندا الار وزىندىك ورنى بار ساياسي ناۋقاننىڭ ءمان-مازمۇنىمەن جانە شتابتىڭ العا قويىپ وتىرعان ماقسات-ءمۇددەلەرىمەن كەڭىنەن تانىستىرىپ ءوتتى.
قولدانىستاعى زاڭعا سايكەس, سايلاۋ وتكىزىلەتىن مەرزىمنەن ءبىر اي بۇرىن, نەمەسە 3 ناۋرىزدان باستاپ سايلاۋالدى ۇگىت-ناسيحات جۇمىستارىن جۇرگىزگەنگە دەيىن شتاب مۇشەلەرى ۇيىمداستىرۋ جۇمىستارىمەن اينالىسادى. شتاب الدىمەن ناقتى ءىس-جوسپاردى بەكىتىپ الۋدى كوزدەپ وتىر.
وبلىستىق سايلاۋالدى قوعامدىق شتابى – «نۇر وتان» حدپ جامبىل وبلىستىق فيليالى عيماراتىنا ورنالاستى.
كوسەمالى ساتتىباي ۇلى.
تاراز.