كەشە بايلانىس جانە اقپارات ءمينيسترى اسقار جۇماعاليەۆ باستاعان اقپاراتتىق-ناسيحات توبى جۇمىس ساپارىمەن باتىس قازاقستان وبلىسىنا كەلدى. ساپاردىڭ ماقساتى پرەزيدەنت نۇرسۇلتان نازارباەۆتىڭ قازاقستان حالقىنا ارناعان كەزەكتى جولداۋىندا كورسەتىلگەن مىندەتتەر مەن تاپسىرمالاردىڭ جۇزەگە اسىرىلۋ بارىسى تۋرالى جەرگىلىكتى تۇرعىنداردى اقپاراتتاندىرۋ.
جۇمىس ساپارى بارىسىندا اسقار جۇماعاليەۆ «قازاقتەلەكوم» اق-تىڭ قىزمەتكەرلەرىمەن جانە قازاقستاندىق يننوۆاتسيالىق-تەلەكوممۋنيكاتسيالار جۇيەسى ۋنيۆەرسيتەتىنىڭ ستۋدەنتتەرىمەن كەزدەستى. كەزدەسۋ بارىسىندا مينيستر: «جولداۋدا مەملەكەت باسشىسى جاستار ماسەلەسىنە كوپ كوڭىل ءبولدى. ءويتكەنى, ەلىمىزدىڭ بولاشاعى سىزدەردىڭ قولدارىڭىزدا», – دەپ ايتىپ ءوتتى.
كەزدەسۋ سوڭىندا قازيتۋ ستۋدەنتتەرى ە-ۇكىمەتتىڭ www.egov.kz/پورتالىنداعى مەملەكەتتىك ەلەكتروندىق قىزمەتتەردى الۋ ءۇشىن قاجەتتى ەلەكتروندىق ساندىق قولتاڭباعا يە بولدى.
اقپاراتتىق-ناسيحات توبىنىڭ باتىس قازاقستان وبلىسىنا جۇمىس ساپارى بارىسىندا اسقار جۇماعاليەۆ باتىس ايماقتىق بۇقارالىق اقپارات قۇرالدارىنىڭ وكىلدەرىمەن كەزدەستى. اقتوبە, اتىراۋ, ماڭعىستاۋ جانە باتىس قازاقستان وبلىستىق بۇقارالىق اقپارات قۇرالدارىنىڭ جەتەكشىلەرى مەن باس رەداكتورلارى مەملەكەت باسشىسىنىڭ جولداۋىندا ايتىلعان تاپسىرمالاردى جۇزەگە اسىرۋ بارىسىن تالقىلادى. كەزدەسۋدە «تەلەراديوحابارلارىن تاراتۋ» زاڭ جوباسى مەن ساندىق سپۋتنيكتىك تەلەۆيزيا سالاسىن جانە وتاندىق مەدياكەڭىستىكتى دامىتۋ ماسەلەلەرى ءسوز بولدى.
كەزدەسۋ كەزىندە بايلانىس جانە اقپارات ءمينيسترى اسقار جۇماعاليەۆ زالدان قويىلعان كوپتەگەن سۇراقتارعا جاۋاپ قايتاردى. مىسالى ول: ءبىزدىڭ رەسپۋبليكادا عالامتور قىزمەتىن پايدالانۋ باعاسى ءالى دە جوعارى كۇيىندە قالىپ وتىر. ونىڭ جىلدامدىعى دا بۇگىنگى زامانعى وسكەلەڭ تالاپتار دەڭگەيىنە سايكەس كەلە بەرمەيدى. ءسىز بۇعان نە دەيسىز؟ – دەگەن ساۋالعا بىلاي دەدى.
– نە نارسەنىڭ دە باعامى مەن ارتىقشىلىعىنا سالىستىرمالى تۇردە باعا بەرىپ, كوز جەتكىزۋگە بولادى. عالامتور قىزمەتىنىڭ قولجەتىمدىلىگى بويىنشا قازاقستاندىقتار الەمدە العاشقى وندىققا كىرەدى. بۇل قاناعات تۇتۋعا تۇراتىن كورسەتكىش. ال ينتەرنەتتىك جىلدامدىق جونىندەگى ماسەلەگە كەلسەك, بىزدە ونى ەۋروپا ەلدەرىمەن ءبىر ولشەمدە قارايتىندار دا جەتكىلىكتى. بۇل مەملەكەتتەردە حالىق تىعىز, اۋماقتار ىقشام, شاعىن ءارى ءبىر-بىرىنە جاقىن ورنالاسقان. سوندىقتان دا, اتالعان ماسەلەدە ايتارلىقتاي پروبلەما بولا بەرمەيدى. ءبىزدىڭ جەرىمىزدىڭ كەڭدىگى, وڭىرلەردىڭ ءبىر-بىرىمەن قاشىقتىعى ينتەرنەت جىلدامدىعىن كوتەرۋگە كەرى اسەرىن تيگىزبەي قالمايدى. ارينە, مۇنىڭ ءوزى باعا تومەندەمەيدى دەگەن ۇعىمدى بىلدىرمەيدى. بۇگىندە مينيسترلىك ماماندارى عالامتوردى پايدالانۋ قىزمەتىن ارزانداتۋ جولدارىن ىزدەستىرۋ ۇستىندە.
تەمىر قۇسايىن.