جۋىردا وبلىس اكىمىنىڭ ورىنباسارى ءاليا عالىموۆا باسقاراتىن وبلىستىق ونوماستيكالىق كوميسسيانىڭ وتىرىسى ءوتتى. Cول وتىرىستا اۋدان ورتالىعىنداعى جەلەزينكا قازاق ورتا مەكتەبىنە ۇلتىمىزدىڭ ءبىرتۋار ازاماتى, حالقىنا «ويان, قازاق!», دەپ وي سالعان, بيىل تۋعانىنا 125 جىل تولاتىن مىرجاقىپ دۋلات ۇلىنىڭ ەسىمىن بەرۋ جونىندەگى ۇسىنىس ءبىراۋىزدان قولداۋ تاپتى. سوندىقتان, مەكتەپ ۇجىمى, وقۋشىلار ەندى بۇل ۇسىنىستىڭ جوعارىدان بەكىتىلۋىن اسىعا كۇتۋدە.
نەگىزىنەن, بۇل باستامانى قازاق مەكتەبىندەگى بالالاردىڭ سانىن كوبەيتىپ, وسى جەرگە ءوزبەكستان جاعىنان كوشىپ كەلگەن ورالمان اعايىندار, مۇعالىمدەر, اتا-انالار كوتەرگەن ەدى. بۇل ىسكە ۇلتجاندى ازامات جانات شۇعاەۆ باسقاراتىن اۋدان اكىمدىگى دە از ۇلەس قوسقان جوق. جالپى, بۇل اۋدان ورتالىعىندا ءومىرى قازاق مەكتەبى دەگەن بولماعان. قازاق مەكتەبىنىڭ سالىنۋى, بىرىنشىدەن, ەل
ەگەمەندىگىنىڭ, ەلباسىنىڭ ارقاسى بولسا, ەكىنشىدەن, بۇل ساۋاپتى ىسكە سول كەزدەگى وبلىس اكىمىنىڭ قامقورلىعى مەن قولداۋى تيگەنى دە شىندىق. قازىر اۋدان ورتالىعىنداعى جارقىراعان جاڭا مەكتەپتە جىل سايىن قازاق تىلىندە ءبىلىم الاتىن وقۋشىلار قاتارى كوبەيىپ كەلەدى.
ۋسپەنكادا دا جاڭا مەكتەپ سالىندى, وزبەكستاننان كەلگەن ورالمان اعايىنداردىڭ بالالارى مەكتەپ سىنىپتارىن تولتىرۋدا. مەكتەپكە ەلىمىزدىڭ ءانۇرانى اۆتورلارىنىڭ ءبىرى جۇمەكەن ناجىمەدەنوۆتىڭ ەسىمىن بەرۋ تۋرالى ۇسىنىستار بار. بۇگىندە ونىڭ قۇجات-قاعازدارى دايىن كورىنەدى. وبلىس اكىمىنىڭ ورىنباسارى ءاليا قايراتقىزى مۇنداي ءمان-ماڭىزى زور, ماقساتتى شارالاردىڭ اياقسىز قالماۋىنا ۇلەس قوسادى دەپ سەنەمىز. ءويتكەنى, الدا جەلەزينكا, ۋسپەنكا اتالىپ تۇرعان اۋدان جانە اۋدان ورتالىقتارىنىڭ دا بايىرعى اتاۋلارىن ەجەلگى اتىنا قايتارۋ مىندەتى تۇر. ال قازاق مەكتەپتەرىنە ۇلتىمىزدىڭ ءبىرتۋار ۇلدارىنىڭ ەسىمدەرىن بەرۋ ارقىلى جاس ۇرپاقتى ەلىن, جەرىن, ۇلتىن سۇيۋگە, انا ءتىلىن قۇرمەتتەۋگە ساي تاربيەلەي الامىز, ءارى ەلى ءۇشىن تەر توككەن عازيز جانداردىڭ ولمەس رۋحى ولاردى ارقاشان قولداپ, جەبەپ جۇرەتىنى كۇمانسىز.
فاريدا بىقاي.
پاۆلودار.