بۇگىن وليمپياداعا قىتايدىڭ اتىنان قاتىسىپ جاتقان قانداسىمىز ەرلانبەك كاتەي ۇلى بوزكىلەمگە شىعادى. ول ەركىن كۇرەس بەلدەسۋىندە 65 كيلوعا دەيىنگى سالماقتا كۇش سىناسادى.
ەرلانبەك وليمپياداعا العاش رەت قاتىسىپ جاتىر. بۇعان دەيىن الەم, ازيا چەمپيوناتتارىنا قاتىسسا دا ءتورت جىلدا ءبىر كەلەتىن ءدۇبىرلى دوداعا ءالى قاتىسىپ كورمەگەن. ول وليمپياداعا ليتسەنزيانى بيىل استانادا وتكەن حالىقارالىق تۋرنيردە جەڭىپ العان.
ەرلانبەك كاتەي ۇلى كوپبالالى وتباسىدان شىققان. ول التاي وكرۋگىنىڭ قىزىلتاس اۋىلاندا تۋعان. وتباسىندا التى بالانىڭ كەنجەسى. قازىر ول اكەسىمەن جانە باۋىرلارىمەن ليانچجوۋ قالاسىندا تۇرادى. ونىڭ شەشەسى ەكى جىل بۇرىن قايتىس بولعان. بالۋان جىگىت كۇرەسكە كەش بارعان ەكەن. "ەشتەن كەش جاقسى" دەمەكشى, كۇرەس زالىنىڭ تابالدىرىعىن كەش اتتاسا دا 2010 جىلى ەركىن كۇرەستەن قىتاي چەمپيونى اتانعان. سول كەزدە كوزگە ءتۇسىپ, ۇلتتىق قۇراماعا الىنعان. قازىر ەرلانبەك قىتاي كومانداسىنىڭ بەلدى مۇشەسى. وليمپياداعا العاش رەت قاتىسىپ جاتسا دا جۇلدەدەن دامەلى ەكەنىن جاسىرمايدى. سونىمەن بىرگە ەلىشىلىك جارىستاردى ۇمىتپايدى. مىسالى, ونىڭ قىتايدا وليمپيادادا كەيىن جالاۋىن كوتەرەتىن سپارتاكيادادا توپ جارسام دەگەن ءتاتتى تىلەگى بار ەكەن.
-وليمپيادادان كەيىن قىتايدا سپارتاكيادا وتەدى. بۇل جارىس قىتايدا ءمانى مەن ماڭىزى جاعىنان وليمپيادادان كەيىن ەكىنشى ۇلكەن دودا. وسى جارىسقا دا قاتىسىپ, باق سىناسىپ كورەمىن, - دەيدى ەرلانبەك.
ال ازىرگە بالۋاننىڭ بار ويى - وليمپيادا. ونىڭ وسى دودادا مىڭنان تۇلپار, جۇزدەن جۇيرىك جۇلدەگەرلەردىڭ قاتارىنان توبە كورسەتسەم دەگەن ارمانى جانە بار. جەڭىسكە دەگەن جىگەرى كوزىنەن كورىنىپ تۇراتىن جاس جىگىت ونى ەشقاشان ەشكىمنەن جاسىرىپ كورگەن ەمەس.
داستان كەنجالين
فوتو: facebook.com