ەلباسى نۇرسۇلتان نازارباەۆ ءوزىنىڭ قازاقستان حالقىنا بيىلعى جولداۋىندا تۇرعىن ءۇي-كوممۋنالدىق شارۋاشىلىق سالاسىن دامىتۋ جانە ەلدى مەكەندەردى ساپالى اۋىز سۋمەن قامتاماسىز ەتۋ ماسەلەلەرىنە باسا نازار اۋداردى. مۇنداي باعدارلامالاردى جۇزەگە اسىرۋ ومىرلىك ماسەلە ەكەنىن اتاپ ءوتتى. «سۋمەن, جىلۋمەن, ەلەكتر جانە گازبەن قامتاماسىز ەتۋ جۇيەلەرىنە كەڭ اۋقىمدى جاڭارتۋ ءجۇرگىزىپ, سونداي-اق, تۇرعىن ءۇي قاتىناسىنىڭ وڭتايلى مودەلىن قۇرۋ قاجەت», – دەپ قاداپ ايتتى. ايماقتىق يندۋستريالاندىرۋ كارتاسى اياسىندا سالىنىپ, بۇگىن-ەرتەڭ پايدالانۋعا بەرىلگەلى وتىرعان قۋاتى جىلىنا 20 ميلليون توننا مەتالل قۇرىلعىلارىن شىعارۋعا ەسەپتەلگەن «اقتوبەقۇرىلىسحيمقۇراستىرۋ» جشس پوليەتيلەن قۇبىرلارى زاۋىتىنىڭ جالپى جوبالىق قۇنى 900 ميلليون تەڭگە قۇرايدى.
الەمدىك وزىق تەحنولوگياعا ەسەپتەلگەن بۇل زاۋىتتا جوعارى جانە ورتا قىسىمدى ءار ءتۇرلى ديامەتردەگى قۇبىرلار شىعارىلادى. جوبا «نۇربانكتىڭ» زاەمدىق قارجىسىمەن قارجىلاندىرىلدى. وندىرىستە ەڭ وزىق يننوۆاتسيالىق تەحنولوگيا – گەرمانيانىڭ «ءKraussMaffeى» كومپانياسىنىڭ قۋات تيىمدىلىگى جوعارى ەكسترۋزيوندىق جەلىسى پايدالانىلادى. قۇبىر ءونىمدەرىن وندىرۋگە گەرمانيا مەن كورەيانىڭ وتە ساپالى پوليەتيلەنى قولدانىلادى. سوندىقتان زاۋىتتا شىعارىلعان پوليەتيلەن قۇبىرلارى 50 جىلعا شىداس بەرەدى.
«اقتوبەقۇرىلىسحيمقۇراستىرۋ» جشس-ءنىڭ ديرەكتورى سەرىك احمەتاليننىڭ ايتۋىنشا, كاسىپورىندا شىعارىلاتىن پوليەتيلەن قۇبىرلارى تۇرعىن ءۇي-كوممۋنالدىق شارۋاشىلىعىندا سۋ, كاناليزاتسيا جانە گاز جۇيەلەرىن جاڭارتۋعا تاپتىرمايدى. قازىر نىسان جۇمىس ىستەۋگە تولىق دايىن, ازىرگە ىسكە قوسۋ-رەتتەۋ جۇمىستارى ءجۇرگىزىلۋدە. مۇندا 70 ادام ەڭبەك ەتەتىن بولادى. زاۋىت تولىق قۋاتىنا كوشكەندە 150 ادام جۇمىس ىستەيدى. قاجەتتى جۇمىسشىلار تاجىريبەلى جانە كاسىبي شەبەرلىگى جوعارى جەرگىلىكتى مامانداردان ىرىكتەلەتىن بولادى. جاڭا زاۋىتتىڭ اۋماعىندا ءبىر مەزەتتە 2 مىڭ توننا قۇبىر ساقتايتىن وندىرىستىك بازا, پوليەتيلەن قۇبىرلارىن ءوندىرەتىن تسەح, اكىمشىلىك-تۇرمىستىق عيمارات, اسحانا, دەربەس جىلۋ قازاندىعى سالىنعان. 2,5 كۆت-تىق شاعىن ستانسا قۇراستىرىلىپ, ۋچاسكەلەرگە بارلىق سىرتقى كوممۋنيكاتسيالار ءجۇرگىزىلگەن.
تۇعىن ءۇي-كوممۋنالدىق شارۋاشىلىق سالاسىندا جاڭارتۋ جۇمىستارىن قارقىندى جۇرگىزۋ قاجەتتىگى تۋىپ وتىرعان قازىرگى كەزەڭدە زاۋىت ونىمدەرىنە سۇرانىس تا جوعارى بولماق. جوبانى جۇزەگە اسىرۋ باتىس قازاقستاننىڭ پوليەتيلەن قۇبىرلارىنا دەگەن قاجەتىن وتەپ قانا قويماي, تاياۋ جىلداردا رەسەيدىڭ كورشىلەس ايماقتارىنىڭ رىنوگىنا شىعارۋعا دا ءمۇمكىندىك بەرەدى.
ساتىبالدى ءساۋىرباي.
اقتوبە وبلىسى.