كەشە كونگرەسس-حولدا «ءبىلىمدى ەل – ماڭگى ەل» تاقىرىبىمەن استانا قالاسى ءبىلىم قىزمەتكەرلەرىنىڭ ءداستۇرلى تامىز كەڭەسى بولىپ ءوتتى. وعان ءبىلىم جانە عىلىم ءمينيسترى ەرلان ساعاديەۆ, استانا قالاسىنىڭ اكىمى اسەت يسەكەشەۆ, پارلامەنتتىڭ جانە قالالىق ءماسليحاتتىڭ دەپۋتاتتارى, شىعارماشىلىق جانە عىلىم سالالارىنىڭ وكىلدەرى قاتىستى. سونىمەن بىرگە, تامىز كونفەرەنتسياسىنا باسقارما باسشىلارى, ءبىلىم بەرۋ سالاسىنىڭ ارداگەرلەرى, جالپى ءبىلىم بەرۋ مەكەمەلەرىنىڭ ءبىرىنشى باسشىلارى مەن مۇعالىمدەر, ۇكىمەتتىك ەمەس ۇيىمداردىڭ وكىلدەرى شاقىرىلدى.
كەڭەس بارىسىندا وتكەن وقۋ جىلىنىڭ قورىتىندىسى شىعارىلىپ, استانالىق ءبىلىم مەكەمەلەرىنىڭ 2016-2017 وقۋ جىلىنا دايىندىعى جانە ورتا ءبىلىم بەرۋ ساپاسىن ارتتىرۋ ماسەلەلەرى تالقىلاندى. وتىرىسقا قاتىسۋشىلار بالالاردى مەكتەپكە دەيىنگى ءبىلىممەن قامتۋدى ارتتىرۋعا, مەكتەپكە دەيىنگى ءبىلىم بەرۋ قىزمەتتەرىن كورسەتۋگە جەكەمەنشىك ينۆەستورلاردى تارتۋعا باسا نازار اۋداردى.
جيىنعا قاتىسۋشىلار مەن قوناقتار ءۇشىن تاقىرىپتىق كورمە ۇيىمداستىرىلدى. شارا استانا قالاسىنىڭ ءبىلىم بەرۋ ۇيىمدارىنىڭ يننوۆاتسيالىق تەحنولوگيالار مەن باعدارلامالاردى ەنگىزۋ بويىنشا جۇمىس تاجىريبەسىن جيناقتاپ قورىتۋعا مۇمكىندىك بەردى. كورمە ماتەريالدارى ءبىلىم تەحنولوگيالارىنا, مەكتەپكە دەيىنگى ءبىلىمگە, جوعارى سىنىپ وقۋشىلارىن كاسىپتىك باعدارلاۋعا, ەلوردالىق دارىندى بالالاردىڭ حالىقارالىق, رەسپۋبليكالىق وليمپيادالار مەن عىلىمي كونكۋرستارداعى جەتىستىكتەرىنە, سونداي-اق, ءبىلىم بەرۋ مەكەمەلەرىنىڭ ۇزدىك عىلىمي جوبالارىن تانىستىرۋعا ارنالعان 11 تاقىرىپتىق كلاستەرمەن ورنەكتەلدى.
ەلوردالىق ءبىلىم سالاسى قىزمەتكەرلەرىنىڭ الدىندا قالا اكىمى اسەت يسەكەشەۆ بايانداما جاسادى. قازىرگى كەزدە استانا قالاسى ءبىلىم بەرۋ ۇيىمدارىندا 14 مىڭعا تارتا پەداگوگ-كادرلار جۇمىس ىستەيدى. جوعارى پەداگوگيكالىق ءبىلىمى بار ۇستازدار ۇلەسى 88 پايىزدى قۇرايدى. جاڭا وقۋ جىلىندا قالاداعى 94 مەكتەپتە (ونىڭ 83-ءى مەملەكەتتىك, 11-ءى مەملەكەتتىك ەمەس) 129 مىڭ وقۋشى ءبىلىم الادى. ونىڭ ىشىندە 20 مىڭنان استام ءبۇلدىرشىن بيىل العاش رەت مەكتەپ تابالدىرىعىن اتتايدى. جاڭا وقۋ جىلىندا ەلورداداعى قارتالى كوشەسىندە 600 ورىندىق №26 مەكتەپ, ساۋران – اقمەشىت – حۋسەين بەن تالال كوشەلەرى اۋماعىندا 1200 ورىندىق جاڭا مەكتەپ اشىلماق. جىل سوڭىنا دەيىن كوكتال كەنتىندە 375 ورىندىق كوررەكتسيالىق مەكتەپ-ينتەرنات, ارقايسىسى 525 ورىندىق №17 جانە №22 مەكتەپتەرگە جاپسارلاس سالىنعان قوسىمشا عيماراتتار پايدالانۋعا بەرىلەدى.
قالا اكىمىنىڭ ايتۋىنشا, جىل اياعىنا دەيىن 30 جەكەمەنشىك مەكتەپ جاسىنا دەيىنگى بالالار مەكەمەلەرى پايدالانۋعا بەرىلەدى. بولجام بويىنشا, 2019 جىلى استانادا 3 جانە 6 جاس ارالىعىنداعى ءبۇلدىرشىندەر سانى 65 مىڭنان اسادى. ەلوردالىق ءبۇلدىرشىندەردى مەكتەپ جاسىنا دەيىنگى مەكەمەلەرمەن 100 پايىز قامتۋ ءۇشىن قوسىمشا 26 مىڭ ورىن كەرەك. بۇل كەلەلى مىندەتتى شەشۋ ءۇشىن وسى كەزەڭدە 200-دەن استام جاڭا نىساندار اشۋ كەرەك. «2016 جىلدىڭ 1 شىلدەسىنەن مەكتەپ جاسىنا دەيىنگى جەكەمەنشىك مەكەمەلەردەگى مەملەكەتتىك ءبىلىم بەرۋ تاپسىرىسىنىڭ قۇنى 1 بالاعا 15 900 تەڭگەدەن 23 000 تەڭگەگە دەيىن ارتتىرىلدى. سونىمەن بىرگە, اتا-انالار تولەيتىن تولەم 23 000 تەڭگەدەن 20 800 تەڭگەگە دەيىن ارزانداتىلدى. بۇل اتا-انالارعا تۇسەتىن سالماقتى جەڭىلدەتىپ, ولارعا مەملەكەتتىك جانە جەكەمەنشىك بالاباقشالاردى تاڭداۋعا مۇمكىندىك بەرەدى», دەدى اسەت يسەكەشەۆ.
قالا اكىمى ءوز سوزىندە مەكتەپتەردە اتا-انالاردان ءارتۇرلى سەبەپتەرمەن قارجى جيناۋ ءتارتىبىنە توسقاۋىل قويىلاتىندىعىن اتاپ كورسەتتى. اسەت يسەكەشەۆتىڭ ايتۋىنشا, ءبىلىم سالاسىنداعى الەۋمەتتىك جەڭىلدىكتەر جالعاسىن تابادى. الداعى وقۋ جىلىندا 65 مىڭنان استام بالا تەگىن تاماقتاندىرۋمەن قامتاماسىز ەتىلەدى. قالاداعى بارلىق ءبىلىم بەرۋ مەكەمەلەرىندە جۇمىس ىستەيتىن اسحانالار مەن بۋفەتتەردىڭ ونىمدەرى قاتاڭ باقىلاۋعا الىناتىن بولادى.
ەلوردالىق مۇعالىمدەردىڭ ءداستۇرلى تامىز كەڭەسىندە بىلىم جانە عىلىم ءمينيسترى ەرلان ساعاديەۆ ءسوز سويلەپ, ەلىمىزدىڭ ءبىلىم بەرۋ سالاسىنىڭ الدىندا تۇرعان كەلەلى مىندەتتەردى تىلگە تيەك ەتتى. جيىن قورىتىندىسىندا ەرەكشە كوزگە تۇسكەن ۇستازدارعا «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» جانە ىبىراي التىنسارين اتىنداعى توسبەلگىلەرى, قۇرمەت گراموتالارى جانە العىس حاتتار سالتاناتتى جاعدايدا تاپسىرىلدى.
جىلقىباي جاعىپار ۇلى,
«ەگەمەن قازاقستان»
سۋرەتتى تۇسىرگەن
سۇلتان سەيىتوۆ