جىل سايىن جاڭا وقۋ جىلىنا دايىندىققا باسا نازار اۋدارىلادى. وڭىردە بۇل ءۇردىس بيىل دا ءوز جالعاسىن تاۋىپ وتىر. ءبىز وبلىستىق ءبىلىم باسقارماسى باسشىسىنىڭ ورىنباسارى گۇلجان ق ۇلىبەكوۆامەن بولعان اڭگىمەدەن وسىنى اڭعاردىق.
وبلىستاعى 422 مەكتەپكە 130 مىڭ وقۋشى بارادى. بۇل وتكەن جىلعى وقۋشىلار سانىنان 5 مىڭعا ارتىق. قازىردىڭ وزىندە بيىل مەكتەپ تابالدىرىعىن اتتايتىن بالالار سانى 17 مىڭعا جۋىقتاعان. ءبىرىنشى سىنىپقا باراتىن بالالاردى تىركەۋ ءالى دە جۇرگىزىلۋدە.
– بيىل مەكتەپ ەسىگىن اشاتىن ءبىرىنشى سىنىپ وقۋشىلارى جاڭا ءبىلىم بەرۋ مازمۇنى بويىنشا وقىتىلادى. ولارعا ءبىلىم بەرۋ باعدارلاماسى دا, وقۋلىقتار دا جاڭا سيپاتتا بولادى. ءبىرىنشى سىنىپقا ساباق بەرەتىن 329 مۇعالىم ءبىلىم جەتىلدىرۋ كۋرستارىندا دايارلىقتان وتكەن. مەكتەپكە «تارىداي بولىپ كىرەتىندەرگە» بىرىڭعاي ۇلگىدەگى كيىم كيۋ ءتارتىبى ەنگىزىلگەن, تەگىن وقۋلىقتارمەن قامتاماسىز ەتىلەدى. بۇل 12 جىلدىق ءبىلىم بەرۋ جۇيەسىنە كوشۋدىڭ باسى بولماق, – دەيدى باسقارما باسشىسىنىڭ ورىنباسارى.
جاڭا وقۋ جىلىندا ون جەتى ءبىلىم بەرۋ مەكەمەسى پايدالانۋعا بەرىلەدى دەپ كۇتىلۋدە. سونىڭ 11-ءى جاڭا وقۋ جىلى باستالعانشا ىسكە قوسىلادى. اقتوبە قالاسىنىڭ وزىندە ءۇش ورتا مەكتەپ پەن ءبىر بالاباقشا ەسىگىن ايقارا اشادى. ءبارى ۇلتتىق قور ەسەبىنەن سالىنۋدا.
وڭىردە شاعىن جيناقى مەكتەپتەردى وڭتايلاندىرۋ باعىتىندا دا بىرقاتار جۇمىستار جۇزەگە اسىرىلۋدا. تەمىر اۋدانىنداعى – ءۇش, ىرعىز اۋدانىنداعى ءبىر شاعىن جيناقى مەكتەپ جابىلىپ, ولاردىڭ وقۋشىلارىن ينتەرناتقا ورنالاستىرۋ, تاسىمالداۋ ماسەلەسى شەشىلگەن.
– جالپى وقۋ-ادىستەمەلىك قۇرالدار ساتىپ الۋعا وبلىس بويىنشا 729,8 ميلليون تەڭگە قارالدى. قايتا باسىلىپ شىعارىلاتىن وقۋلىقتارمەن 100 پايىز قامتاماسىز ەتىلەدى. وقۋلىقپەن قامتۋ قازىردىڭ وزىندە 93 پايىزدى قۇرايدى.ۇستىمىزدەگى جىلدىڭ 12 تامىزىنا الماتى قالاسىنان وقۋلىقتاردى تاسىمالداۋ 98 پايىزدى, ال قالا مەن اۋداندارعا جەتكىزۋ 61 پايىزدى قۇراپ وتىر. وقۋلىقتاردى مەكتەپتەرگە جەتكىزۋ 25 تامىزعا دەيىن تولىق اياقتالادى. ءبىلىم بەرۋ مەكەمەلەرىن جىلىتۋعا قاجەتتى قاتتى وتىننىڭ 70 پايىزى, سۇيىق وتىننىڭ 30 پايىزى جەتكىزىلدى, –دەيدى باسقارما باسشىسىنىڭ ورىنباسارى گۇلجان ق ۇلىبەكوۆا.
وڭىردە «مەكتەپكە جول» اكتسياسى باستالدى. بيىل بۇل اكتسيا ەل تاۋەلسىزدىگىنىڭ 25 جىلدىعىنا ارنالىپ, «باقىتتى بالالىق شاعىمنىڭ مەكەنى» دەۆيزىمەن وتكىزىلۋدە. بۇگىنگە دەيىن وبلىستا كوپ بالالى جانە از قامتىلعان وتباسىلارىنان مەكتەپكە باراتىن 14144 وقۋشى انىقتالىپ, وبلىستىق اكىمدىككە 241 اتا-انا كومەك سۇراپ كەلگەن ەكەن. ءار سەنبى سايىن «مەگا – اقتوبە» ساۋدا ورتالىعىندا ۇيىمداستىرىلاتىن مەكتەپ ءجارمەڭكەسىندە «تىلەك» اعاشى قويىلعان. ءاربىر از قامتىلعان وتباسى بالالارى وزدەرىنە نە قاجەت ەكەنىن كونۆەرتكە جازىپ سول ارادا قالدىرا الادى. ءبىز ولاردىڭ ءوتىنىشىن ورىنداۋدىڭ جولدارىن قاراستىرامىز. وسى ورايدا ءىرى كاسىپورىندار, باسقارمالار مەن دەپارتامەنتتەردىڭ ءوز كومەكتەرىن كورسەتىپ وتىرعانىن اتاپ ءوتۋ ورىندى. وبلىستىق ءبىلىم سالاسىنداعى باقىلاۋ دەپارتامەنتى, وبلىستىق جولاۋشىلار كولىگى جانە اۆتوموبيل جولدارى باسقارماسى, ىشكى ىستەر دەپارتامەنتى, «ترانسەنەرگو» اكتسيونەرلىك قوعامى جانە باسقالارى وقۋشىلار وتىنىشىنە قولداۋ كورسەتىپ كەلەدى. قالا جانە اۋداندار بويىنشا 2041 بالاعا 7435 مىڭ تەڭگەگە مەكتەپ فورماسى جانە قاجەتتى قۇرال-جابدىقتار ساتىپ الىپ بەرىلدى. «تۋعان جەرگە تاعزىم» اكتسياسى اياسىندا مەكتەپ, بالاباقشا جانە باسقا الەۋمەتتىك نىساندارىن ماتەريالدىق-تەحنيكالىق جابدىقتاۋ, جوندەۋ جۇمىستارىنا 2 مىڭنان استام تۇلەك قاتىسىپ, 270 ميلليون تەڭگەگە دەمەۋشىلىك جاسادى.
وڭىردە «ءبىلىم تۋرالى» زاڭىنا, ءبىلىم جانە عىلىم مينيسترىنىڭ بۇيرىعىنا سايكەس مەكتەپتەردە مىندەتتى مەكتەپ فورماسىنىڭ ەنگىزىلۋىنە بايلانىستى 51 جەكە كاسىپكەرمەن مەكتەپ فورماسىن تىگۋگە كەلىسىمشارت جاسالعان. اقتوبە قالاسىنداعى 1 سىنىپ وقۋشىلارىنا بىرىڭعاي مەكتەپ فورماسىن ەنگىزۋگە شەشىم قابىلدانىپ, «ازايا» جشس-مەن جۇمىس ىستەلۋدە.
ساتىبالدى ءساۋىرباي,
«ەگەمەن قازاقستان»
اقتوبە وبلىسى