كەشە پرەزيدەنتتىككە كانديدات رەتىندە ءوزىن-ءوزى ۇسىنعان استانا قالاسىنىڭ تۇرعىنى, ۋاقىتشا جۇمىسسىز قانات ەسجانوۆ پرەزيدەنتتىكتەن ۇمىتكەرلەردىڭ مەملەكەتتىك ءتىلدى ەركىن مەڭگەرگەندىگىن انىقتايتىن لينگۆيستيكالىق كوميسسياعا سىناق تاپسىردى.
– پرەزيدەنتتىك سايلاۋعا قاتىسۋ تۋرالى شەشىم قابىلداۋدىڭ وڭاي ەمەس ەكەندىگى بەلگىلى, – دەگەن ەدى ول سىناق الدىندا باق وكىلدەرىنە بەرگەن سۇحباتىندا. – مەنى بولاشاق ۇرپاقتىڭ تاعدىرى قاتتى الاڭداتادى. سوندىقتان دا ەلىمىزدە بولىپ جاتقان ساياسي ۇدەرىستەردى سىرتتاي باقىلاعاننان گورى, ونىڭ تىكەلەي قاتىسۋشىسى بولعاندى ءجون كوردىم.
كانديدات ادىلەت مينيسترلىگىنىڭ ءبىر اكتسيونەرلىك قوعامىندا مامان, كەيىننەن ديرەكتوردىڭ ورىنباسارى قىزمەتىن اتقارعان ەكەن. قازىر ۋاقىتشا جۇمىس ىستەمەيدى. ال لينگۆيستيكالىق كوميسسيا وتىرىسىنداعى سىناقتا ول «تاۋەلسىزدىك بەلەستەرى» تاقىرىبىن تاڭداعان بولاتىن.
سىناق ناتيجەسىن جاريالاعان لينگۆيستيكالىق كوميسسيانىڭ ءتوراعاسى مىرزاتاي جولداسبەكوۆتىڭ جۋرناليستەرگە حابارلاعانىنداي, ۇمىتكەر «تاۋەلسىزدىك بەلەستەرى» تاقىرىبىنا جازعان شىعارماسىندا بارلىعى 32 قاتە جىبەرگەن. سونداي-اق ول ابايدىڭ قارا سوزدەرىن ەجىكتەپ, وتە قينالىپ وقىعان. بۇعان قاناعاتتانباعان كوميسسيا مۇشەلەرى وعان قوسىمشا سۇراقتار دا قويعان ەكەن. كانديدات بۇعان دا كوڭىلدەن شىعاتىنداي جاۋاپتار قايتارا الماعان.
ال سوڭعى سىناق – 15 ءمينوت ەركىن سويلەۋدىڭ ورنىنا كانديدات نەبارى 6 ءمينوت قانا سويلەگەن. لينگۆيستيكالىق كوميسسيانىڭ مۇشەلەرى پرەزيدەنتتىككە كانديدات قانات ەسجانوۆ مەملەكەتتىك ءتىلدى ەركىن مەڭگەرمەگەن دەگەن قورىتىندى شىعارعان.
ءاليسۇلتان قۇلانباي.