جۋىردا قازاقستان رەسپۋبليكاسى پرەزيدەنتىنىڭ ارحيۆىنە مەملەكەت جانە قوعام قايراتكەرى توقتاعالي جانگەلديننىڭ وتباسىندا ساقتالعان قوسىمشا قۇجاتتار قابىلدانىپ الىندى. ەرلەن توقتاعالي ۇلى اكەسىنىڭ وزدەرىندە ساقتالعان قۇجاتتارىن باۋىرلارىنىڭ رۇقساتىمەن وتكىزۋگە شەشىم قابىلداعان. قاراشانىڭ 25-ىندە توقتاعالي جانگەلديننىڭ 100 جىلدىق مەرەيتويى اتالىپ وتپەكشى. مەرەيلى ءساتتى اتاپ ءوتۋ جۇمىسىن قازاقستان رەسپۋبليكاسى پرەزيدەنتىنىڭ ارحيۆى جىل باسىنان بەرى بەلسەندى جۇرگىزىپ كەلەدى. جەكە قور يەسىنىڭ ءومىرباياندىق دەرەكتەرىنە سۇيەنە وتىرىپ, ونىڭ قىزمەت ەتكەن جەرلەرىندەگى قۇجاتتارىن ىزدەپ تاۋىپ, جەكە قور قۇرامىنا قوسۋ ءۇشىن شىمكەنت وڭىرلىك مەملەكەتتىك ارحيۆىنەن ت.جانگەلديننىڭ ءوز قولىمەن تولتىرعان جەكە ءىس پاراعى, وعان بەرىلگەن قىزمەتتىك مىنەزدەمە, ءتۇرلى جيىندار مەن ءماجىلىستەردە سويلەگەن سوزدەرى ءماتىندەرىنىڭ كوشىرمەسى الىندى.
جەكە قوردىڭ قۇجاتتارىن وتكىزۋ-قابىلداۋ ءراسىمى قازاقستان رەسپۋبليكاسى پرەزيدەنتىنىڭ ءارحيۆىنىڭ ديرەكتورى, تەحنيكا عىلىمدارىنىڭ دوكتورى, پروفەسسور ب.جاپاروۆتىڭ, اتالمىش مەكەمە ۇجىمىنىڭ قاتىسۋىمەن سالتاناتتى جاعدايدا وتكىزىلدى.
كەزدەسۋ بارىسىندا ارحيۆ ديرەكتورى ب.جاپاروۆ قور يەسىنىڭ ءومىرى مەن قوعامدىق-ساياسي قىزمەتىنە توقتالىپ, جەكە قوردىڭ قۇرامىنداعى قۇجاتتاردىڭ مازمۇنى ءجونىندە قىسقاشا ءاڭگىمەلەپ بەردى. سودان سوڭ, ءسوز كەزەگىن العان ەرلەن توقتاعالي ۇلى اتا-اناسى, باۋىرلارى جايىندا اڭگىمە قوزعاپ, تاپسىرىلىپ وتىرعان قۇجاتتارعا قىسقاشا شولۋ جاسادى.
قۇجاتتاردىڭ ىشىندە ءومىرى مەن قىزمەتىنە قاتىستى اقپاراتتار, كۋالىكتەر, حات الماسۋلار, بەلورۋسسيانىڭ مەملەكەتتىك ارحيۆتەرىنەن الىنعان قازاقستاندىق پارتيزاندار تۋرالى ارحيۆتىك انىقتامالار, س.سەيفۋللين تۋرالى جازىلعان ەڭبەگىنە پايدالانعان قۇجاتتارى, سونىمەن قاتار, ديسسەرتاتسيالىق جۇمىستارى, عىلىمي ماقالالارى, پارتيزان قوزعالىسى تۋرالى جازعان كىتابىنىڭ باسپاحانالىق گرانكاسى جانە ت. ب. دەرەكتەر, فوتوسۋرەتتەر بار.
راۋان قايدار,
«ەگەمەن قازاقستان»