قازاقستان پرەزيدەنتى نۇرسۇلتان نازارباەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
كەزدەسۋ بارىسىندا مەملەكەت باسشىلارى ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلادى, سونداي-اق, وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
نۇرسۇلتان نازارباەۆ پەن ۆلاديمير پۋتين G20, تمد مەملەكەتتەرى باسشىلارىنىڭ كەڭەسى جانە قازاقستان-رەسەي وڭىرارالىق ىنتىماقتاستىق فورۋمى اياسىندا وتەتىن الداعى كەزدەسۋلەرگە دايىندىق بارىسىن قاراستىردى.
مەملەكەت باسشىسى سوچي قالاسىنا شاقىرعانى ءۇشىن ۆ.پۋتينگە العىس ايتىپ, ونىڭ رەسەي وڭىرلەرىن دامىتۋ جولىنداعى قاجىرلى ەڭبەگىن اتاپ ءوتتى. نۇرسۇلتان نازارباەۆ ەكىجاقتى ىنتىماقتاستىقتىڭ قارقىنىنا ريزاشىلىعىن ءبىلدىرىپ, ونى قازاقستاننىڭ ىلگەرىلەتە تۇسۋگە نيەتتى ەكەنىن ايتتى.
– ءبىزدىڭ قارىم-قاتىناسىمىز ساياسي تۇرعىدان دا, ەكونوميكالىق تۇرعىدان دا ۇلگى ەتۋگە لايىق دەپ سانايمىن. وسى جىلدارى قازاقستان مەن رەسەيدىڭ 6 مىڭ بىرلەسكەن كاسىپورنى قۇرىلىپ, ينتەگراتسيامىزدىڭ ومىردە ناقتى ىسكە اسقانىن كورسەتتى. الداعى قازاقستان-رەسەي وڭىرارالىق ىنتىماقتاستىق فورۋمىنا ۇلكەن ءۇمىت ارتامىن. ونىڭ ەكونوميكالىق تۇرعىدان ماڭىزدى كەزدەسۋ ەكەنىن بىلەمىن, وسىعان وراي كوپتەگەن جوبالار ازىرلەنۋدە. قازىرگى ماسەلەلەر ءبىزدىڭ ۇكىمەتتەرىمىز ارقىلى شەشىمىن تابۋدا. ەلدەرىمىزدىڭ مىندەتى – وسىنداي قيىن جاعدايدا ءاردايىم بىرگە بولۋ جانە ءبىر-بىرىمىزگە كومەكتەسۋ. دوستىق, ىنتىماقتاستىق پەن ءوزارا كومەك تۋرالى شارتقا جانە ءححى عاسىرداعى تاتۋ كورشىلىك پەن وداقتاستىق تۋرالى شارتقا نەگىزدەلگەن قازاقستان-رەسەي قارىم-قاتىناسى تۇراقتى بولىپ قالا بەرەدى. قازاقستان مەن رەسەي سەنىمدى كورشى ءارى ارىپتەس بولىپ سانالادى جانە بارلىق ماسەلەلەردى وركەنيەتتى ەلدەردەگى ۇلگى بويىنشا شەشەدى. رەسەيدىڭ تۇركيامەن قارىم-قاتىناسى جاقسارىپ كەلە جاتقانىنا قۋانىشتىمىن, – دەدى قازاقستان پرەزيدەنتى.
ۆ.پۋتين قازاقستان پرەزيدەنتىنە رەسەي-تۇركيا قارىم-قاتىناسىن قالپىنا كەلتىرۋ جولىنداعى قايرات-جىگەرى ءۇشىن العىس ايتىپ, جاعدايدى رەتتەۋدەگى ءبىتىمگەرلىك ميسسياسىن اتاپ ءوتتى.
– كورىپ وتىرعانىمىزداي, بۇل قادام جەمىستى بولدى. ءبىز كوپتەگەن جىلدار بويى بىرەگەي ىنتىماقتاستىق قارىم-قاتىناسىمىز بەن ءوزارا ءىس-قيمىلىمىز ورنىققان دوستاس تۇركيامەن تولىق پىشىمدەگى قارىم-قاتىناستى قالپىنا كەلتىرۋگە رياسىز ۇمتىلىس جاساپ وتىرمىز. تۇركيا پرەزيدەنتى ر.ەردوعاننىڭ رەسەيگە سوڭعى ساپارى ەكىجاقتى بايلانىستاردى قالپىنا كەلتىرۋ عانا ەمەس, ونى دامىتۋ جونىندە دە ءبىزدىڭ تولىققاندى جۇمىس جۇرگىزۋگە نيەتتى ەكەنىمىزدى دالەلدەپ بەردى. سول ءۇشىن سىزگە كوپ راحمەت, – دەدى رەسەي پرەزيدەنتى.
بۇدان بولەك, ۆ.پۋتين قازاقستان مەن رەسەي اراسىنداعى ستراتەگيالىق سەرىكتەستىكتىڭ بارلىق باعىت بويىنشا تابىستى دامىپ كەلە جاتقانىنا نازار اۋداردى.
– ارينە, ءبىز ەكونوميكادا قيىندىقتارعا دا كەزىگىپ تۇرامىز, اسىرەسە, الەمدىك شيكىزات نارىعىنداعى تۇراقسىزدىق پەن ۆاليۋتالىق اۋىتقۋ جاعدايىندا تومەندەۋ بايقالۋدا. بۇل رەتتە ناقتى كولەمى جونىنەن ول سونشالىقتى كوپ ەمەس – نەبارى 7%. قازىرگى ىنتىماقتاستىق تەتىكتەرى بىزگە ونى ەڭسەرۋگە مۇمكىندىك بەرەدى. ال بىزدە مۇنداي تەتىكتەر ءتيىمدى جۇمىس ىستەۋدە, – دەدى رەسەي پرەزيدەنتى.
سۋرەتتەر قازاقستان پرەزيدەنتىنىڭ ءباسپاسوز قىزمەتىنەن الىندى