قازاقستان بوكس فەدەراتسياسى ريو-دە-جانەيرو وليمپيالىق ويىندارىنداعى بوكستان 91 كيلوعا دەيىنگى سالماقتا قازاقستاندىق ۆاسيلي لەۆيت پەن رەسەيلىك ەۆگەني تيششەنكو اراسىندا وتكەن فينالدىق جەكپە-جەگىندەگى تورەشىلىككە قاتىستى ءوز پوزيتسياسىن ءتۇسىندىرىپ بەردى.
ەسكە سالا كەتەيىك, كەشە, 15 تامىز كۇنى تاڭ الدىندا وينالعان بۇل شايقاستا تورەشىلەر جەڭىستى 3:0 (29:28, 29:28, 29:28) دەگەن ەسەپپەن ءبىر اۋىزدان ەۆگەني تيششەنكوعا بەرىپ جىبەرگەن. وسىعان وراي ويىنداردىڭ التىن مەدالىن رەسەيلىك بوكسشى الىپ, قازاقستاندىق اتلەتكە كۇمىس جۇلدە بۇيىرعان ەدى. بىراق تورەشىلەردىڭ شەشىمى حابارلانعان كەزدە زالداعى كورەرمەندەردىڭ كوپشىلىگى بۇعان نارازىلىق ءبىلدىرىپ, ىسقىرعان بولاتىن.
«بارلىق قازاقستاندىقتار سياقتى ءبىز دە ۆاسيلي لەۆيتتىڭ فينالدىق ۇرىسىن قاراپ وتىرمىز. ءبىز ۆاسيلي لەۆيت ۇتتى دەپ ويلادىق. بىراق تورەشىلەردىڭ شەشىمى باسقاشا بولىپ شىقتى. AIBA پرەزيدەنتى چينگ-كۋو ۆۋ ايتقانداي, قانداي بولعاندا دا تورەشىلەردىڭ شەشىمىن قۇرمەتتەۋ كەرەك. AIBA ەرەجەسى بويىنشا, تورەشىلەردىڭ شەشىمىنە نارازىلىق بەرىلمەيدى, سوندىقتان ءبىز نارازىلىق بەرمەيمىز», - دەدى قازاقستان بوكس فەدەرەتسياسى تورەشىلەر كوميسسياسىنىڭ توراعاسى اسلان يگۋباەۆ.
ول سونداي-اق قازاقستان بوكس فەدەراتسياسىنىڭ بارلىق ۇلتتىق فەدەراتسيالاردىڭ باسشىسى بولىپ تابىلاتىن AIBA (حالىقارالىق اۋەسقوي بوكس اسسوتسياتسياسى) جۇيەسىنە كىرەتىنىن اتاپ ءوتتى.
«ءبىز ءوز باسىمىزدان ءوزىمىز جوعارى سەكىرە المايمىز. ەرتەڭ بىزگە كەلەسى وليمپيادا, الەم جانە ازيا چەمپيوناتتارى كەزىندە ولارمەن جۇمىس جاساسۋعا تۋرا كەلەدى. سوندىقتان ءبىز AIBA-نىڭ ساياساتىن ۇستانۋعا ءتيىسپىز», - دەپ ءسوزىن تۇيىندەدى يگۋباەۆ.
ال بوكستان قازاقستان قۇراما كومانداسىنىڭ باس جاتتىقتىرۋشىسى مىرزاعالي ايتجانوۆ جۋرناليستەرگە بەرگەن سۇحباتىندا AIBA-نىڭ ءبارىن ەسەپپەن جاساپ وتىرعانىن, سونىڭ قاباتىندا قازاقستان بوكسشىلارى ادىلەتسىز تورەشىلەردىڭ قۇرباندارى بولىپ جاتقاندارىن ايتتى.
وسى تۇستا بلوگەر عالىم بايتوق بارلىق قازاقستاندىقتاردى ۆاسيلي لەۆيتكە التىن مەدال جاساپ بەرۋ ءۇشىن قارجى جيناستىرۋعا شاقىرىپ وتىر.
دامير قوجامقۇل
فوتو: دانيار مايلىباەۆ