تاياۋدا پوليتسيانىڭ جەدەل ىزدەستىرۋ ءبولىمىنىڭ قىزمەتكەرلەرى ستەپنوگور قالاسىنىڭ 49 جاستاعى تۇرعىنىن ۇستادى.
كۇدىكتىنى جانە ونىڭ «لەكسۋس» ماركالى جەكە كولىگىن ءتىنتۋ بارىسىندا جالپى سالماعى ءبىر كيلوگرامنان استام سارى ءتۇستى مەتالدىڭ 8 قۇيماسى تابىلدى. بۇعان قوسىمشا, ودان 295000 تەڭگە اقشا قاراجاتى الىندى.
سونداي-اق, جەدەل-ىزدەستىرۋ جانە تەرگەۋ امالدارىن جالعاستىرۋ ناتيجەسىندە, ستەپنوگوردان استانا قالاسىنا شىعا بەرىستەگى «رۋبەج» بەكەتىندە اقكول قالاسىنىڭ 43 جاستاعى تۇرعىنى باسقارىپ كەلە جاتقان «BMW» جەڭىل كولىگى توقتاتىلدى. ونى ءتىنتۋ بارىسىندا سالماعى 400 گرامدىق ۇساقتالعان التىن ۇنتاعى تابىلدى. كۇدىكتىنىڭ بۇدان بۇرىن اۋىر قىلمىسى ءۇشىن بىرنەشە رەت سوتتالعانى بەلگىلى بولدى.
قازىر تۇتقىندالعانداردىڭ ۇستىنەن قر قك 196-بابىنىڭ 3-بولىمىمەن قىلمىستىق ءىس قوزعالىپ, تەرگەۋ-ساراپتاما امالدارى جۇرگىزىلۋدە.
باقبەرگەن امالبەك,
«ەگەمەن قازاقستان»
اقمولا وبلىسى