جالپى ەرەجەلەر
قاسيەتتى ۇلى دالا ۇنىنەن قۋات الىپ, اسەم اندەرىمەن تىڭدارمان جۇرتىنا شۋاق بەرگەن ۇلى ءانشى ءا.قاشاۋباەۆتىڭ شىعارماشىلىعى ۇلتتىق مۋزىكا ونەرىندەگى قايتالانباس دارا قۇبىلىس. وسى كيەلى مۇرانى كەڭىنەن, تەرەڭىنەن ناسيحاتتاپ, ۇرپاقتان-ۇرپاققا جەتكىزۋ, تالانتتى جاستارىمىزدى ونەردىڭ كاۋسار بۇلاعىنان ءنار العىزىپ, شەبەرلىگىن شىڭداۋعا ىقپال ەتۋ ماقساتىندا مادەنيەت مينيسترلىگىنىڭ ءمادەنيەت كوميتەتى امىرە قاشاۋباەۆ اتىنداعى رەسپۋبليكالىق ءداستۇرلى ورىنداۋشىلاردىڭ VIII كونكۋرسىن ء(ارى قاراي - كونكۋرس) وتكىزەدى.
كونكۋرس 2011 جىلدىڭ 20 - 22 ءساۋىرى ارالىعىندا استانا قالاسىندا ءوتكىزىلەدى. كونكۋرسقا قازاقستان رەسپۋبليكاسىندا جانە الىس-جاقىن شەت ەلدەردە تۇراتىن 16 مەن 35 جاس ارالىعىنداعى حالىق جانە قازىرگى زامانعى كومپوزيتورلار اندەرىن دومبىرا, قىلقوبىز, سىرناي اسپاپتارىنىڭ ءسۇيەمەلدەۋىندە ورىندايتىن كاسىبي ونەرپازدار قاتىسا الادى. وسىنىڭ الدىنداعى وتكەن كونكۋرستاردىڭ جۇلدەلى ورىندارىنا يە بولعان جەڭىمپازدار اتالمىش كونكۋرسقا قاتىسا المايدى.
كونكۋرستىڭ ماقساتتارى مەن مىندەتتەرى
كونكۋرستىڭ ماقساتتارى مەن مىندەتتەرى: ۇلى ءانشى ءا.قاشاۋباەۆتىڭ شىعارماشىلىعىن كەڭىنەن ناسيحاتتاپ, ۇرپاقتان-ۇرپاققا جەتكىزۋ; دارىندى ادامداردىڭ كاسىبي شەبەرلىگىن جەتىلدىرۋ; ۇلتتىق ءان ونەرىنىڭ ەڭ جاقسى داستۇرلەرى مەن جەتىستىكتەرىن جاڭعىرتۋ, دامىتۋ جانە ناسيحاتتاۋ; حالىقتىڭ مادەني دەمالىسى مەن ەستەتيكالىق تاربيەسىن, رۋحاني جانە مادەني قۇندىلىقتارمەن الماسۋدى ۇيىمداستىرۋ; مادەنيەت سالاسىنداعى مەملەكەتتىك ساياساتتى ىسكە اسىرۋ; ونەردىڭ شىعارماشىلىق جەتىستىكتەرىن انىقتاۋ جانە تالانتتى, وزىندىك ەرەكشەلىگى بار ورىنداۋشىلاردى قولداۋ; مادەني مۇرانى ناسيحاتتاۋ جانە ولاردىڭ دامۋىنداعى ساباقتاستىقتى قامتاماسىز ەتۋ; جاستاردىڭ ەستەتيكالىق ءجانە ۇلتجاندىلىق تۇرعىدا ءتاربيەلەنۋىنە, ۇلتتىق جانە الەمدىك مادەنيەت قۇندىلىقتارىنا تارتىلۋىنا ىقپال ەتۋ.
كونكۋرستى وتكىزۋدىڭ ءتارتىبى جانە شارتتارى
ءۇش كەزەڭنەن تۇراتىن كونكۋرس كورەرمەن الدىندا وتەدى. كونكۋرسقا قاتىسۋشىلار ءار كەزەڭدە ءتورت شىعارمانى جاتقا ورىندايدى. ول الدىن-الا كورسەتكەن شىعارمالار ءتىزىمىن وزگەرتە المايدى.
كونكۋرس لاۋرەاتتارى قورىتىندى گالا-كونتسەرتتە اقىسىز ونەر كورسەتەدى.
كونكۋرس جەڭىمپازدارىنا تومەندەگىدەي جۇلدەلەر تاعايىندالادى:
امىرە قاشاۋباەۆ اتىنداعى باس ءجۇلدە جانە لاۋرەات اتاعى (اقشالاي سىيلىق); ءبىرىنشى جۇلدە جانە لاۋرەات اتاعى (اقشالاي سىيلىق); ەكىنشى جۇلدە جانە لاۋرەات اتاعى (اقشالاي سىيلىق); ءۇشىنشى جۇلدە جانە لاۋرەات اتاعى (اقشالاي سىيلىق).
كونكۋرسقا قاتىسۋ ءۇشىن وبلىستىق, رەسپۋبليكالىق ماڭىزى بار قالانىڭ جانە استانانىڭ مادەنيەت باسقارمالارى, كونتسەرتتىك ۇيىمداردىڭ ديرەكتسياسى مەن كوركەمدىك كەڭەسىنىڭ, شىعارماشىلىق وقۋ ورىندارىنىڭ ۇسىنىستارى بولۋى قاجەت.
كونكۋرسقا قاتىسۋ ءۇشىن ۇمىتكەرلەر ءوتىنىش بەرەدى. وتىنىشكە تومەندەگى قۇجاتتار قوسا ۇسىنىلادى: تۋى تۋرالى نەمەسە جەكە كۋالىك كوشىرمەسى; ءومىربايانى, ۇستازىنىڭ اتى-ءجونى; مۋزىكالىق ءبىلىمى تۋرالى قۇجاتتىڭ كوشىرمەسى; وقيتىن (وقۋشىلار مەن ستۋدەنتتەر ءۇشىن), جۇمىس ىستەيتىن جەرىنەن انىقتاما; 13ح18 كولەمدەگى ءتۇرلى-ءتۇستى ەكى فوتوسۋرەت (ەلەكتروندى نۇسقاسىن قوسا بەرگەن ءجون); ءار كەزەڭدە ورىندالاتىن شىعارمالار ءتىزىمى; ءتيىستى مەكەمەنىڭ ۇسىنىسى.
تاپسىرىلعان قۇجاتتار قايتارىلۋعا جاتپايدى.
كونكۋرسقا قاتىسۋشىلاردىڭ ءوتىنىشتەرى كونكۋرستىڭ باستالۋىنا 25 كۇن قالعانعا دەيىن مىنا مەكەن-جايدا قابىلدانادى: 010000, قازاقستان رەسپۋبليكاسى, استانا قالاسى, اباي داڭعىلى, 18 ءۇي, «قازاق اۋەندەرى» اكتسيونەرلىك قوعامى, 8 (7172) 39 01 40, 39 04 78, 39 05 14 (فاكس).
كونكۋرسقا قاتىسۋشىلار ۇيىمداستىرۋ كوميتەتىنىڭ ساراپتاۋىنان سوڭ كونكۋرسقا شاقىرىلاتىن بولادى. كونكۋرسقا قاتىسۋشىلاردىڭ قاتىسۋشىلار تىزىمىنە كىرگەنى تۋرالى رەسمي حابار قاجەتتى قۇجاتتار تولىعىمەن تاپسىرىلعاننان سوڭ سايىسقا 10 كۇن قالعانعا دەيىن حابارلانادى.
كونكۋرسقا قاتىسۋشىنىڭ بارىپ-قايتۋ جول شىعىندارىن جولداما بەرگەن, ال ولاردىڭ جاتىن ورنى مەن تاماقتانۋىن كونكۋرستى وتكىزەتىن جاق كوتەرەدى. كونكۋرسقا قاتىسۋشىعا قوسا ەرە كەلگەن ادامداردىڭ بارلىق شىعىندارى ءوز تاراپتارىنان وتەلەدى.
كەلەسى كەزەڭگە وتپەگەن كونكۋرسقا قاتىسۋشىلار نەمەسە كونكۋرسقا قاتىسۋدان باس تارتقاندار كونكۋرستىڭ اياعىنا دەيىن كورەرمەن رەتىندە قالۋعا نيەت بىلدىرگەن جاعدايدا ءوز قاراجاتى ەسەبىنەن كۇنەلتەدى.
كونكۋرستىڭ قاتىسۋشىلارىنا مىناداي شارتتار قويىلادى:
ءى كەزەڭ:
ءا.قاشاۋباەۆتىڭ ورىنداۋىنداعى ءان (سايىسكەردىڭ تاڭداۋى بويىنشا
14-تارماقتا كورسەتىلگەن تىزىمدەگى ءبىر ءان);
حالىق كومپوزيتورىنىڭ ءانى (سايىسكەردىڭ تاڭداۋى بويىنشا);
حالىق ءانى (سايىسكەردىڭ تاڭداۋى بويىنشا);
باتىس نەمەسە التاي-تارباعاتاي اندەرى.
ءىى كەزەڭ:
ءا.قاشاۋباەۆتىڭ ورىنداۋىنداعى ءان (سايىسكەردىڭ تاڭداۋى بويىنشا
14-تارماقتا كورسەتىلگەن تىزىمدەگى ءبىر ءان);
حالىق كومپوزيتورىنىڭ ءانى (سايىسكەردىڭ تاڭداۋى بويىنشا);
سىر نەمەسە قازىعۇرت وڭىرىندەگى اۋەندەر;
قازاقستان كومپوزيتورلارىنىڭ ءانى.
ءىىى كەزەڭ:
ءا.قاشاۋباەۆتىڭ رەپەرتۋارىنان ءمىندەتتى تۇردەگى ءان: «اعاش اياق» - جىگىتتەرگە, «ارداق» - قىزدارعا; حالىق كومپوزيتورىنىڭ ءانى (سايىسكەردىڭ تاڭداۋى بويىنشا); حالىق ءانى (سايىسكەردىڭ تاڭداۋى بويىنشا); ارقا نەمەسە جەتىسۋ داستۇرىندەگى ءان.
امىرە قاشاۋباەۆتىڭ ورىنداۋىنداعى اندەر ءتىزىمى:
«قوس بارابان», «توپايكوك», «باياناۋىل», «شىركىن-اي», «سىرعاقتى», «كوكارشىن», «قىزىل بيداي», «ەكى جيرەن», «قورلان», «اق سيسا», «سارىمويىن», «قارعام-اۋ», «حاۋلاۋ», «ءۇش دوس», «بالقاديشا», «گاۋھار قىز», «دۋدار-اي», «كەلىنشەك», «اق قايىڭ», «بەس قاراگەر», «سمەت», «قاناپيا».
ۇيىمداستىرۋ كوميتەتى
مادەنيەت مينيسترلىگىنىڭ مادەنيەت كوميتەتى كونكۋرستى وتكىزۋ بويىنشا ۇيىمداستىرۋ كوميتەتىنىڭ قۇرامىن بەكىتەدى.
ۇيىمداستىرۋ كوميتەتى مەملەكەتتىك ورگاندار مەن كونكۋرستى وتكىزۋگە قاتىسۋشى مادەنيەت ۇيىمدارى وكىلدەرىنەن قۇرالادى. ۇيىمداستىرۋ كوميتەتىنىڭ مۇشەلەرى ءوز فۋنكتسيالارىن قوعامدىق باستامامەن جۇزەگە اسىرادى.
ۇيىمداستىرۋ كوميتەتى كونكۋرستى دايىنداۋ جانە وتكىزۋ بويىنشا باسشىلىقتى جۇزەگە اسىرادى.
ۇيىمداستىرۋ كوميتەتى كونكۋرس قاتىسۋشىلارىنا قوسىمشا سىياقى ءتولەۋسىز كونكۋرستىڭ تىڭداۋلارى مەن قورىتىندى كونتسەرتتەرىن راديو جانە تەلەديدار ارقىلى تاراتۋ, دىبىس جانە بەينەتاسپاعا جازۋ جانە ونى ودان ءارى تاراتۋ قۇقىعىنا يە. سونداي-اق, ۇيىمداستىرۋ كوميتەتى باسقا تاراپتارمەن كونكۋرستىڭ اتالعان ماتەريالدارىن جۇزەگە اسىرۋ جونىندەگى كەلىسىم-شارتقا وتىرۋ قۇقىعىنا يە.
ۇيىمداستىرۋ كوميتەتى ءىس-شارانىڭ اقپاراتتىق-جارنامالىق قولداۋ ءتۇرلەرىن ايقىندايدى.
ۇيىمداستىرۋ كوميتەتى كونكۋرستى دايىنداۋ جانە وتكىزۋ بارىسىندا تۋىندايتىن وزگە دە ۇيىمداستىرۋ ماسەلەلەرىن شەشەدى.
كونكۋرستىڭ قازىلار القاسى
كونكۋرس قاتىسۋشىلارىنىڭ ونەرىن باعالاۋ, سونداي-اق, قورىتىندى شىعارۋ ءۇشىن قازىلار القاسى قۇرىلادى. قازىلار القاسىنىڭ قۇرامى مەملەكەتتىك ورگانداردىڭ وكىلدەرىنەن, ءمادەنيەت جانە ونەردىڭ كورنەكتى قايراتكەرلەرىنەن قۇرالادى جانە مادەنيەت مينيسترلىگىنىڭ مادەنيەت كوميتەتىمەن بەكىتىلەدى.
قازىلار القاسىنىڭ سانى, ءتوراعانى قوسقاندا, تاق سان بولۋى ءتيىس.
قازىلار القاسىنىڭ شەشىمى ءتۇپكىلىكتى جانە قايتا قاراۋعا جاتپايدى, حاتتامامەن رەسىمدەلەدى جانە بارلىق قازىلار القاسىنىڭ مۇشەلەرى قول قويادى.
قازىلار القاسى مۇشەلەرىنىڭ داۋىستارى تەڭ بولىنگەن جاعدايدا توراعانىڭ داۋىسى شەشۋشى بولىپ تابىلادى.
قازىلار القاسى بەلگىلەنگەن ءجۇلدەلى ورىنداردى بەرمەۋگە نەمەسە ءۇمىتكەرلەر اراسىندا بولۋگە (باس جۇلدەنى قوسپاعاندا) قۇقىلى.
قازىلار القاسى قازىلار القاسىنىڭ بارلىق مۇشەلەرى كەلىسكەن جاعدايدا باعدارلامانى قىسقارتۋ جانە/نەمەسە شىعارمالاردى ورىنداۋدى توقتاتۋ تۋرالى شەشىمدى قابىلداۋعا قۇقىلى.
قازىلار القاسى باعالارىنىڭ كريتەريلەرى: ورىنداۋشىلىق شەبەرلىگى (ورىنداۋشىنىڭ دەربەستىگى); ساپالىق دەڭگەيى; ساحنا مادەنيەتى; ورىندالاتىن شىعارمالاردىڭ كونكۋرستىڭ شارتتارىنا سايكەستىگى.
كونكۋرستى قارجىلاندىرۋ
كونكۋرستى دايىنداۋ مەن وتكىزۋدى قارجىلاندىرۋ رەسپۋبليكالىق بيۋدجەتپەن كوزدەلگەن قاراجات شەگىندە جۇزەگە اسىرىلادى.
كونكۋرستى وتكىزۋگە كوزدەلگەن اقشالاي قاراجات ۇيىمداستىرۋ كوميتەتىنىڭ شەشىمى بويىنشا بەكىتىلگەن سمەتالىق شىعىستارمەن قاتاڭ ءسايكەستىكتە جۇمسالادى.
كونكۋرستى دايىنداۋ مەن وتكىزۋ ءۇشىن دەمەۋشىلەردىڭ جانە باسقا دا قوسىمشا قاراجات كوزدەرى جۇمىلدىرىلۋى مۇمكىن.
دەمەۋشىلەر كونكۋرستىڭ قاتىسۋشىلارىنا زاڭدا بەلگىلەنگەن ءتارتىپپەن ءوزىنىڭ ىنتالاندىرۋ سىيلىقتارى مەن سىياقىلارىن تاعايىنداي الادى.
قورىتىندى ەرەجە
وسى قاعيدامەن رەتتەلمەگەن بارلىق ماسەلەلەر قازاقستان رەسپۋبليكاسىنىڭ قولدانىستاعى زاڭناماسىنا سايكەس شەشىلەدى.