ءبىر ەمەس, ەكى ابزال اعا كىتابى. اتالۋى قانداي دەسەڭىزشى!.. «ءدۇنيە ءشىركىن...» وسى ءسوز قۇلاعىما تىم جاعىمدى. العاش ەستىگەندە بۇل نە ءان ەكەن دەپ ەلەڭ ەتە ءتۇسىپ ەدىم, سويتسەم, ءوزىم عالىم, مەملەكەت, قوعام قايراتكەرى رەتىندە سىيلايتىن مىرزاتاي جولداسبەكوۆتىڭ ءانى ەكەن. ەسىمە ەسىم اتامنىڭ دومبىرا تارتقاندا ەسىك, تەرەزەنى جاپقىزىپ قوياتىنى ءتۇستى. باياعى كارى ءسوز. اتقا مىنگەن, اتالى ءسوز ايتاتىن ادامعا دومبىرا تارتىپ, ءان سالۋ ەرسى. ەرتە كەزدە سونداي تۇسىنىك بولعان. دومبىراشى, ءانشى ءبىر بولەك, ەلدىڭ «اتقامىنەرلەرى» ءبىر بولەك. كەشەگى ابايدىڭ ءوزى تابيعاتىنان ەرەك اقىن بولعانىمەن قىرىق جاسقا دەيىن اقىندىقتى مويىنداماي, ولەڭدەرىن كوكبايدىڭ اتىنان جاريالاپ ءجۇردى ەمەس پە؟ ال مىرزاتاي جولداسبەكوۆتىڭ قوعامداعى ۇلكەن ورنى ونىڭ تابيعي تالانتىن شەگەرە بەردى. مەن مىرزاكەڭدى ەلدىك دەڭگەيدەگى تۇلعا دەپ تانىعانمىن, سويتسەم, ءانى دە, كۇيى دە توگىلىپ تۇر ەكەن.
«دۇنيە شىركىن...» كىتابى اۆتورىنىڭ ءوزى ءبىر «كونسەرۆاتوريا». يليا جاقانوۆ, ونەردىڭ مايتالمانى, ءدۇلد ۇلى, كومپوزيتور, ءانشى. ول ابىزدىڭ بىرنەشە كىتابىن وقىدىم, ونىڭ زاۋرەشكە ارنالعان شىعارماسى قانداي! وسىنداي ونەر بىلگىرىمەن جاقىنداپ تانىسسام, ول مىرزاكەڭمەن ءبىر سىنىپتا, ءبىر مەكتەپتە وقىپتى. و, عاجاپ! ەكى تۇلعا, بالا بولسا دا, ءبىر سىنىپقا باستارى قالاي سىيعان. يليا اعامىزبەن سەناتور سارسەنباي ەنسەگەنوۆتىڭ وتباسىندا وتىرعاندا «تاڭدى اتىرا» ءبىر سۇحباتتاسقانىم بار, سوندا كادىمگى مىرزاتاي جولداسبەكوۆ تۋرالى مول اڭگىمەلەر ايتىلعان ەدى, بايقاسام, سونىڭ دەنى «دۇنيە شىركىنگە...» ەنىپتى.
كىتاپتى وقىپ وتىرمىن. «ەگوركينو» رەستورانى «تراديتسيونال...». قانداي كوركەم ءتىل. يليا جاقانوۆ – قالامگەر. حيت بولىپ كەتكەن كوپ اندەرىنىڭ سالماعى باسىپ كەتكەنى بولماسا, تاماشا كوركەمسوز شەبەرى. ول ءوزىنىڭ كەيىپكەرى مىرزاتاي مىرزاعا دەگەن ەرەكشە ىقىلاس سەزىمىن جاسىرا الماي كول-كوسىر شىعارمالار جازعان. يليا جاقانوۆتىڭ ءوزى قالاي اتايتىنىن بىلمەيمىن, «دۇنيە شىركىنگە...» ەنگەن توپتامالار ەسسە جانرىندا جازىلعان. ەسسە جازۋ قيىن. ەسسەنىڭ كوكەسىن الەمگە كورسەتكەن فرانتسۋزدار, ەندى قازاق قالامگەرلەرى وسى جانردى مەڭگەرىپ بارادى. سەبەبى, ول ءبىزدىڭ شەشەندىك ونەرىمىزگە جاقىن, ال قازاق بولسا, شەشەن حالىق. كىتاپتىڭ اۆتورى يليا جاقانوۆ – شەشەن, ونىڭ كەيىپكەرى – مىرزاتاي جولداسبەكوۆ شەشەن. ەگوركينو مەيرامحاناسىندا سۇحباتتا بولعان اقىن فاريزا وڭعارسىنوۆا تۋرالى ءسوز مۇلدەم باسقا. ماريا جەڭگەم مەن تيىش جەڭەشەمنىڭ اڭگىمەلەرى قالاي مونشاقتاي تىزىلگەن.
كىتاپ ادەمى, قۇندى, ماعىنالى ءارى تاربيە ءۇشىن قاجەت قۇرال.
عاريفوللا ەسىم,
اكادەميك, جازۋشى