استانا كۇنىنە وراي ەلورداداعى اباي ەسكەرتكىشىنىڭ الدىندا اشىق اسپان اياسىندا ەرەكشە مەرەكەلىك شارا ءوتتى. « ۇلى دالا, ۇلت مۇراتى, ۇرپاق بولاشاعى, ماڭگىلىك ەل – تاۋەلسىز قازاقستان!» تاقىرىبىمەن وتكەن كىتاپ جانە پوەزيا فەستيۆالىن قالا اكىمدىگى مەن «نۇر وتان» پارتياسى جانە ورتالىقتاندىرىلعان كىتاپحانالار جۇيەسى ۇيىمداستىرعان بولاتىن. بۇل شارا بابادان قالعان بايتاق دالامىزدا باعزى زامان مەن بولاشاقتىڭ اراسىنداعى نازىك بايلانىستى ءۇزىپ الماۋعا جانە كەشە مەن كەلەشەكتىڭ اراقاتىناسىنداعى رۋحاني قۇندىلىقتاردى قايتا جاڭعىرتۋعا نەگىزدەلدى. ۇرپاقتار ساباقتاستىعىن ۇلىقتاي وتىرىپ, رۋحانياتتى دارىپتەۋگە ارنالعان القالى جيىن ۇلتىمىزدىڭ ۇلى كەمەڭگەرى اباي قۇنانباي ۇلىنىڭ رۋحىنا تاعزىم ەتىپ, ەسكەرتكىشىنە گۇل شوقتارىن قويۋمەن باستالدى. ىزگىلىككە ۇندەيتىن يگى ءىستىڭ باستى ۇيىمداستىرۋشىلارى باسقوسۋعا مەملەكەتتىك سىيلىقتىڭ لاۋرەاتى, قازاقتىڭ اي ماڭدايلى اقىن قىزدارىنىڭ ءبىرى – اقىن مارفۋعا ايتحوجينانى الماتىدان ارنايى شاقىرىپتى. قالا قوناقتارى مەن قالىڭ بۇقاراعا ارنالعان فەستيۆالدىڭ جالپى نوبايى كەسەك-كەسەك بەس بولىمنەن قۇرالعان. سونىڭ العاشقىسى رەتىندە ساحنا شىمىلدىعى پوەزيا پاديشاسى فاريزا وڭعارسىنوۆانىڭ «ولەڭدەر جيناعى» كىتابىنىڭ رەسمي تۇساۋكەسەرىمەن اشىلدى. كوزى تىرىسىندە قالامداس قۇربىسى عانا بولىپ قويماي, جان سارايىن جان-تانىمەن تۇسىنىسكەن دوسى فاريزا جايلى ەستەلىكتەرمەن بولىسكەن مارفۋعا اپاي قايسار قازاق قىزىنىڭ تاعى ءبىر ولەڭدەر جيناعىنىڭ جارىق كورۋىمەن وقىرمان قاۋىمدى قۇتتىقتادى. فەستيۆال باعدارلاماسىنىڭ كەلەسى كەزەڭى «ابايدىڭ رۋحى» مەن «التى الاشتىڭ ارىسى – ءاليحان بوكەيحان» دەگەن اتاۋلارمەن جالعاسىن تاپتى. مۇندا ق.قۋانىشباەۆ اتىنداعى اكادەميالىق قازاق مۋزىكالىق دراما تەاترى ارتىستەرىنىڭ ساحنالاۋىمەن اباي قۇنانباي ۇلى مەن ءاليحان بوكەيحاننىڭ ءومىرى مەن شىعارماشىلىعىنان تەاترلاندىرىلعان كورىنىستەر قويىلدى. استانا كۇنىنە وراي ارنايى ۇيىمداستىرىلعان مەرەكەلىك شارانىڭ كەلەسى ءبولىمى «جىرلايدى جۇرەك» دەگەن اتاۋمەن م.ماقاتاەۆتىڭ 85 جىلدىعىنا ارنالعان ادەبي-مۋزىكالىق كومپوزيتسيامەن ءوربىدى. جاس اقىندار مۇقاعالي ولەڭدەرىن وقىپ, اندەرىن ناقىشىنا كەلتىرە ورىندادى. ال «ادەبيەت الەمىنىڭ ماقتانىشتارى» ايدارىمەن وتكەن ادەبي-اقىندىق ۆەرنيساجدا شىعارمالارى ارقىلى گۇلدەنگەن قازاقستاندى, ونىڭ جەتىستىكتەرى مەن تاريحىن جىرلاعان قالام يەلەرىمەن كورەرمەندەردىڭ ەركىن سىر-سۇحباتىنا ۇلاستى. وسىلايشا, شاعىن فورماتتا اقىن-جازۋشىلاردىڭ وقىرماندارمەن وتكەن كەزدەسۋىنە بەلسەندى قاتىسۋشىلار ارنايى ەستەلىك, سىيلىقتارمەن ماراپاتتالدى. سونىمەن قاتار, شارا اياسىندا «نۇر وتان» پارتياسى استانا قالالىق فيليالى مەن ورتالىقتاندىرىلعان كىتاپحانالار جۇيەسى بىرلەسە ۇيىمداستىرعان «ەلدىكتىڭ تەرەڭ تامىرى» اتتى ء«اليحان بوكەيحان وقۋلارىنىڭ» جەڭىمپازدارى دا انىقتالىپ, جەڭىمپازدارعا سىي-قۇرمەتتەر كورسەتىلدى. ال اباي ەسكەرتكىشىنىڭ الدىنداعى الاڭقايدا ۇيىمداستىرىلعان كىتاپ باسپالارىنىڭ جارمەڭكە-كورمەسى مەرەكەنىڭ اجارىن اشا تۇسكەندەي. ويتكەنى, « ۇلى دالا, ۇلت مۇراتى, ۇرپاق بولاشاعى, ماڭگىلىك ەل – تاۋەلسىز قازاقستان!» اتاۋىمەن كوركەم بەزەندىرىلگەن كەڭ كولەمدى كىتاپ كورمەسى ءتورت بولىمگە نەگىزدەلگەن بولسا, ونىڭ ەرەكشەلىگى سول «شيرەك عاسىرلىق بەلەستەر», «ەڭسەلى ەلوردا, اسقاقتاعان استانا», « ۇلى ماقساتتار مەكەنى» جانە «قالامى قاناتتى تۇلعالار» ايدارىمەن ايشىقتالعان كورمەدەگى كىتاپتاردىڭ وقىرمان قاۋىمعا ۇلەستىرىلۋى ەدى. نۇرلىبەك دوسىباي, «ەگەمەن قازاقستان»