بيىل ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتى عىلىمي كەڭەسىنىڭ شەشىمىمەن «25 ماۋسىم – جۋرفاكتا ديپلوم تاپسىرۋ جانە شاكىرتتىك ۋادە قابىلداۋ كۇنى» دەپ بەلگىلەندى. ەندى جىل سايىن ءدال وسى كۇنى جۋرناليستيكا فاكۋلتەتىنىڭ تۇلەكتەرى جوعارى ءبىلىم العانىن راستايتىن ديپلوم الىپ تۇرىپ, جۇمىس بەرۋشىلەر مەن ۇستازدار الدىندا شاكىرتتىك ۋادە بەرەتىن بولادى.
ۋادە ءماتىنى مىناداي: «مەن – ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ تۇلەگى – جوعارى ءبىلىمدى مامان ەكەندىگىمدى راستايتىن ديپلومدى الا وتىرىپ, وتانىما, اتا زاڭىما, كاسىبي قىزمەت ادەبىنە جانە ءوزىمنىڭ سۇيىكتى ۋنيۆەرسيتەتىمە ادال ەكەندىگىمدى ەرەن ەڭبەگىممەن دالەلدەۋگە ۋادە بەرەمىن!».
شاكىرتتىك ۋادە ءماتىنى ءۇش تىلدە دايىندالىپ, الدىن الا جۇمىس بەرۋشىلەر مەن ۇستازدار تالقىسىنا سالىنعان بولاتىن. مۇنداي شەشىم جۋرناليستيكا ماماندىعىن الىپ جاتقان شاكىرتتەردىڭ ءوز كاسىبىنىڭ ادەبى, اتا زاڭى, وتانى الدىنداعى جاۋاپكەرشىلىگىن ارتتىرۋ ءۇشىن ءدال قازىرگى اقپاراتتىق مايدان اسقىنىپ تۇرعان زاماندا اسا قاجەت بولعاندىقتان قابىلدانعان.
ۇلكەن سالتاناتپەن وتكەن ديپلوم تاپسىرۋ راسىمىنە پرەزيدەنت اكىمشىلىگى ءباسپاسوز قىزمەتى الماتى بيۋروسىنىڭ جەتەكشىسى ۆالەري جانداۋلەتوۆ, ءماجىلىس دەپۋتاتى ارتۋر پلاتونوۆ, «مىسل» جۋرنالىنىڭ باس رەداكتورى سەيداحمەت قۇتتىقادام, «اقيقات» جۋرنالىنىڭ باس رەداكتورى امانحان ءالىم, «قازاق گازەتتەرى» جشس پرەزيدەنتى جۇمابەك كەنجالين سەكىلدى بۇقارالىق اقپارات قۇرالدارىنىڭ باسشىلارىمەن بىرگە ساعىمباي قوزىباەۆ, كاكەن قامزين باستاعان ۇستازدار قاۋىمى قاتىستى.
جۇزدەگەن اتا-انا فاكۋلتەت ومىرىندە تۇڭعىش رەت جۇزەگە اسقان بۇل باستامانى قۋانا قۇپتادى.
ايناش ەسالي,
«ەگەمەن قازاقستان»
الماتى