استانادا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ جۇلدەسى ءۇشىن «قازاقستان بارىسى» رەسپۋبليكالىق ءتۋرنيرى ءوز مارەسىنە جەتتى.
وعان قالالىق, اۋداندىق جانە وبلىستىق تۋرنيرلەردە ىرىكتەۋدەن وتكەن بالۋاندار قاتىستى. بيىلعى دودادا جەرگىلىكتى جەردە ىرىكتەلگەن 32 بالۋانمەن بىرگە العاش رەت اسكەريلەر اراسىندا وتكەن ءتۋرنيردىڭ جەڭىمپازى كۇش سىناستى. سونىمەن بىرگە, 2015 جىلعى «قازاقستان بارىسى» بەيبىت ىستىباەۆ تاعى ءبىر رەت باعىن سىناپ كوردى. ول تۋرنيرگە ەشقانداي ىرىكتەۋسىز كەلدى.
بيىلعى سىندا «قازاقستان بارىسى» ءتۋرنيرىنىڭ فينالىنا العاش رەت جولداما العان 11 بالۋان بولدى. ءتۋرنيردىڭ اشىلۋ سالتاناتى وتكەننەن كەيىن بالۋانداردىڭ قارسىلاستارىن انىقتاۋ ءۇشىن جەرەبە تارتىلدى. وسىلايشا سپورتشىلار بەلدەسۋدى فينالدىڭ 1/16 بولىگىنەن باستادى.
العاشقى اينالىمدا جەرەبە بويىنشا «قازاقستان بارىسى» ءتۋرنيرىنىڭ 2011 جىلعى تۇڭعىش جەڭىمپازى ۇلان رىسقۇل مەن 2013 جىلعى جەڭىمپازى شىعىسقازاقستاندىق ايبەك نۇعۇماروۆ كەزدەستى. اسا تارتىستى بەلدەسۋدە ۇلان رىسقۇل جەڭىسكە جەتىپ, كەلەسى اينالىمعا جولداما الدى. وسى اينالىمدا ءتۋرنيردىڭ 2014 جىلعى كۇمىس جۇلدەگەرى, قاراعاندى وبلىسىنىڭ وكىلى اسىل بارمەنوۆ پەن سىر بويىنىڭ بالۋانى, «قازاقستان بارىسىنىڭ» 2014 جىلعى قولا بەلبەۋ يەگەرى رۋسلان ابدىرازاقوۆپەن كۇرەستى. بۇل كەزدەسۋدە رۋسلان جەڭىسكە جەتتى. فينالدىڭ 1/8 بولىگىندە ول استانالىق بالۋان ايتۋار ابدۋلوۆپەن كەزدەستى. بەلدەسۋدە ابدۋلوۆ قارسىلاسىنان ايلاسىن اسىرىپ كەتتى. بۇل سىندا رۋسلاننىڭ اعاسى ۇلان رىسقۇل دا جەڭىلىس تاپتى. ول بيىل ءبىرىنشى رەت قىزىلوردا وبلىسىنىڭ اتىنان ەمەس, ءوزى تۋىپ-وسكەن الماتى وبلىسىنىڭ اتىنان ونەر كورسەتتى.
وسى تۋرنيردە الماتى قالاسىنىڭ وكىلى الەكساندر كاساچەۆ ماڭعىستاۋلىق ەربول يگىلىكتى بەس سەكۋندتا ۇتىپ, رەكورد جاڭارتتى. الماتىلىق بالۋان بيىلعى جىلى «الماتى بارىسى» اتانىپ, «قازاقستان بارىسىنا» جولداما العان ەدى. كەيىننەن مەلدوني قولداندى دەگەن ءتورت بالۋاننىڭ قاتارىنا قوسىلىپ, جارىستان شەتتەتىلگەن. بىراق وعان تۋرنيرگە قاتىسۋعا قايتادان رۇقسات ەتىلدى. ول «قازاقستان بارىسى» جوباسىنىڭ فينالدىق كەزەڭىندە شيرەك فينالعا دەيىن جەتتى. وسى سىندا ول وڭتۇستىكتىڭ بالۋانى جۇمانازار ەرسۇلتانوۆقا ەسە جىبەردى.
جالپى, بيىلعى تۋرنيردە جاقسى ونەر كورسەتكەن بالۋاندار كوپ بولدى. سونىڭ ىشىندە جامبىل وبلىسىنىڭ وكىلى داۋلەتحان جاقىپوۆتى ايتۋعا بولادى. ول ادەمى تاسىلدەر جاساپ, كورەرمەندەر كوزايىمىنا اينالدى. سونىمەن بىرگە, جامبىل وبلىسىنىڭ تاعى ءبىر بالۋانى – ايبول ايتبەكتىڭ دە كۇرەسى كوپشىلىكتىڭ كوڭىلىنەن شىقتى. ول تۋرنيردە ءبىرىنشى رەت جارتىلاي فينالعا دەيىن جەتىپ, قولا بەلبەۋ الدى. ال ونىڭ جەرلەسى بەيبىت ىستىباەۆ تاعى دا ءتۋرنيردىڭ جەڭىمپازى اتاندى. ول فينالدا وڭتۇستىك قازاقستان وبلىسىنىڭ بالۋانى جۇمانازار ەرسۇلتانوۆتى جەڭدى. ءسويتىپ, وعان 25 000 000 تەڭگە, التىن تايتۇياق پەن استانادان ءبىر بولمەلى پاتەر بەرىلدى. ەكىنشى ورىن العان ەرسۇلتانوۆقا 5 500 000 تەڭگە, ءۇشىنشى ورىن العان ايتبەككە 1 800 000 تەڭگە كولەمىندە سىيلىق تابىس ەتىلدى.
داستان كەنجالين,
«ەگەمەن قازاقستان»