قاراعاندىلىق تىگىنشىلەر وقۋشىلاردى تۇگەل كيىندىرمەك
تاياۋدا كەنشىلەر استاناسىندا وتكەن مەكتەپكە ارنالعان كيىم كورمەسى ءبىزدىڭ وقۋشى بالالار بولاشاقتا قانداي كيىم كيۋى مۇمكىن جانە قالاي كيىنۋى كەرەك دەگەن باسى اشىق سۇراقتارعا بايىپتى جاۋاپ بەردى دەپ ويلايمىز. بارىنەن بۇرىن كورمەنىڭ كوزدەگەنى كوكەيدەن شىقتى. ماقسات – شەتتەن اعىلعان كيىم تاسقىنىنا توسقاۋىل قويىپ, بۇل نارىقتاعى وتاندىق ءونىمنىڭ ءورىسىن كەڭەيتۋ. ماسەلەن, بۇگىنگى كۇندە قاراعاندى وبلىسىنىڭ 526 مەكتەبىندە 174,5 مىڭ وقۋشى ءبىلىم الادى ەكەن. ال ەندى وڭىردەگى اتا-انالار قىتاي مەن قىرعىزدىڭ قولىنان شىققان مەكتەپ كيىمىنە جىل سايىن شامامەن العاندا 5 ملرد. تەڭگە جۇمسايتىن كورىنەدى...
وبلىستىق دەڭگەيدە وتكەن بۇل كورمەگە قاراعاندى, جەزقازعان, تەمىرتاۋ, ساران قالالارىنىڭ جانە اباي, شەت, ۇلىتاۋ اۋداندارىنىڭ جەڭىل ونەركاسىپ سالاسىنداعى كاسىپورىندارى قاتىسىپ, كوپشىلىك نازارىنا وزدەرى تىككەن كيىم-كەشەك ۇلگىلەرىن ۇسىندى.
نەگىزى مەكتەپ بالاسىنىڭ نە كيىپ جۇرگەنىنە نەمقۇرايدى قاراعاندى قوياتىن كەز كەلدى. مامانداردىڭ ايتۋىنشا, بۇگىنگى بالانىڭ ۇستىندەگى كيىمى وسكەلەڭ ۇرپاقتىڭ كۇنى ەرتەڭگى بەت-بەينەسىن ايقىنداۋعا, قالا بەردى ونىڭ دەنساۋلىعىنىڭ دۇرىس باعىتتا دامۋىنا اسەر ەتەتىن فاكتورلاردىڭ ءبىرى ەكەن. دەمەك, «ادام كوركى – شۇبەرەك» دەگەن ءسوزدىڭ استارىندا مول ماعىنا جاتىر.
وبلىستاعى تىگىن سالاسىنا تۋ تىككەن كاسىپكەرلەردىڭ ءوز ىستەرىنە جاۋاپكەرشىلىكپەن قارايتىندارى قۋانتادى. مىسالى, ولار وقۋشى كيىمىنىڭ بالاعا ىڭعايلى ءھام قولايلى, دەنساۋلىعىنا زيان كەلتىرمەيتىندەي سيپاتتا بولۋىنا ەرەكشە ءمان بەرەدى. بۇعان قوسا, مەكتەپ فورماسىنىڭ ۋاقىت تالابىنا ساي ءساندى بولۋىنا دا باسا نازار اۋدارىلادى. سايىپ كەلگەندە, مۇنىڭ ءبارى بىزدەگى بۇل كاسىپتىڭ كۇنى تۋعانىن اڭعارتقانداي.
تىگىن سالاسىنىڭ وزىنە ءتان كىلتيپاندارى جەتكىلىكتى. ماسەلەن, جازدىڭ باسىندا وقۋشى بالالاردان ولشەم الىنىپ, ءجۇن نەمەسە ماقتا ماتادان تىگىلگەن كيىمدەر ازىرلەپ قويساق, ولار كۇزگە تامان شولتيىپ شىعا كەلۋى ابدەن مۇمكىن. نەگە دەسەڭىز, تال شىبىقتاي جەتىلىپ كەلە جاتقان بالانىڭ بويى مەن دەنەسى جازعى كانيكۋل كەزىندە تولىسىپ وسە تۇسەتىنى بەلگىلى. مۇنداي جاعدايدا توقىما ماتاعا جەتەتىنى جوق. سەبەبى, ماتەريالدىڭ بۇل ءتۇرىنىڭ سوزىلعىشتىق قاسيەتى بار.
«ساران تىگىن-ماتا فابريكاسى» جشس-ءنىڭ نارىقتا جۇرگەنىنە بيىل 18 جىل بولادى. ونىڭ سوڭعى بەس جىلىندا فابريكا وقۋشىلاردىڭ كيىمىن تىگۋمەن اينالىسىپ كەلەدى. مۇنداي جاۋاپتى ىسكە قادام باسپاس بۇرىن كاسىپورىن تىڭعىلىقتى زەرتتەۋ جۇمىستارىن جۇرگىزگەن ەكەن. بۇل جەردە تۇتىنۋشىلار سۇرانىسى مەن مەديتسينا قىزمەتكەرلەرىنىڭ اقىل-كەڭەسى ءوز الدىنا, ءبىرىنشى كەزەكتە مەملەكەتتىك ستاندارتتار تالاپتارىن قايتا قاراپ, سىزبا-ۇلگىلەردى وزگەرتۋگە تۋرا كەلگەن.
تىگىن سالاسىندا ەڭبەك ەتىپ جۇرگەن مامانداردىڭ ايتۋىنشا, سوڭعى جىلدارى بالالاردىڭ دەنەلەرى جىڭىشكەرىپ, بويلارى ۇزارىڭقىراپ بارا جاتقان كورىنەدى. ءبىر قىزىعى, ون جىل بۇرىنعى مەرزىممەن سالىستىرعاندا, قىز بالالار ىرىلەنىپ, ۇلدار جاعى ۇساقتالعان ەكەن. ال ەندى تالعام جاعىنا كەلەر بولساق, بۇگىنگىنىڭ بالاسى ەتىمەن ەت بولىپ تۇراتىن كيىم ۇلگىلەرىن ۇناتاتىن كورىنەدى. اتا-انالاردىڭ تىلەگىن دە تۇسىنۋگە بولادى: ولار بالا كيىمىنىڭ ءبىراز جىل كيىس بەرگەنىن قالايدى. ال ساران فابريكاسى بولسا, بۇل تالاپتىڭ ۇدەسىنەن شىعىپ كەلەدى. مىسالى, كاسىپورىندا جوعارى سىنىپ وقۋشىلارىنا ارناپ تىگىلگەن جيلەتتەر بىرنەشە جىلعا دەيىن ءوڭىن بەرە قويمايدى ەكەن جانە دە جەتكىنشەكتەر ونى تاستاماي كيەتىن كورىنەدى. مىنە, وسىنداي ساپالى دۇنيەلەردى ءوندىرىپ جاتقان فابريكا جىلىنا وبلىستىڭ شامامەن العاندا 1200 وقۋشى بالاسىن كيىندىرىپ كەلەدى.
وڭىردەگى تىگىن نارىعىندا جۇرگەن كاسىپورىننىڭ ءبىرى – «فورتۋنا» تىگىن فابريكاسى» جشس. ازىرگە بۇل فيرما وبلىس كولەمىندە سپورتتىق كيىم ءتۇرلەرىن تىگۋمەن اينالىساتىن بىردەن-ءبىر كاسىپورىن. بۇگىنگى كۇننىڭ وزىندە فورتۋنالىقتار تانىمال «سپورتماستەر» ساۋدا ماركاسىنىڭ جەتكىزۋشىلەرىنە مىقتاپ باسەكەلەس بولا الامىز دەگەندى ايتادى.
كاسىپورىن باسشىلارىنىڭ ايتۋىنشا, قازىرگى تاڭدا فابريكا ءوزىنىڭ ديزاينەرلەرىن دايىنداپ جاتقان كورىنەدى. سولاردىڭ ءبىرى – مەكتەپ وقۋشىسى ماليكا ءجۇمادىلوۆا. دارىندى قىزدىڭ ءوز ءونىمدەرىمەن ءسان كونكۋرستارىنا قاتىسىپ, ديپلومانت اتانعان ونەرى بار ەكەن. بۇگىنگى كۇندە ول ءوز قۇربى-قۇرداستارىنىڭ تالاپ-تىلەكتەرىن ەسكەرىپ, وقۋشىلارعا ارنالعان كيىم ۇلگىلەرىن جاساپ ءجۇر.
«فورتۋنا» جشس ديرەكتورىنىڭ ورىنباسارى دانيار بيماعامبەتوۆ ءونىمدەردى نارىققا شىعارۋ ىسىمەن, ونىڭ ىشىندە مەكتەپتەرمەن كەلىسىمشارتقا وتىرۋدى راسىمدەۋ, ولشەمدەردى الۋ جانە باسقا دا شارۋالارمەن ارنايى ماماندار اينالىسۋى كەرەك دەپ ەسەپتەيدى. ال قاراعاندىدا شارۋانىڭ بۇل تۇرىمەن تاپسىرۋشى جانە وپەراتور رەتىندە «Bizdin Forma» فيرماسى تاجىريبەنى مولىنان جيناقتاعان ەكەن. مۇنىڭ ءوزى تۇتىنۋشىلارعا دا اسا قولايلى: ولار بوسقا سابىلماي, ءبىر عانا مەكەنجاي بويىنشا بارىپ, مەكتەپ وقۋشىلارىنىڭ فورماسىن جەتكىزۋشىلەر تۋرالى بارلىق اقپاراتقا قانىعىپ, وزدەرىنە قاجەتتى تاۋارلارعا تاڭداۋ جاساپ, وتىنىمدەرىن راسىمدەي الادى.
تەمىرتاۋ قالاسىنداعى «تەر-سەر» تىگىن تسەحى 2012 جىلدان بەرى بەلارۋستىڭ «ارەولا» دەپ اتالاتىن تىگىن-ماتا فابريكاسىمەن ارىپتەستىك نەگىزدە تىعىز قارىم-قاتىناس جاسايدى. وسى ۋاقىت ارالىعىندا ولار وزدەرىنىڭ ءبىر شوعىر ماماندارىن دايارلاپ, توقىما ماتا كيىم ۇلگىلەرىن ازىرلەپ شىعارعان. بەلارۋستىك ارىپتەستەردىڭ جەتكىزىپ وتىرعان جىپتەرى جوعارى ساپاعا يە ەكەن. بۇلار تىككەن كيىمنىڭ ءتۇسى مەن ءپىشىنى ۇزاق ۋاقىت وزگەرىسكە ۇشىرامايتىن كورىنەدى. تسەح ديرەكتورى بايان اقباەۆانىڭ سوزىنە سەنسەك, مۇنى كاسىپورىندا تىگىلگەن كيىمدەردى كيەتىن پاۆلودارلىق وقۋشىلار كەز كەلگەن ۋاقىتتا راستاپ بەرۋگە ءازىر ەكەن.
كورمەدەگى قاراعاندى اياقكيىم فابريكاسىنىڭ ونىمدەرى دە وزىنە ەرەكشە نازار اۋدارتتى. تابيعي بىلعارىدان تىگىلگەن وقۋشى اياقكيىمدەرى 38-ءشى ءولشەمنەن باستاپ ساپ تۇزەگەن. باعاسى دا قولجەتىمدى – 10 مىڭ تەڭگەنىڭ شاماسىندا. ال «موست» دەپ اتالاتىن وندىرىستىك كووپەراتيۆتىڭ العاشقى اسكەري دايىندىق پانىنە ارنالعان كيىمدەرى مەن سپورتتىق كوستيۋمدەر جيىنتىعىنا دەگەن كوپشىلىك قىزىعۋشىلىعىنىڭ دا مول بولعانىن ايتا كەتكەن ءلازىم.
تىگىن سالاسىنداعى باسەكەلەستىك سايىستان اۋداندىق جەرلەردەگى ىسمەرلەر دە شەت قالىپ جاتقان جوق. مىسالى شەت اۋدانىنداعى «شوجەن د» فيرماسى حالىق شىعارماشىلىعى ونىمدەرىنىڭ كورمەسىنە قالماي قاتىسىپ كەلەدى. نەگىزى كاسىپورىن يەسى ديدارگۇل شوجەن ۇلتتىق بۇيىمدار جاساۋدا بۇگىنگى كۇندە ۇمىت بولا باستاعان تەحنيكالىق تاسىلدەر مەن شەبەرلىك ادىستەردى جاڭعىرتىپ جۇرگەن ىزدەنىمپاز جان. جەكە كاسىپكەر ءبىرازدان بەرى مەكتەپ فورماسىن تىگۋ ءىسىن ۇيىمداستىرىپ, العاشقى ونىمدەرىنىڭ ۇلگىسىن اۋدان مەكتەپتەرىندە كورسەتىپ تە ۇلگەرگەن.
وڭىردەگى كاسىپكەرلەر مەكتەپ فورماسىنىڭ ساپاسىنا كەز كەلگەن جەردە جاۋاپ بەرە الامىز دەگەندى ايتادى. بۇلار ۇسىنعان باعا دا بالالى-شاعالى جانداردىڭ جانىنا مايداي جاعادى-اق. مىسالى, شەتەلدىك مەكتەپ فورماسىنىڭ ءبىر جيىنتىعى 10-25 مىڭ تەڭگە ارالىعىندا تۇرسا, بىزدە تىگىلگەن مەكتەپتىك «اق كويلەك, قارا بەشپەنتتەردىڭ» باعاسى 7-8 مىڭ تەڭگەنىڭ مولشەرىندە بولماق. ەگەر دە وسى مۇباراك ماقساتتىڭ جولىن الدەقانداي ارام مۇددە كەسىپ كەتپەسە, وقۋشى كيىمىن وندىرەتىن ءبىزدىڭ ىسمەرلەردىڭ بۇل نارىقتا تولىق ۇستەمدىك قۇرارىنا سەنۋگە ابدەن بولادى.
قايرات ءابىلدينوۆ,
«ەگەمەن قازاقستان»
قاراعاندى